الموضوع: ( انا الحق استخبى بقى )

ديه تكمله لموضوع لو كنت مكانى تعمل ايه
اللى كان نصه
جين 2009 لسه معلقتش نمر لسه البلاستيك عليها لسه مكملتش 70 كيلو اول تموينه بنزين
القصه
استملت العربيه وطلعت على 6 اكتوبر اخذت المحور على 70 كملت لغايه الهيبر قررت افولها من موبيل اللى بعد الهيبر
أخذت الطريق البطيئ ودخلت البنزينه فولت التنك وكله تمام زى الفل اتحركت وركنت قدام on thr run ودخلت اجيب كافيه لاتيه وسجاير
وانا جوه وبفكر فى اول خدش ممكن يحصل وخدوا بالكم من كلمه خدش
ملحوظه للى ميعرفش ( ارضيه البنزينه ديه بالذات زلقه جدا بتزحلق يعنى )
المهم
واحد بجراند شروكى العشم كان قاتله باين كان داخل بسرعه عايز يركن جمبى والمسافه كانت واسعه جدا
العربيه زحفت منه ولببببسسسسس فى باب العربيه اللى ورا يمين ( عربيتى طبعا )
لبسه محترمه
ملحوظه الجراند شيروكى كان فيها الدعامات الحديديه اللى بيركبوها علشان يخربوا بيها بيوت الناس وهمه يبقوا فى السليم
المهم لاقيت راجل محترم لابس بدله ماركه تيدلاموند داخل بيسأل
معلش با جماعه مين صاحب الجين 2 الشامبين اللى بره
انا بقى اتفردت واتنيت وخدتنى الجلاله قوى
الناس مصدقت شافتها جايه تسألنى عليها
ابتسمت ابتسامه بيوصفوها فى القصص ابتسامه افتخار وقلت بتناكه
- ايوه انا
فبصلى قوى وحسيت الدموع هتبظ من عينه وقالى
- اصل انا خبطها

- نعم حضرتك ؟
- انا وانا بركن العربيه اتزحلقت وكده يعنى
وانا واقف اسد مفيش اى ريأكشن على وشى مش ثبات اكيد ده من الخضه بعيد عنكم
- كده يعنى ؟؟
- اتخبطت يعنى
معرفش ابتسمت ليه وقلت ببساطه انا نفسى استغربت منها ومتهيألى انى كنت بصبر نفسى
- خدش يعنى
هز راسه وقال
- لاء هى جامده شويه
وخرجنا ولقيت نص اللى موجدين خرجوا ورانا ( عادى مصريين وبيحبوا المشاركه )
الباب كان معجون بس الحمد لله جت فى نص الباب وملمستش القوائم
انا مش هكمل ايه اللى حصل لغايه لما انتوا تقولولى
لو كنت مكانة تعمل ايه
-
المهم انا بستعوض ربنا فى الحاجات ديه وهو بيعوضنى خيرا منها وعن تجربه
وده كان اول ديسمبر

بس انا منحوس اكيد

المهم رحت يوم الثلاثاء اللى فات الحرفيين وحبايبنا كتير هناك جبت باب استيراد خارج نفس اللون بمعجزه
وركب والعروسه رجعت تانى زى الاول من غير رش ولا تعديل يدوب فكينا باب وركبنا باب نفس درجه اللون ورجعت جديده من الاول
والحمد لله مفيش حاجه فى القوايم
انا ساكن فى النزهه الجديده وراء السندباد ومكتبى فى عمارات العبور
تانى يوم الاربعاء كنت رايح المكتب الساعه 8 الصبح والوقت ده بتبقى المنطقه ديه معجونه خرجت على جوزيف تيتوا الدنيا واقفه بنتحرك متر كل خمس دقايق
وبووم
اتوبيس نقل عام
الحمد لله على كل حال
المره ديه الشنطه والفانوس اليمين
نزلت من العربيه وهو نزل من الدبابه اللى راكبها
مستفز الراجل ده
ده نازل يبص على اكصدام الاتوبيس حتى قبل ما يبص على اللى عمله وقال بسرعه
- انت اللى غلطان يا بيه انت وقفت فجأه
طبعا ولاخر لحظه بحاول اكون محترم فقلتله بأدب
- يا حاج الطريق واقف عيب اللى انت بتقوله ده ثم فيه مسافه بينى وبين اللى قدامى متر ونص على الاقل يعنى مفيش اى داعى ان انا اقف فجأه
ولقيته فجأة رفع صوته وشوح بأيده
- انت اللى وقفت فجأه هو انا اعمى يعنى
طبعا التراكمات وقله أدبه خلتنى اشيط وواضح ان الادب مش نافع
صرخت بقى بجد
- انت هتستعبط يا بنى ادم انت مجنون خلاص مفيش تمييز مفيش فهم لابسط قواعد المرور
ومش فاكر انا قلت ايه بس الحمد لله متجاوزتش حد اللى انا قلته ده
وللغرابه جاب ورا ولقيته رجع للكنه القديمه بتاعت حضرتك ويا بيه
متكلمتش كلمه زياده بصيت للشنطه اتطبقت حته منها وفانوس ادشدش اما الاتوبيس مدرعه كان ممكن تنظم للاسطول البرى المصرى
وبصيتله وقلتله
- اتقى الله فى حاجه غيرك اتقى الله
وسبته وركبت العربيه
طبعا كنت بفكر فى حاجه واحده فى اللحظه ديه
( انا الحق استخبى بقى لان كده مش نافع خالص )
ورجعت ركنتها عند البت وخدت تاكسى للمكتب
- لاحول ولاقوه الا بالله
انا لسه مرخصتش ولا امنت كل ده على حسابى برضه الحمد لله
انا الراجل بتاع الشيروكى جالى جوه وكان قمه فى الادب والاحترام وعرض انه يصلح العربيه وانا اللى رفضت واكيد مش هأخذ من السواق الغلبان انا بس بتكلم على الطريقه فى الكلام وليه بقى فيه ناس تخاف متختشيش ليه
اسف على الاطاله وبشكركم جدا على الروح الاخويه اللى فى المنتدى
وعموما اللى واسانى مره بلاش يتعب نفسه تانى انا هعتبرها وصلت

صاحب الشيروكى ممكن اتساهل معاه
انما سواق الاوتوبيس ده عايز الاعدام الصراحة لانه بجح جدا و نازل يبص على المصيبة اللى هوه راكبها