الحمد لله لأول مرة من سنين أحس إني راكب عربية والسبب واحد ميكانيكي بيفهم الله يباركله... الراجل بصراحة طلع راجل محترم فعلا... كان عندي مجموعة مشاكل ف العربية من أرخمهم فعلا كان كتمة زبالة ف سحب العربية وسخونة زيادة والمكنة كانت عبارة عن كتلة زيت... وكان معايا ميكانيكي مفيش عنده غير إنه يهاودني وبس... أي حاجة أقوله عليها كان الراجل مشكورا بيغيرها ع طول حتى لو مكانتش عاوزة تتغير أصلا ومش متوقع إني حمار سايق عربية وبس... بس الراجل الجديد ربنا يباركله أول حاجة عملها دور العربية وقعد يشوف صوت المكنة ويلف حواليها وإبتدي يشرحلي إيه المطلوب... قالي لو مستغني عن العربية يومين... قلتله أنا كدة كدة زهقت ومحتاج أرتاح ومش فارق معايا اليومين ولا التلاتة... المهم ف أول يوم لقيته بيتصل بيا ويقولي عاوزك تيجي تجرب العربية وتشوف السحب أخباره إيه... وطلعت فعلا جربت العربية ع الطريق وكان فرق شاسع فعلا وكان السبب الأول ف علبة البيئة وإتضح إنه سافر مخصوص علشان يجيب العلبة الأصلي بتاعتها لأن العلبة إللي كانت راكبة كانت عبارة عن علبة فاضية وجواها ماسورة فاضية... المهم إستلم العربية تاني وخلص أول يوم... تاني يوم بقى دا إللي كان فيه الشغل كله... غير أستك موبينة وبوجيهات وأولسيه كاتينة وأولسيه الفيتيس وبلية الكاتينة والسير وسير الدينامو والتكييف وفك الفيتيس وغير الديسك والأسطوانة وبلية الدبرياج وحل جوا الفيتيس وظبطه كله... كانت تكلفة الحاجات دي بالفواتير 3400 جنيه... وكانت المصنعية 500 جنيه... بس حسيت بعد كل إللي أنا دفعته وإللي هون عليا المبلغ إني بقيت راكب عربية فعلا