حكايتى مع النسيان صنى فيس ليفت 2016 بعد سنتين استخدام
بسم الله الرحمن الرحيم
قبل ما نبدا سرد الحكاية عايز اقول انه مش شرط ابدا كل الناس انها تتفق على عربية من حيث العيوب او المميزات العربية دى ناس كتير عابت فيها وناس كتير شكرت فيها
وناس اكتر عابت فيها من غير ما تجربها ولا تركبها وناس كان حظها وحش فى عربية فيها عيوب صناعة وطبعا قفلوا منها
الموضوع هيكون طويل شوية لانى هقول عن فكرة الشراء والبحث عن السيارة المناسبة وبعد كدة تجربتى معاها شخصيا ومحاولات صيانتى ليها بنفسى لما التوكيل بقى بيخرف (اوتو - مودرن) وكل حكايتى معاها من البداية حتى الان ونبدأ على بركة الله
البداية كانت فكرة شراء سيارة اوتوماتيك مكيفة مريحة واقتصادية تنفع داخل المدينة والسفر وتكون منتشرة علشان قطع الغيار
الاختيارات كانت (بى واى دى l3 - بيجو 301 - نسيان صنى - نيو اوبترا)
كنت عايز عربية مفيش شكوى منها فى عيوب جوهرية يعنى ماتور او فتيس لان ثمنهم بقى نص تمن العربية
بغض النظر عن العيوب فى الموديلات السابقة اخترت الصنى لعدة اسباب منها على سبيل المثال
1- عربية عملت انتشار كويس يعنى قطع الغيار متوفرة
2- صالون واسع وشنطة واسعة
3- العيب اللى ظهر فيها كان عيب فى قطع الفرامل (تيل - طنابير) مش جوهرى والمصنع غير انواع القطع دى اللى كان بيركبها بانواع انظف
4- عالية عن الارض علشان المطبات وكمان ماتور 1500 موفر فى البنزين
5- شكل مش جذاب اوى بس فى الفيس ليفت غيروا شوية حجات بسيطة فرقت شوية وخلت الشكل مقبول
6- واخيرا سعر مناسب وعربية صناعة يابانى (اى نعم هى تايوانى متجمع فى مصر بس تكنولوجيا يابانى)
توكلت على الله واخترت واشتريت ووقع اختيارى على الفئة الثانية
رخصت ولينت وروحت توكيل مودرن ابو رواش لصيانة 1000 كيلو متر الصيانة وقتها كانت بـ 230 جنيه وخرجت وانا مبسوط انى اخترت عربية صيانتها معقولة
تجربتى مع العربية فى القيادة كانت عادية انا مش هواه القرص واللعب الكلام ده السحب طبعا كان بيتحسن مع كل كيلومتر بتمشيه العربية لحد ماتقريبا الاداء ثبت بعد ما قطعت 15000 كيلومتر
سفر وداخل المدينة استهلاك البنزين كان من 13إلى 14 كيلومتر فى لتر البنزين الواحد (ركزوا فى معدلات الاستهلاك) بس قبل صيانة ال15000 المعدل قل لـ 9 إلى 10 كيلومتر لكل لتر ودى حاجة غريبة مع انها بتمشى نفس الطريق ونفس طريقة القيادة ومن غير تكييف المهم رحت صيانة الـ 15000 شكوا فى كلامى طبعا وان العربية مستحيل تمشى من 13 إلى 14 كيلومتر فى اللتر (مش عارف ليه الصراحة)
المهم سجلوا الشكوى وقلت انى عايز انظف البوابة وطبعا زودوا مصاريف الصيانة علشان انا اللى طالب المهم اتكلفت حوالى (390 جنيه ) بدون غيار زيت والعربية اتعدلت ورجعت زى ما كانت ودى كانت اخر صيانة فى مودرن موتورز ابو رواش
وفضلت العربية ماشية كويس حتى كانت الحادثة الاولى بسبب غباء التوكيل
ليه بقى علشان البهوات مش هاين عليهم يفكوا الطنابير الخلفية ينضفوا الرايش بتاع الفرامل ويشدوا الفرامل الخلفية فطبعا كفاءة الفرامل قلت ده بالاضافة انى انا مش غلطان بسبب ان اللى قدامى خبط فى تريلا ووقف فجأة وانا لبست فيه من ورا
المهم بعد التصليح روحت لورشة كنت بتعامل معاها وقلت له عايز اكشف كشف كلى على الفرامل طبعا فكينا الطنابير الخلفية ونظفنا كويس جدا وكانت النتيجة ممتازة والفرامل كفاءتها ارتفعت جدا
وكان الكلام ده كله عند 20000 كيلومتر
المهم انا مشاويرى كتير وساكن فى اكتوبر وشغلى فى التجمع يعنى بهدلة ومرمطة للعربية
لما قربت على صيانة الـ 30000 قلت اغير مركز الصيانة فروحت لاتو ايجيبت ابو رواش والصراحة انظف بكتير من مودرن العربية كان بدأ فيها صوت خشانة من البلى الخلفى واتغيرت جوة الضمان
وليا ملاحظات على الصيانة بس هتكون فى وقتها
والامور عادية وبدون مشاكل وبدون تغيير اى حاجة فى العربية حتى تيل الفرامل لحد ما جه وقت صيانة الـ 40000 والكلام ده كان بعد تعويم الجنيه لقيت الصيانة هتتكلف 4000 جنيه
فكان القرار انى هستغنى عن الضمان وهبطل اعمل صيانة فى التوكيل إلى الابد ودى كانت اصعب خطوة مع العربية حتى الان
المهم عملت صيانة للعربية بنفسى غيرت زيت الماتور ودوخت على طريقة تغيير زيت الفتيس وغيرته بنفسى وجبت سير المجموعة وفلتر هواء جديد
ركبت فلتر الهواء وشلت السير معايا فى العربية لانى لقيت حالة السير مرضية ومش محتاج يتغير
كان وقتها البنزين بـ 3.5 جنيه وطبعا كان منتظر انه يغلى تانى
فاخذت اصعب قرار اخذته مع سيارتى حتى الان وهو انى احولها للعمل بالغاز الطبيعى وكانت المعركة الكبرى مع كل اللى حواليه (اتهامات بالجنون - انتى مستغنى عن عربيتك - الخ ...)
المهم اتخذت القرار وحولت العربية غاز فى كار جاس شهر فبراير 2017 بالقسط على سنة وكان فيه جهاز ناقص فى الطقم اسمه ستاب ركب فى ابريل بس العربية كانت ماشية غاز عادى بس السحب كان تقيل شوية (طبعا كنت برقص لما البنزين غلى)
نيجى بقى لحالة العربية بعد تركيب الغاز الطبيعى عيوب ومميزات
1- طبعا الاسطوانة كلت جزء من شنطة العربية والعربية وطيت على الارض بقدار 2سم تقريبا
2- تسارع العربية على الغاز ابطا من البنزين بس انا مش بحارب بالعربية فالموضوع مفرقش معايا كتير
3- طقم الغاز الحديث بيخلى العربية تدور دايما بنزين لحد ماتسخن وبعد كدة بيقلب غاز اوتوماتيك بدون تدخل منك
4- ممكن تمشى العربية غاز اول بنزين زيى ماتحب وبراحتك والعربية هتمشى بدون اى معقوقات تذكر
5- العربية كان معدل الاستهلاك فى البنزين كان متوسط من 13 إلى 14 كيلومتر لكل لتر داخل المدينة وطريق سريع اما فى الغاز النسبة بقت من 14 إلى 17 كيلومتر لكل متر مكعب من الغاز الطبيعى
ولو ماشى طريق سفر معدل البنزين كان 15 كيلومتر لكل لتر مع الغاز اصبح 21 كيلومتر لكل متر مكعب من الغاز وده معناه توفير ضخم طبعا
الحمد لله انا مرتاح مع العربية حتى الان وصلت لـ 65000 كيلومتر
غيرت تيل الفرامل بتاع المصنع على 55000 كيلو
ملاحظاتى على التوكيلات وده اللى خلانى اطلع برة الضمان
1- كنت بسمع طقة لما اجى افتح الباب اليمين وقلت هيعملوها فى التوكيل روحت التوكيل مرتين ونبهت على الموضوع ده ولم يتم عمل اى شئ فى النهاية كانت مفصلة الباب مفكوكة وربطها بنفسى
2- فيه صوت غريب بيظهر فى العريبة لما اشغل التكييف تحس ان الشكمان مش مربوط كويس وبرضة التوكيل معملش فيهم حاجة خالص وعرفت بعد كده انه بلية شداد السير تتغير وانا بغير السير
3- مواعيد مش مظبوطة وتاخير وقعدة على الفاضى وقطع غيار مبالغ فى ثمنها وعايز يغير اى حاجة وخلاص علشان يبيع
فى نهاية قصتى اتمنى ان اى حد لديه استفسار او سؤال او اضافة لايتاخر علشان الفائدة تكون لكل الناس
