تقرير ملخص لتجربتى لامتلاك موتوسيكل ريس واسكوتر وكروزر

انا من محب الموتوسيكلات
هتكلم من واقع امتلاكى ل3 انواع مختلفه من الدراجات الناريه
هتكلم عن المميزات الرئيسيه فقط لكل نوع

اولا: الريس
امتلكت كوازاكى نينجا 250 س س
دا موتوسيكل للموبتدئين فى مجال السرعه
مميزاته تسارع- وتوجيه- خفيف الوزن

ثانيا: اسكوتر
امتلكت زنين 250 س س
مميزاته- اوتوماتيك سهل فالزحمه- اكبر سعه تخزين- اقل حراره تتنقل من المحرك لرجلك

ثالثا: الكروزر
امتلكت هوندا شادو 400
مريح جدا فالمسافات الطويله والمطبات- ثقيل وراسلى- الاحساس بالامان

دى اهم المميزات- فى طبعا مميزات تانيه لكن دى اللى بتميز النوعيه دى من التصميم
فى عيوب طبعا زى استهلاك البنزين فالريس والكروز


لكن مشاركتى اليوم هدفها مساعده المقبلين على الشراء ولهم خلفيه محدوده للموتوسيكلات
اهم حاجه فالشراء انت عايز ايه من الموتوسيكل

عايز خفه وعمليه فالتنقل داخل البلد؟
عايز تقطع بيه مسافات طويله؟
عايز اداء رياضى وشقاوه؟

مفيش بايك هيديك كل حاجه- متحاولش

حاجه تانيه بالنسبه لشراء موتوسيكل مستعمل

فالمعروض احسنهم فالحاله هى الموتوسيكلات الكروزر, ليه ؟عشان هى ثقيله ومش بتاعت جرى- اصحابهم بيحترموا موتوسيكلاتهم - بيعملوا صيانه -بيحافظوا عليه- سعرها متوسط
مواتيرها الv معمره اكتر من الريس الاربعه سيليندر

على عكس الريس- بتاعت جرى وشقاوه- موتوسيكلات ملعوب فيها كتير- قليل قوى لما تلاقى حاجه نظيفه
اخيرا الاسكوترز- قريبين من الريس- اقلهم مصاريف

الكروزر او الكاستم كما يطلق عليه هو اكثرهم راحه على السرعات العاليه والمسافات الطويله
عيب مهم لازم اوضحه الكروزر هى الفرامل
بسبب ثقل الموتوسيكل +250 كم الفرامل ليست بكفائه الريس
الاسكوتر فالنص
لكن لمحبى الاستمتاع بالطريق الكروزر احلاهم
بسبب ثقله - مبتحسش بالهواء - الموتوسيكل ثابت على الطريق جدا

فيه استايل فالنص مابين الكروزر والريس وهو ال Naked bike
زى الهوندا الهورنت
الهورنت بتجرى وبتفرمل وتاخد ملفات احسن من الكروزر لكن اقل من الريس
الهورنت اريح من الريس
عشان كدا تلاقى اقبال على الهوندا هورنت- قادره تنافس الاثنين

لكن هرجع وهقول مش هتلاقى بايك بيديك كل حاجه

فى ميزه انا شايفها فالكروزر وهى بسبب حجمه الكبير فهو ملفت للنظر
فبتلاقى قائدى العربيات بيخدوا بالهم منك
مش بيستهيفوك زى الاسكوتر

بالاسكوتر تلاقى العربيات بتكسر عليك بغشوميه
بالكروزر تلاقيهم بيتفرجوا عليك :)

الحجم حلو فانه ملفت لكن مش سهل فالمناوره والحتت الضيقه

عن تجربه
الكروزر مش بتاع جرى- الشادو ال400 اللى معايا اقصى سرعه جبتها بيه 120
على السرعه دى بتلاقى الرعشه بتزيد واحساسك انك قارص على الموتور

انسب سرعه ليه 90 كم/س- بيكون ماشى سلس وتحس ان الموتور مسترييح

سالت واحد معاه شادو 750 على اقصى سرعه- قلى 140
وانسب سرعه ليه 110

سالت واحد قريبى معاه VTX 1300 cc اقصى سرعه جابها 160- بيقول كان ممكن يجيب تانى لكن الهواء كان جامد جدا

وانا على الدائرى ماشى 90 ممكن الاقى واحد بموتوسيكل صينى 150 سى سى طالع منى
فالاول كنت مضايق- يعنى ايه موتوسيكل صينى ثمنه ربع ثمن اللى معايا واسرع منه
كل حاجه وليها ثمنها
كل حاجه وليها اسلوب استخدام

اه الصينى اسرع لكن عمره اقصر
الصينى مش ممتع على السرعات العاليه
الصينى مش مرييح على السرعات العاليه
الصينى مش ماسك فالارض زى الكروزر

لو عايز حاجه بتجرى متجبش الكروزر
الكروزر معمول عشان تستمتع بالطريق والقعده والانتخه
مواتير الكروزر معمره وحماله قسيه وبتسامحك فالنقلات- يعنى لو نسيت نفسك على النقله الرابعه وهديت وحبيت تطلع تانى ممكن يجيب معاك من غير متنقل لنقله اوطى

مقارنه بين الموتوسيكل والعربيه (لمالكى السيارات وناويين يجيبوا موتوسيكل / اسكوتر) اليكم بعض النقاط المهمه :

1. الركنه: الموتوسيكل بيتبهدل اسرع من العربيه بسبب الركنه- كلاب وقطط وتراب- وعيال هتلعب فيه- الركنه مهمه
2. الراحه- الموتوسيكل مش اريح من العربيه- انت طول الوقت بتستخدم رجليك واديك- عكس العربيه ممكن تريح اى واحده فيهم
3. الاكل والشرب بيكون اصعب من العربيه
4. الخوذه خنقه لكن ضروريه- مش هتعرف تهرش
5. الميه - سهل تتغرق وتوسخ هدومك وانت راكب موتوسيكل
6. الرعشه- الموتوسيكل فيه رعشه
7. الحراره- هتحس بحراره طالعه من المحرك مابين رجليك
8. الصيانه على فترات اقصر من العربيه
9. التموين على فترات اقصر من العربيه بسبب صغر حجم التنك وليس الاستهلاك العالى للبنزين
10. التحضير للمشوار بياخد وقت اكتر من العربيه- يعنى فالعربيه انت بتنزل المساحات وتطلع- الموتوسيكل بتشيل الغطاء- وتسخن- تلبس الجير (ركب- خوذه-جوانتى) ممكن معاك شنطه على كتفك- تفك جنزير- تنظف الكرسى من التراب
ممكن تاخد 10 دقائق على الاقل تحضير على عكس العربيه


انا مش قصدى اعقدكم من الموتوسيكل لكن هى دى الحاجات اللى بفتقدها فالموتوسيكل بالمقارنه بركوب العربيه

طبعا فى مميزات لكن حط فى بالك فى فرق واضح- ان شاء الله يكون الموضوع مفيد عشان محدش قلى على الحاجات دى لما اشتاريت اول موتوسيكل لى

فى حاجه تعبانى من الشادو
انا عندى مشاكل فى ظهرى- والفقرات دايسه على الاعصاب بتخلينى حاسس بنار او تنميل فرجلى

بسبب ثقل الموتوسيكل لاخظت انى بتعب جدا لما برجع بظهرى بالموتوسيكل عشان بشد البايك جامد للخلف عشان اعرف اطلع من الركنه

ثقل الموتوسيكل فى حالتى عيب مش ميزه

اقتباس:

---

المشاركة الأصلية كتبت بواسطة salam100100

مقارنه بين الموتوسيكل والعربيه (لمالكى السيارات وناويين يجيبوا موتوسيكل / اسكوتر) اليكم بعض النقاط المهمه :

1. الركنه: الموتوسيكل بيتبهدل اسرع من العربيه بسبب الركنه- كلاب وقطط وتراب- وعيال هتلعب فيه- الركنه مهمه
2. الراحه- الموتوسيكل مش اريح من العربيه- انت طول الوقت بتستخدم رجليك واديك- عكس العربيه ممكن تريح اى واحده فيهم
3. الاكل والشرب بيكون اصعب من العربيه
4. الخوذه خنقه لكن ضروريه- مش هتعرف تهرش
5. الميه - سهل تتغرق وتوسخ هدومك وانت راكب موتوسيكل
6. الرعشه- الموتوسيكل فيه رعشه
7. الحراره- هتحس بحراره طالعه من المحرك مابين رجليك
8. الصيانه على فترات اقصر من العربيه
9. التموين على فترات اقصر من العربيه بسبب صغر حجم التنك وليس الاستهلاك العالى للبنزين
10. التحضير للمشوار بياخد وقت اكتر من العربيه- يعنى فالعربيه انت بتنزل المساحات وتطلع- الموتوسيكل بتشيل الغطاء- وتسخن- تلبس الجير (ركب- خوذه-جوانتى) ممكن معاك شنطه على كتفك- تفك جنزير- تنظف الكرسى من التراب
ممكن تاخد 10 دقائق على الاقل تحضير على عكس العربيه


انا مش قصدى اعقدكم من الموتوسيكل لكن هى دى الحاجات اللى بفتقدها فالموتوسيكل بالمقارنه بركوب العربيه

طبعا فى مميزات لكن حط فى بالك فى فرق واضح- انشاء الله يكون الموضوع مفيد عشان محدش قلى على الحاجات دى لما اشتاريت اول موتوسيكل لى

---

استكمالا:
11. العادم: لما بتكون واقف فالاشاره بتشم ريحه العادم بتاع لعربيات ومبتعرفش تتخلص منه عكس العربيه بتقفل الزجاج
12. صوت الهواء, على السرعات العاليه صوت الهواء بيكون مزعج بالاخص لو بتمشى مسافات طويله
13. فرده الكاوتش اتخرمت- فالعربيه بتركب الاستبن- فالموتوسيكل كابوس- ليها حل لو كاوتشك تيوبلس انا بمشى بباوربانك وكومبريسور جبتهم من سوق دوت كم
14. الرد على المكالمات بيكون صعب- ممكن تجيب الكيت اللى بتركب فالخوذه وهى طبعا غاليه

نفسي اعرف انوع الموتوسيكلات زي بتوع الشرطة مش ريس ومحترم كده الجلسة معتدلة مش مميل لقدام

اقتباس:

---

المشاركة الأصلية كتبت بواسطة د.محمود صلاح

نفسي اعرف انوع الموتوسيكلات زي بتوع الشرطة مش ريس ومحترم كده الجلسة معتدلة مش مميل لقدام

---

تصميمهم اسمه Touring او Supersport touring
موتوسيكلات متصممه انها تكون مريحه وتقدر تشيل
موتوسيكلات تصميمها حلو وبتجمع مابين الريس والكروزر (مريح وبيجرى)
مواتير كبيره 1400 ل1800 س س
فى منها 6 سيليندر - زجاج كهرباء- تكييف- سنتر- فرامل ABS- مارشيدير- سخانات فالمقابض - سخانات فالكرسى- اير باج

عالم تانى من الرفاهيه والتجهيزات

التوب بتاع الموتوسيكلات دى
* هوندا جولد وينج
* كاوازاكى Concource
BMW K1600 GTL

فى منهم فى مصر

معلومه من اصحاب الهوندا vtx 1800 والسوزوكى بوليفارد
الموتوسيكلات دى للسفر فقط
متنفعش داخل المدينه وزحمه الاشارات......... ليه ؟
عشان سخونه الموتور
ملاكهم بيشتكوا من سخونه الموتور مابين رجليهم وان رجليهن بتولع فالزحمه
عشان كدا الموتوسيكلات دى محتاجه طريق مفتوح وسرعه عشان متحسش بالحراره

الvtx 1300 احسن حاجه بسيطه لكن بردوا فى شكوى من الحراره

معلومه جديده عليا قلت اشاركم بيها

امس كنت ماشى على كوبرى شمال طره فالمعادى كنت سايق العربيه
ببص فالمرايه لاحظت واحد راكب موتوسيكل مش عارف بلمه وعمال يعووم منه وراح داخل فى سور الكبرى ووقع وزحف

الحمد لله انه موقعش من فوق الكبرى

وقفت ونزلت وفى عربيت جايه من وراه شافته وقفت وفى خلال ثوانى كان فى بتاع 10 اشخاص حوليه بيقدموا مساعده

المهم الشاب وقف على رجليه كان بينزف من وشه (كان لابس نظاره شمس اتكسرت وهى اللى عملتله جرح جمب عينه
بينزف من ظهر ايديه
البنطلون اتقطع من عند الركبه وبينزف من رجله
دى الحاجات الظاهريه

انا وواحد تانى وقفنا الموتوسيكل وركنته على جمب الطريق- قفلت محبس تنك البنزين

سرعه الشاب لا تتجاوز 30 كم فالساعه
والاصابات متفرقه فى جسمه- اغلبها سحجات

انا بشارك انهاردا عشان انهاردا عرفت قيمه السيفتى جيير
بدون مبالغه الواحد يصرف دلوقتى على السيفتى عشان يوفر قدام تمن العلاج

الخوذه: حمايه للراس
الجاكيت بالتدريع: حمايه من السحجات والزحف على الاسفلت كانه ورق سنفره بتاكل فالجلد- تدريع كتاف وكوع- والعمود الفقرى
الجوانتى: حمايه لكف وظهر اليد والعظم
الركب: للركب والقصبه
الجزمه اللى بتغطى غظمه الانكل مهمه جدا عشان تحمى الغظمه- مهم جدا انها تكون بوت او نص بووت

متوسط الاسعار:
خوزه 1500
جاكيت 3000
جوانتى 600
ركب 600
جزمه 1500

المجموع 7000 جنيه
ثمن مكنه صينى
لكن ال7000 جنيه دول ممكن يعفونى انى اركب شريحه فالعظم وعمليه
يمكن يساعدونى ابات فى بيتى بدل مبات فى مستشفى

انا خفت بعد مشفت الحادثه ونويت التزم واصرف مش عياقه ومنظره

موضوع جميل

اقتباس:

---

المشاركة الأصلية كتبت بواسطة salam100100

استكمالا:
11. العادم: لما بتكون واقف فالاشاره بتشم ريحه العادم بتاع لعربيات ومبتعرفش تتخلص منه عكس العربيه بتقفل الزجاج
12. صوت الهواء, على السرعات العاليه صوت الهواء بيكون مزعج بالاخص لو بتمشى مسافات طويله
13. فرده الكاوتش اتخرمت- فالعربيه بتركب الاستبن- فالموتوسيكل كابوس- ليها حل لو كاوتشك تيوبلس انا بمشى بباوربانك وكومبريسور جبتهم من سوق دوت كم
14. الرد على المكالمات بيكون صعب- ممكن تجيب الكيت اللى بتركب فالخوذه وهى طبعا غاليه

---

استكمالا للفروقات:
15. المجهود البدنى فى سواقه الموتوسيكل اكتر من العربيه (للمسافات الطويله)
16. الاحساس بالعطش واضح (بالاخص فالشمس)
17. المجهود الذهنى والتركيز فى سواقه الموتوسيكل اعلى واكتر من سواقه العربيه
18. المشترايات بتكون غلسه حبيتين - مينفعش اروح اعمل شوبينج ( لو معاك اسكوتر او شنط اجناب/ بوكس هتقدر تشيل )

حاجه افتكرتها
فرق مابين الاسكوتر والموتوسيكل وياريت لو غلط تصلحوها

البطاريه لو نايمه- اقدر ازق الموتوسيكل (المانيوال) وارمى زى العربيه
لكن الاسكوتر (اوتوماتيك) الطريقه دى متنفعش

الكروزرز ارتفعها عن الارض مش كتير
المطبات ممكن تضايق
وطبعا مش هتعرف تطلع فوق الرصيف زى الموتوسيكلات الصينى فالزحمه :)
عو عيب لكن ميزه عشان بيدى الاستايل دا ثبات على السرعات العاليه

تسلم يالغالي..معلومات انا استفدت منها جدا...بس يريت لو في اي معلومات عن استهلاك البنزين .. هل الكروز بتحرق بنزين جامد مقارنة بالبايكات التانية الي في نفس عدد cc

شكرا كثيرا موضوع منسق ومفيد جدا انا بفكر اشتري هوايه واستفت جدا جدا ارجو المزيد

جزاك اللهه خيرا