صوت صفير وريحة حرق عند سرعة 140
السلام عليكم
دي أول مشاركة ليا معاكم فأحب اولا اشكر السادة القائمين على المنتدى الرائع ده واحيي كل اعضاؤه الكرام واشكرهم على مجهودهم الرائع وحبهم في مساعدة الآخرين.....
وليا استفسار بعد اذنكم لو تكرمتم تفيدوني فيه لأني قلقان من ساعة ما حصل الموضوع ده مع عربيتي...
انا معايا عربية byd موتور ميتسوبيشي ماشية تقريبا لحد دلوقتي حوالي 28000 كم بس...ومن كام يوم كنت راجع بيها من السنبلاوين للمنصورة وكنت مستعجل فسرعت بالعربية لحد ما جبت بيها 140 كم/س وهي بصراحة كانت معايا زي الفل وماقصرتش في حاجه بس اول ما وصلت للسرعة دي شميت زي ما يكون ريحة حاجة بتتحرق او بتسيح وسمعت صوت زي التصفير... ففورا نزلت بسرعة العربية لحد 100 او 90 كم/س وراحت الريحة وماعدتش فيه صوت التصفير بس انا من ساعتها وانا قلقان ليكون في حاجة حصلت في العربية او الموتور وممكن تسببلي مشاكل في المستقبل ومتردد اروح لميكانيكي واشرحله الموقف ليعملي الحبة قبة عشان ياخد مني فلوس وخلاص... فأرجو من سيادتكم افادتي بالضبط في اقرب وقت عشان اخرج من القلق ده ولكم جزيل الشكر