زيت محرك لفلوكس فاجن بوينتر

**mohamed sa** · 24-08-2017 02:10 AM

السلام عليكم ورحمة الله وبركاته
معايا فولكس فاجن بوينتر 2005 1000cc إستخدام بسيط .. عاملة حتى الآن اقل من 20.000 الف كيلو لم تواجهنى مشكله معها
غيرت الزيت كذا مرة كل سنتين او ثلاثه بغير ( تقريبا كل الف كيلو) واكتشفت النهارده انى بغير دايما ( بتوع المشحمه كل مرة هما اللى بيختاروه) زيت موبل 1000 سوبر 20/50 بيتغير مفروض كل 3000 كيلو ..زى اللى فى الصورة... ولقيت صديق ليا بيقولى الزيت ده غلط على الماتور وتقيل جدا ...سألت بتوع المشحمه قالى ده اللى ينفع ليك..والتقيل بيبقى جركن احمر مش رصاصى ومكتوب عليه تقيل جدا ومكتوب عليه 50 بس وفعلا الجركن الاحمر مكتوب عليه كده...
اعمل ايه ؟ استمر على الزيت بتاعى ولافعلا هيضر الماتور فأغير لنوع تانى..؟ مع العلم ان صوت الماتور عالى من اول لحظه اشترتها زيرو..
شكرا لكم جميعا ويشرفنى وجودى بينكم ,,

**borio1704** · 26-08-2017 01:24 AM

أهلا بحضرتك معانا...

الحقيقة الحالة اللي حضرتك بتوصفها هي الحالة العامة المنتشرة في مصر للأسف... وأنا بصراحة بستغرب جدا إزاي الواحد يبقى دافع فلوس كتير في عربية (خصوصا في مصر) ومش بيفكر إزاي يحافظ عليها!!!!!!!

لو حضرتك عايز تحافظ على عربيتك أطول فترة ممكنة يبقى لازم تسمع كلام جهة واحدة بس مفيش غيرها... كتالوج عربيتك...

كتالوج العربية هو المرجع الوحيد والأساسي اللي فيه الطريقة الصحيحة لتشغيل سيارتك والحفاظ عليها.. لإن الي كاتب الكتالوج هو اللي صنع السيارة...

ومفيش حد حيعرف إيه الأحسن للسيارة أحسن من اللي صنعها...

شركات الزيوت واللي بيشتغلوا فيها واللي بيشتغلوا في محطات البنزين كل همهم إنهم يبيعوا.. بغض النظر عن إيه اللي ينفع معاك أو يناسبك ويناسب عربيتك (إلا من رحم ربي)... فما تحاولش تسمع من حد منهم.. خصوصا مع الانتشار الرهيب للجهل في مصر.

طيب... إزاي أعرف الزيت الصح لعربيتي؟؟؟

كل كتالوج مكتوب فيه مواصفات الزيت المطلوب... هتلاقيها في قسم الصيانة أو في قسم المواصفات.. وغالبا في حالتك هتلاقيها في كتيب منفصل بتاع الصيانة الدورية لإن العربيات الأوروبية كلها بقت بتعمل جدول الصيانة والزيوت بتاعت العربية في كتيب منفصل.

مواصفات الزيت بتبقى حاجتين... مستوى أداء (أو جودة) و لزوجة.... ومستوى الجودة أهم من اللزوجة.

بالنسبالك.. فولزفاجن دايما بتطلب زيوت بمواصفات معينة.. مش أي زيت يتحط في العربية..

لازم الزيت يكون مطابق لأحد مواصفات فولزفاجن للزيوت.... يعني لازم الزيت اللي تشتريه يكون مكتوب على علبته رقم المواصفة دي.. وهتلاقي الرقم ده مكتوب على ظهر العلبة.

مواصفات فولزفاجن (لمواتير البنزين) هتبقى واحدة من دول:
VW 500.00
VW 501.00
VW 502.00
VW 503.00
VW 504.00

كل مواصفة من دول مناسبة لمواتير معينة من فولزفاجن.. ولو مكتوب في الكتالوج رقم من دول يبقى ده أقل مستوى جودة زيت ينفع تحطه في الموتور.. بس مفيش مانع إنك تحط زيت أحسن (502 أعلى من 501... وهكذا)..

وغالبا المكتوب في الكتالوج عندك هو واحدة من الثلاثة الأولانيين (500 - 501 - 502)..

بس مقدرش أقوللك على الزيت المناسب قبل ما أعرف كتالوج عربيتك طالب إيه.. لإن ده هو اللي هيحدد اتجاهنا من الأساس.

حاجة تانية مهمة جدا جدا جدا...

الزيت بيعيش حوالي 3-5 سنين... بس ده طول ما هو جوه علبته ومخزن صح...

بس مادام طلع من علبته واتحط في الموتور يبقى ينطبق عليه عمر التشغيل للزيوت...

عمر التشغيل للزيوت في حوالي 80% من الحالات لا يزيد عن 6 شهور... وفي الـ20% الباقيين لا يزيد عن 12 شهر بأي حال من الأحوال... حتى لو كنت بتمشي بالعربية 10 كيلومتر في السنة.

فمش معنى إنك بتستخدم العربية استخدام بسيط تبقى بتحافظ عليها... أبدا...

فيه حاجات بتبوظ في العربية حتى وهي واقفة ما بتتحركش... أولها الأجزاء الكاوتش (عمرها لا يزيد عن 5-7 سنوات أبدا).

أنصحك تدخل على المواضيع دي لو عندك وقت:

https://www.nilemotors.net/Nile/341680-a.html (القواعد الذهبية لاختيار زيت العربية.... موسوعة مبسطة لأساسيات زيوت المحركات)
https://www.nilemotors.net/Nile/490076-a.html (إمتى تغير زيت الموتور؟؟؟)
https://www.nilemotors.net/Nile/434256-a.html (اقرا كتالوج عربيتك.. هتستريح)

وعلشان ما أكونش مقصر معاك... يا ريت ترفع لنا صورة توصيات الزيت في الكتالوج وإن شاء الله نساعدك.

...

**borio1704** · 26-08-2017 11:10 PM

المشاركة الأصلية كتبت بواسطة mohamed sa

اشكرك جداااا ده صورة من الطتالوج ورابط لموقع يرجح انه نفس موديل عربيتى Engine oil for Volkswagen Pointer 2

طيب تمام...

الصورة اللي حضرتك حاططها ما قالتش إذا كان فيه لزوجة مفضلة.. وبالتالي الموضوع مفتوح قدامنا...

عموما هو مقسم الزيوت لقسمين:
زيوت تخليقية متعددة درجات اللزوجة.. ودي تجيبها بالمواصفات VW 500 أو VW 502
أو زيوت معدنية متعددة درجات اللزوجة.. ودي تجيبها بالمواصفات VW 501

عموما.. مواصفة 500 و 501 موجود منها درجات لزوجة كتير خفيف وتقيل (كله متعدد اللزوجة)... أما المواصفة 502 مش هتلاقي منها غير لزوجات خفيفة (تخليقية غالبا)..

بالنسبة لوضع حضرتك.. اتوقع إن العربية بتفضل مركونة فترة طويلة وتشتغل آخر الأسبوع مثلا... وفي الحالة دي يفضل طبعا إن الزيت يكون تخليقي.. علشان ميزة الزيت التخليقي الأساسية في بداية التشغيل..

الزيوت التخليقية المطابقة لمواصفة VW 502 في كتير... أنصحك بواحد من دول (بعض الصور مش بتظهر لو كنت فاتح من جوجل كروم أو فايرفوكس.. إنما الصور بتظهر في الموبايل):

زيت التعاون CO-OP 1 Extra بلزوجة 5W-40
http://www.coop.com.eg/productFiles/1tds.pdf

زيت شل هيلكس ألترا بلزوجة 5W-40
http://www.shell.com/motorist/oils-l...tra-5w-40.html

زيت موبل1 نيولايف بلزوجة 0W-40
http://www.mobil1-egypt.com/engine-o...fications#tabs

زيت موبل1 FS بلزوجة 5W-30
http://www.mobil1-egypt.com/engine-o...fications#tabs

كاسترول إيدج بلزوجة 5W-40
http://www.castrol.com/en_ae/arabia/...uct-range.html

كاسترول إيدج بلزوجة 0W-40
http://www.castrol.com/en_ae/arabia/...uct-range.html

ده غير أنواع تانية كتير.. والحقيقة السوق في مصر مليان زيوت مناسبة للفولزفاجن لإننا بنجيب زيوتنا من أوروبا أساسا.

طبعا.. الاختيار ليك في الآخر.. بس القاعدة الأساسية هي إنك تتأكد من إن مواصفة فولزفاجن مكتوبة على علبة الزيت.

لو حضرتك عايز تحط زيت معدني... الزيوت المعدنية المتوافقة مع مواصفة فولزفاجن قليلة جدا جدا.. ومفيش غير نوع واحد بس...

زيت التعاون XPL-SM بلزوجة 20W-50
http://coop.com.eg/productFiles/2tds.pdf

هو ده الوحيد... وما ينفعش تحط زيت معدني غيره في مصر.

...

**borio1704** · 27-08-2017 12:29 PM

المشاركة الأصلية كتبت بواسطة mohamed sa

اشكرك على جهدك فى الشرح والبحث بس انا احترت اكتر .... لكن اللى فهمته من كلام حضرتك انها بتقبل الزيوت التخليقيه والمعدنيه لكن بمعايير معينعه... والبعض قالى لاتهتمد على المكتوب على مواقع الزيوت من توصيات او على مواقعهم...العبرة بدرجه اللزوجه وليست المكونات.....
انا كنت باستخدم موبيل سوبر 1000 xhp 20w50 وقالولى ده غلط...مع انه مفروض طبق معايير الرقم vw 500 !!!
وحاليا اشتريت زيت نصف تخليقى وهو بنصيحه صدبق انه يجب التدرج فى اللزوجه وهو فالوفين ارمور 10w40 نصف تخليقى وهو يخضع مفروض للرقم vw 5002
ثم سأنتقل كمان 8 شهور كحد اقصى باذن الله لValvoline SynPower 5W-30 Motor Oil 4L وده الوحيد اللى مكتوب عليه توصيه لفولكس فاجن...او انتقل لشيل هليكس اللى حضرتك كاتبه 5w40 يخضع للرقم vw 5001
هل هذا التدرج صح؟؟؟ او هذه الزيوت.. ؟؟ وطبعا هغير فلتر زيت عند كل تغيير ...
نصيحتكم ؟
شكرا جزيلا

المبدأ ثابت لا يتغير... كتالوج عربيتك هو المرجع الأساسي اللي لازم تمشي عليه... مش كلام أي حد تاني... ولا كلام شركات الزيوت ولا تجارب ناس تانية ولا أي كلام من ده.

وزي ما قلت لحضرتك... مواصفات الزيت بتبقى دايما عبارة عن حاجتين... مستوى الأداء واللزوجة..

مستوى الأداء بيعتمد بشكل أساسي على مكونات الزيت... والموضوع ده كبير جدا وشرحه يطول... بس ملخص الموضوع وتسهيلا على المستخدمين.. بنلجأ لأكواد تعبر عن مستوى أداء الزيت.. والأكواد دي هي اللي بتقولنا إن الزيت ده مناسب ولا لأ.

علشان كده لما نشتري الزيت مهم جدا إننا نتأكد إن الأكواد اللي بندور عليها مكتوبة على علبة الزيت... وده للأسف أغلب الناس ما تعرفوش...

اللزوجة بردو مهمة.. بس أهميتها أقل من مستوى الأداء... والناس عارفاها من زمان لإن طريقة توصيف اللزوجة طلعت قبل توصيف مستوى الأداء... وكمان الطريقة موحدة في العالم كله... على عكس مستوى الأداء اللي بقت عاملة زي البحر من كتر ما كل جهة مطلعة مواصفة وكود خاص بيها.

ملخص الكلام هنا إن كل الزيوت اللي عليها نفس المواصفات مفيش اختلاف في الأداء بتاعها تقريبا... وتقدر تشتري أي ماركة تعجبك.. مفيش فرق بينهم في الحقيقة.

بس بالنسبة للزيوت اللي حضرتك ذكرتها...

يا ريت تأكدلي إن موبل سوبر 1000 xhp 20w50 فعلا مطابق لمواصفات فولزفاجن... لإن اللي أعرفه إنه مطابق لمواصفة API SL فقط.

وعلى حسب علمي بردو... فالفولين إنجن آرمور 10W-40 غير مطابق لأي مواصفة من فولزفاجن..
http://enginearmour.valvolineeurope...._048-01bME.pdf

بالنسبة لفالفولين SynPower 5W-30 ... فأكيد مش هو الوحيد اللي عليه توصية لفولزفاجن... الزيوت اللي مطابقة لمواصفات فولزفاجن كتير جدا...

حضرتك تعرف حد بيبيع زيوت فالفولين.. مش كده؟؟؟
أوعى تسمع لحد بيبيع زيت... خلي قرارك من دماغك وانت معتمد على المعلومات الصحيحية وأسلوب التقييم الصح.

بالنسبة للتدرج في اللزوجة..

معظم اللي بيشتغلوا في الزيوت بيقولوا الكلام ده على أساس إن الزيت احتمال ينقص بشكل واضح مع اللزوجات الخفيفة..

الكلام ده ممكن يحصل فعلا خصوصا لو كنت بتستخدم زيوت معدنية لفترة طويلة .. لإن الزيوت المعدنية بتعمل رواسب بتنشف على الشنابر وبتمنع إن الشنابر تتمدد وتحكم الكبس مضبوط... بس هي بتتراكم وبتغطي الفرق اللي حصل في الشنابر...

لما بتستخدم الزيت التخليقي... الزيت بيذوب الترسبات دي... وهنا الزيت فعلا هينقص لفترة معينة لإن الشنابر هتكون متكتفة من وجود الترسبات .. لحد ما كل الترسبات تدوب بالكامل والشنابر ترجع تشتغل طبيعي زي ما كانت فبريكا.

طبعا.. الكلام ده بياخد شوية وقت.. 10-20 ألف كيلومتر...

بس حسب ما أنا فاهم.. العربية عند حضرتك يا دوب ماشية 20 ألف (لسه جديدة ما شاء الله)... ودي مسافة قصيرة جدا ما يلحقش الموتور يكون ترسبات زي ما شرحنا.

أنصحك تستخدم زيت تخليقي باللزوجة المناسبة.. علطول بدون تدريج.. وإن شاء الله مفيش زيت هينقص... خصوصا إن حضرتك مش بتمشي بالعربية تقريبا.. وحتى لو حصل نقص... مش هيكون محسوس بالنسبالك (حضرتك مش بتمشي أكتر من 1000 كيلومتر في 6 أشهر.. مش هتحس بأي حاجة أصلا).

على فكرة.. التغيير المستمر لأنواع الزيوت بيقلل من فوائد الزيت الجديد.. ويفضل تثبت على نوع واحد ما تغيروش... بس المهم يكون زي طلبات الكتالوج.

ملخص الكلام ده كله...

هات الزيت اللي تلاقيه متوفر بسهولة ويكون مطابق لطلب الكتالوج.. أياً كان نوعه.. أياً كانت ماركته.

...

**borio1704** · 27-08-2017 10:47 PM

المشاركة الأصلية كتبت بواسطة mohamed sa

أشكرك جداااا إستفدت جداااا من كلامك وشرحك وليك كل الحق فى كلامك..أنا الحمدلله لغيت طلب شراء فالفولين ...ومعلومه الكود اللى على العلبه فادتنى جدااااا ..وليك حق طبعا ماسمعش كلام حد ليه مصلحه او معاه توكيل ماركه معينه..غيرت النهارده لشيل 10w40 واتأكدت ان كود vw502 00 على العلبه والفرق فى صوت الماتور ونعومتها بدأ يظهر...السحب لسه ... وان شاء الله لو فى العمر بقيه كمان 8 شهور كحد اقصى ممكن استمر عليه واغير ليه..أو أغير لتخليقى كامل شل 5w40
أشكرك جدا تانى جعل الله نصائحكم فى ميزان حسناتكم

اختيار موفق ..

ونصيحتي ليك ما تخليش الزيت أكتر من 6 شهور.. احنا نعتبر في أول سبتمبر دلوقتي.. يبقى تغير إن شاء الله في بداية مارس الجاي...

وبالتوفيق إن شاء الله.

...