الموضوع: عيوب خطيره في فولفو Volvo S80, S60, V40 وكل الموديلات بداية من 2011 لحد 2015

السلام عليكم ورحمة الله وبركاته

للاسف تم تاكيد وجود عيوب خطيره جدا فى جميع موديلات فولفو بداية من عام 2011 حتى عام 2015
(يعنى موديلا 2011 و 2012 و 2013 و 2014 و 2015)

طبعا كل الناس عارفه ان شركة فولفو كانت من افضل شركات السيارات فى العالم وكانت بتنتج افضل السيارات فى عوامل الامان والتصميم والكماليات
وعشان كده انا شخصيا حزين جدا انى بكتب البوست ده وحزين جدا ان شركة فولفو وصلت للحالة السيئه دى

بداية الموضوع الكارثي ده كان فى سنة 2010 لما شركة جيلي الصينية اشترت شركة فولفو
طبعا كان وقتها خبر حزين جدا لكل محبي سيارات فولفو..
وسبب الحزن الاكبر مش عشان ان فولفو تم بيعها لشركة صينية فقط
لكن سبب الحزن الاكبر وقتها كان تخوف كبير من ان شركة جيلي متقدرش تتعامل مع تكنولوجيا متطورة زى تكنولوجيا فولفو
وللاسف اتضح ان التخوف ده كان صحيح وكان فى محله : (

شركة فولفو الان فى موقف كارثي نتيجة ادارة شركة جيلى الصينية لشركة فولفو

فى معلومات اكيده ان كل العربيات الفولفو الى نزلت خلال الفتره من 2011 لحد 2015 موجود فيها عيوب خطيره فى الماتور
وده تقريبا موجود فى كل الموديلات بلا استثناء سواء كانت s80 او s60 او v40 او اى موديلات اخرى

سبب المشكلة الحقيقي ان كل العربيات دى نزلت بمواتير اسمها t4 و t5 واتضح ان المواتير دى فيها عيوب خطيره فى التصميم
فى بداية المشكلة من سنوات قليله كان التوكيل فى مصر بينكر وجود مشكلة فى الماتور وكان بيتحجج ان المشكلة فى البنزين
وبعدها التوكيل اتحجج ان المشكلة بسبب تحديثات فى السوفت وير, لكن استمرت المشكلة فى الزياده بعد تحديثات السوفت وير
وفى النهاية بعد تضخم المشكلة بدرجة كبيره, بدأ ينتشر السبب الحقيقى للمشكلة وهو عيوب خطيره فى تصميم الماتور

مواتير ال t4 كانت 1600 cc تربو وبتولد 180 او 200 حصان مثلا حسب موديل العربيه
وكان تصميم الماتور سىء جدا لدرجة ان التربو كان اقوى بكتير من ان يتحمله الماتور ال 1600 سي سي
فكانت النتيجه ان التربو بيسيح سبايك الماتور من الحراره العاليه والماتور بيتحرق وبيبوظ
وبالفعل كتير من الملاك باظ عندها الماتور خلال عدد كيلوهات اقل من 50 الف كيلو
وبعض الملاك باظ عندها الماتور خلال عدد كيلوهات اقل من 10 الاف كيلو للاسف كمان !!

عربيات الفولفو زمان كان ماتورها بيستمر عشرات السنين بنفس حالته !!
انهرده بعد امتلاك شركة جيلى الصينية لشركة فولفو وصل الحال بالشركة ان الماتور يبوظ ويتحرق خلال فترات لا تتجواز العام الواحد !!
والكارثه كمان ان عيوب تصميم الماتور كانت مش مقتصره على الماتور فقط..
دا كمان مأثره بدرجة كبيره على الفتيس وعلبة الدريكسيون كمان
وكتير من الملاك بالفعل باظ عندهم الفتيس وعلبة الدريكسيون بالاضافه للماتور !!

انا شخصيات فى وقت من الاوقات كان هيتضحك عليا من احد الملاك وكنت هشترى عربيه من العربيات دى
كنت وقتها مش عندى معلومات واضحه و اكيده عن حجم المشكلة وطريقة تعامل التوكيل معاها
لكن بعد مكتشفت ان المشكلة كبيره جدا ومنتشره بدرجة كبيره جدا فى مصر كان امانه انى لازم اكتب البوست ده واوعى الناس واحذرهم

خلال الفتره الى فاتت كان التوكيل بيحتوى الموقف بانه يغير الماتور البايظ للملاك بماتور جديد مجانا على حساب التوكيل
لكن الكارثه ان التوكيل كان بيغير الماتور ال t4 المعيوب بنفس موديل الماتور ال t4 تانى بدون تغيير وبدون علاج المشكلة
وده بيرجح ان شركة فولفو الام وكمان التوكيل فى مصر مش عندهم حل للمشكلة الخطيره دى لحد انهرده
والكارثه الاكبر ان فى عربيات فولفو غيرت ماتور مرتين و 3 مرات خلال فتره لا تتجاوز 4 سنين

ومش بس كده, ده كمان التوكيل بيركن العربيات البايظه عنده فترات تصل ل 9 شهور لحد ميتم استيراد مواتير جديده
تقريبا كان التوكيل عنده امل ان العربيات المعيوبه تخرج من الضمان بسرعه ومحدش يتكلم عن المشكلة قبلها

السؤال الذى يطرح نفسه الان..
ماذا بعد خروج السيارات المعيوبه دى من فتره الضمان الى كانت 5 سنوات ؟

الاجابه ان بمجرد خروج العربيات دى من الضمان هتلاقى كل مالك عربيه محتاج يشترى ماتور جديد كل كم شهر بمبلغ 150 الف جنيه او اكتر !
وده السبب ان كل الملاك تقريبا عارضه عربيتها للبيع على اولكس وبتخلصو منها دلوقت !!
لان كل الملاك كانو بيغيرو ماتور ببلاش خلال فترة الضمان
لكن بعد العربيات دى متخرج من الضمان كل مالك هيشترى ماتور جديد على حسابه الشخصي !

انا حزين والله فعلا انى بكتبه بوست زى ده على براند كبير جدا زى فولفو
لكن دى امانه وكان لازم اكتب واحذر الناس عشان محدش يتضحك عليه
لان فى كتير من الملاك مش عندهم امانه فى البيع ومش بيقولو للمشترى عن عيوب العربيه الخطيره دى عشان يقدرو يبيعوها ويخلصو منها !

احذرو يا جماعه من شراء اى عربيات فولفو انتاج موديلات 2011 لحد 2015 بسبب عيوب الماتور
اكيد مفيش حد فينا عاوز يدفع مبلغ من 300 ل 500 الف جنيه فى عربيه مستعمله ويتفاجىء بعد شهور قليله انه لازم يشترى ماتور جديد ب 150 الف جنيه !

فى نهاية البوست اتمني ان شركة فولفو توفر حل حقيقى للمشكلة فى المستقبل
واتمنى ان التوكيل فى مصر يحترم اسم البراند الكبير الى معاه ويعترف بالمشكلة ويواجهها بدل مهما مستنين العربيات تخرج من الضمان عشان يخلو مسئوليتهم !

رجاء المشاركه والتعليق من كل الساده الخبراء لنشر الفائده للجميع بخصوص الموضوع الخطير ده

شكرا لحضراتكم