الموضوع: معدل تغير زيت للتوكتوك

المشاركة الأصلية كتبت بواسطة mohamedmomqq22

السلام عليكم انا عاوز استفسر عن حاجة دلوقتي انا عندي توكتوك و بغير الزيت بنفسي و بستخدم زيت wolf lubes نوع V TWIN 4t 20W50 هل الزيت ده مناسب ولا لا؟ بغير كل الف كيلو
كده تمام ولا لا؟
و هل فيه قسم للتوكتوك في المنتدي الرائع ده؟
وهل في زيوت بتقدمها المتدي يكون ارخص من wolf? و نفس الكفائة؟

حضرتك متأكد إنك بتستخدم الزيت ده في التوكتوك؟؟؟

عموما.. المحركات في الموتوسيكلات (والتكاتك) بتبقى حاجة من اتنين..

محركات ثنائية الأشواط أو محركات رباعية الأشواط...

المحركات ثنائية الأشواط معروفة في الموتوسيكلات من زمان.. وأشهر حاجة معروفة بيها إن الموتور بيشتغل بالبنزين والزيت مع بعض... يعني زيت الموتور بيبقى جزء من احتراق الوقود...

المحركات رباعية الأشواط.. زي الموجودة في 99.9999999% من عربياتنا حاليا..


حسب معلوماتي البسيطة... التوكتوك تقريبا موتوره ثنائي الأشواط...

والزيت اللي حضرتك بتستخدمه للمواتير رباعية الأشواط... ومخصص أكتر للمواتير الـ2-سلندر بشكل حرف V... علشان كده اسمه V Twin

تاني حاجة...
اختيار الزيت بيكون حسب المواصفات المكتوبة في الكتالوج.. مش بمزاجنا نهائي...

ملخص الموضوع..
محتاجين تفاصيل أكتر علشان نقدر نفيدك أكتر..

...

المشاركة الأصلية كتبت بواسطة mohamedmomqq22

شكرا لوقت حضرتك جدا و استفت من حضرتك
بس بحاول ادور علي الكتالوج مش لاقيه خالص هحاول اشوفه عند واحد تاني و اصور الزيت المنصوح بيه فيه
انا بحط ولف ايوة و ده صورته
لقيت زيت تاني موبيل عند موزع زيت موبيل معتمد و ده صورته حضرتك كده بردك لازم تشوف الكتالوج صح؟ علشان تحدد
http://prntscr.com/h9p27y
http://prntscr.com/h9p2cm
http://prntscr.com/h9p2g6
كده الزيت الي هو موبيل ثنائي الاشواط مظبوط؟
مكتوب هنا رباعي الاشواط
ننشر الاشتراطات والأوراق المطلوبة لترخيص " التوكتوك" في بني ...مصراوى
معني كده لازم زيت ؟vtwin
اللزوجة 20w50 شوفتها في الكتالوج متاكد منها
بس يعني ايه 4t لو سمحت؟

المشاركة الأصلية كتبت بواسطة mohamedmomqq22

حضرتك عندك فكرة التوك توك ماتوره 2 سلندر ولا لا؟
و لو هو مش 2 سلندر عادي احطه للتوكتوك؟
متشكر جدا متعرفش حضرتك استفادت من حضرتك ازاي
جزاك الله خيرا

​عملتلك بحث صغير على النت... وحسب ما فهمت من البحث لقيت:

التوكتوك الـباجاج RE60.. موتوره رباعي الأشواط.. واحد سلندر بسعة 200 سي سي.. بيطلع بين 10 إلى 11.4 حصان حسب نوع الوقود المستخدم (بنزين/غاز/غاز طبيعي)

https://www.globalbajaj.com/global/e...pecifications/

بالنسبة لكلمة 4T.. فـ دي معناها رباعي الأشواط.. لإن الزيوت المخصصة للمواتير ثنائية الأشواط مكتوب عليها 2T.

وطلعلي في البحث على جوجل شوية صور لكتالوجات موتوسيكلات باجاج... بس ما لقيتش للأسف حاجة تدل على التوكتوك RE60

عموما.. كلهم كاتبين معدل تغيير الزيت كل 10 آلاف كيلومتر.

دي الصورة اللي قدرت أجيبها:



طبعا دي من كتالوج موتوسيكل تاني من إنتاج باجاج بردو... بس تقريبا هتلاقي نفس المواصفات عندك (والله أعلم)..

كده مبدئيا حضرتك الزيت اللي حضرتك بتستخدمه شغال... بس خلينا نتأكد من مستوى الأداء المطلوب في الكتالوج.. لإن المستوى المطلوب في الصورة دي يعتبر عالي شوية (API SL)

الزيت اللي حضرتك بتستخدمه مستواه API SG... لو المستوى ده أقل من المطلوب في الكتالوج يبقى ندور على زيت أحسن...

للأسف صورة زيت موبل اللي حضرتك رافعها مش باين فيها أي حاجة عن مستوى الأداء.. وأتوقع إن المعلومات دي موجودة في الجزء الأزرق في شمال الصورة (عند نور الفلاش)..




في انتظار معلومات الكتالوج.

...