الموضوع: طلب نصيحة من استشارى الزيوت بوريو موبيل ولا شل الافضل

المشاركة الأصلية كتبت بواسطة ahmed_wagih

شكرا جزيلا على الرد

فيه حاجة عايز اقول لحضرتك عليها الزيت بقى له 8000 كيلو خلال عشر شهور حاسس ان صوت المكنة عالى وببص على اللزوجة حسات انه لذوجتة قلة بقى بينقط من قياس الزين مش ماسك نفسة زى الاول

والحق يقال حضرتك نصحتنى انى اغيرة على 10 الف كيلو او 6 شهور ايهما اكثر بس انا قلت يقعد السنة زى ما الناس بيقولوا

سؤالى لحضرتك فى نقطتين

1- هل لذوجة الزيت لما قلت ليها علاقة بالمدة انه قعد 10 شهور ولا ازود اللذوجة شوية اخليها 40 انا كنت حاطط 5W30 موبيل وان
2- ولو اغير اللذوجة يبقى كدة امامى خيارين اما شل الترا 5W40 او موبيل وان 20ًw50
ملحوظة الزيت مش بينقص مع انى غلطت اخر مرة وحط لى ال 4 لتر وبقى بيعدى ال ماكس بس المرة اللى جاية باذن الله اقول له يحط 3.75

سؤال ازاى اقدر احكم واحدد انى احط 3.75 لتر والجركل 4 لتر اعرفها ازاى دى

معلش تعبتك معايا

مفيش تعب ولا حاجة... المهم المصلحة تتم..

أنا رجعت لنقاشنا القديم حوالين الزيت ...
https://www.nilemotors.net/Nile/4911...post3876094652 (موبل 1 تعدل مجموعتها في مصر)

كده أقدر أجاوب على أسئلة حضرتك...

عمر الزيت في الموتور مرتبط بعوامل كتير بتأثر فيه... ومن ضمنها الوقت... وأكبر مشكلتين بتواجه الزيت بشكل عام هي عمر الإضافات اللي فيه وقدرته على مقاومة التأكسد...

من ضمن الإضافات الموجودة في الزيت إضافات لتحسين مؤشر اللزوجة.. ودي اللي بتحافظ على لزوجة الزيت في درجات الحرارة العالية

ومن ضمن الإضافات بردو.. إضافات لمنع التأكسد .. ودي بتتفاعل مع الرطوبة الموجودة في الزيت... والرطوبة بتبقى عالية في المواتير اللي بتمشي مشاوير قصيرة (أقل من 10 كيلومتر في المشوار)... خصوصا مع إزالة أغلب ملاك العربيات في مصر لثرموستات الكوعة.

تقدر تعرف أكتر عن مواعيد تغيير الزيت من هنا الموضوع ده:
https://www.nilemotors.net/Nile/490076-a.html (إمتى تغير زيت الموتور؟؟؟)

أنا ما أنصحش بزيادة اللزوجة ولا تغيير نوع الزيت مادام أداؤه كويس في العربية... كل الموضوع هو تغيير الزيت في المواعيد الصح.


بالنسبة لاختيارات الزيوت التانية.. فقدامك اختيارات كتير جدا.. خصوصا إن توصيات الزيت في اللانوس مرنة ومستوى الزيت المطلوب مش عالي.

اللي دايما يحكمك في الاختيارات هو:
أولا: مواصفات الكتالوج (كل ما كانت المواصفات أعلى من المطلوب في الكتالوج كل ما كان أحسن).
ثانيا: الميزانية (كل ما كان أرخص كل ما كان أحسن).
ثالثا: توافر المنتج بسهولة (كل ما كان متوفر في أماكن قريبة مني طول السنة كل ما كان أحسن.. يعني مش مضطر أعمل مشوار مخصوص لبلد تانية مثلا أو أعمل أوردر قبلها بمدة أو أبعت أجيبه مخصوص).

لو الزيت اللي قدامك ماشي مع الكتالوج وضمن ميزانيتك ومتوفر قدامك بسهولة ما أنصحش إنك تغيره... واختياراتنا بعد كده تعتمد على قد إيه الزيت بيحقق الشروط دي.

...