مشكلة قانونية بيني وبين جاري محتاج آرائكم ..
السلام عليكم
لعلكم بخير جميعا ان شاء الله
عندي مشكلة مع جاري ومحتاج رأي قانوني ورأي بناء على خبرة في التعامل مع مواقف مشابهة ..
انا ساكن في الدور قبل الاخير.. وعندي مشكلة في السقف والبلكونة الملحقة بالغرفة اللي فيها السقف محل المشكلة
1 - السقف مكرش جامد في جزء منه، وجبت مقاول قالي هيكشف ويشوف المشكلة وفعلا لقى سيخ بيتحرك ومش ثابت فقالي الجزء دا محتاج زرع سييخين حديد بطول الغرفة في المنطقة اللي ظاهر فيها التكريش دا. وقالي ان المفروض اشوف لو فيه مشاكل من فوق عند جاري كمان
لما طلعت لقيت ان الغرفة دي عند جاري بينزل فيها ميه من السقف .. ولقيت مفيش بلاط ولا سيراميك اساسا فوق عنده يعني اي ميه اكيد بتسرب وتمشي في السقف خصوصا في الشتاء ولو حتى فكر يغسل الارض اكيد برضه هتنزل ميه في السقف وبالتالي تبوظه.
المقاول قالي المفروض السقف مشترك بينك وبين جارك بمعنى ان لو فيه مشكلة في أساس السقف نفسه يبقى مشتركة بينك وبين جارك (يعني لو قررنا ننزل السقف خالص ونصب من جديد او نزرع اسياخ فالمفروض ان التكلفة بالنص)
لكن تكلفة الضهارة والمحارة والبياض داخل شقتي دي مسئوليتي انا
2 - بالنسبة للبلكونة المقاول بيقولي انها كلها مسئولية جاري اللي فوقيا .. لقيت برضه مفييهاش سيراميك كمان فالمقاول قالي اي ميه طبعا بتأثر على السقف وكل حاجة ولازم تتعزل كويس
بالاضافة ان رأي المقال ان البلكونه متهالكة ولازم تنزل وتتصب من جديد
جاري اللي فوقيا رأيه ان كل المشكلة عندي سواء البلكونة أو السقف وبيقولي اصلح من عندي وكل حاجة هتتصلح ومش هيحصل مشكلة
انا محتاج رأي قانوني و رأي من خبره شخصية في الموقف اللي زي دا المفروض التصرف يكون ازاي
