تجربتي في نقل رخصة القيادة لمرور آخر و تجديدها

‎عمر الطحان‎
تجربتي في نقل رخصة القيادة لمرور آخر و تجديدها
امبارح رحت مرور فيصل اللعين التابعة ليه الرخصة في تمام لتاسعة و خمس دقائق صباحاً و كانت الوحدة رايقة جداً و الشبابيك عليها ناس قليلين، و سألتهم عن اجراءات الرخصة لمرور حدائق الأهرام الأقرب لسكني و كان المطلوب استخراج شهادة المخالفات من نيابة المرور و استخرجتها في ربع ساعة على الأكثر و بتكلفة 10 جنيهات فقط بينما عرض عليا واحد بره الوحدة استخراجها مقابل 100 جنيه !!...
و كان معايا ملف تجديد الرخصة جبته الكشك و بعدها رحت لمركز طبي "آل حمد" و طلعت منه شهادتين الباطنة و النظر مقابل صورتين و 50 جنيه.
بعد كده طلعت على مرور الحدائق لأن رخصتي سارية فماحتاجتش شهادة بيانات.
دخلت الوحدة وعاليمين بعد الباب على طول فيه شباك الورق اللي معايا و طلبوا مني شراء حافظة بيضاء و تصوير البطاقة و الرخصة و قيمة شراء الحافظة كانت 25 جنيه، و بعد الشراء رجعت الشباك تاني و اخدوا الحافظة و الملف و الشهادات و الرخصة و ادوني رقم و دلوني على شباك معين استنى دوري عنده.
لما جه دوري الراجل اطلع على الورق كله و اداني نموذج املا بياناتي فيه و بعدها طلب مني اروح الخزنة ادفع 55 جنيه و اشتري نموذج ج 256 و اداني وصل فيه المطلوب و رحت الخزنة دفعت 65 جنيه و جبت النموذج و وصل الدفع و رجعت الشباك تاني أخد أصل الوصل و النموذج و البطاقة صورة ليها و قاللي استنى عند غرفة التصوير لما يدهوا عليا.
استنيت حوالي ساعة و ربع لحد ما ندهوا عليا و اتصورت و اخدت البطاقة و استنيت بره حوالي 10-15 دقيقة لحد ما استلمت الرخصة.
ملاحظات:
ما حدش طلب فلوس و انا اديت لحد فلوس لا في فيصل و لا في- الحدايق
- المخلصاتية سفاحين و مرواحك بدري قوي هايجنبك الزحمة و هاتخلص ورقك بنفسك بسرعة.
- التعامل كان محترم جداً سواء من الضباط أو الموظفين
- أنا خلصت بعد أذان الظهر بنص ساعة تقريباً