ازاي احدد نوع الزيت واطبقه مع الواقع

**احمد33227** · 10-01-2018 08:38 PM

السلام عليكم لكل اعضاء القروب
صراحه ان فرحان جدا ان اخيرا قدرت اسجل ده اول موضوع ليا ومتاكد ان اهل الخبرة هنا كتير وقريت موضوع كبيرة جدا لدرجة ان معتش فاهم حاجه ندخل ف الموضوع ومعلش ع الاطاله
انا معايا كيا سيراتو 2016 ماشي 55الف تقريبا بقالها حوالي سنه ولسه من كم يوم أكتشفت ان الزيت اللي بغيره ليها اللي هو كاسترول 10w30 مش بتاعها وان توتال كوارتز هو بتاعها ومرسوم ف الكتالوج بس مكتش شايفه المشكلة ان اول تغيير زيت ليا كان ف الوكالة.وهما بنفسهم غيرو كاستىول وانا اخدتها قاعده ومشيت عليها ومش عارف اعمل ايه ولم قرات عن انواع الزيوت اكتشفت ان انا بستعمل زيت sl بيجي بعده sm وبعده sn وبصراحه خايف اغير حاجه لان قريت ردود ان فيه حجات بتبوظ لو غيرت من زيت معدني لزيت تخليقي وخلوصات المحرك وزي كده ومتحير جدا وللعلم السيارة ع الضمان لحد 100الف وبغير ف بترومين عشان الضمان هنا بيقع لو غيرت ف اماكن مش معتمده واسف ع الاطاله وبصراحه حاسس انكم ناس فاهمين عن دراسه وعلم وتجربة وكل الشكر للقائمين على المنتدى من اكبر اداري لكل الاعضاء
ودي صورة اللزوجة من الكتالوج
https://c.top4top.net/p_73802kx51.png

**borio1704** · 10-01-2018 09:24 PM

الأهم من الصفحة اللي حضرتك حاطتها هي الصفحة اللي قدامها اللي فيها مستوى جودة الزيت المطلوب...

وبعدين مين قال لحضرتك إن الزيت اللي بيتحط في العربية مش بتاعها؟؟؟؟؟

الماركة ماهياش مواصفة زيت..

حط أي ماركة زيت مهما كانت... المهم يكون الزيت بالمواصفات المطلوبة.

ولو عايز زيت ممتاز للعربية فعلا ومتوافق تماما مع طلبات الكتالوج... حط بترومين سوبر سنثتيك A-1 بلزوجة 5W-30.

وما تقلقش... مفيش حاجات بتبوظ لما تغير من معدني لتخليقي إلا لو كانت العربية عمرها طويل... ومهياش حاجة جامدة اللي بتحصل... ده مجرد تسريب زيت..

ومفيش حاجة اسمها خلوصات بتوسع والكلام اللذيذ ده... إلا لو حضرتك بتحمل الموتور بأحمال عالية باستمرار مع استخدام زيوت بلزوجات خفيفة

ادخل هنا لو عايز تفهم صح..
https://www.nilemotors.net/Nile/341680-a.html (القواعد الذهبية لاختيار زيت العربية.... موسوعة مبسطة لأساسيات زيوت المحركات)

...

**احمد33227** · 11-01-2018 07:27 AM

معلش عشان من الموبايل مش عارف ارتب كل الكلام
بالنسبة للزيت بتاعها اهو اللي ف الكتالوج زي ماقلت حاطين النوع مش عارف قصدك ده اسوأ نوع اشتغل عليه زي الموضوع
تاني حاجه
اللزوجة اللي حضرتك بتقول عليها مش ف الكتالوج يعتي مشفتش 5w30 وبتهيالي انت قلت الخلطات نحذر منها افضل
اهو حاجه بالنسبة للموتور والتشغيل وقت وقوف السيارة بروح مشاوير الصبح بعدين ارجع اوقفها خالص وتبرد وارجع اروح واجي واوقفها وتبرد والمغرب نفس الحكاية والساعه 9 يعني بستعملها كتير بس على فترات
اما بالنسبة

مجرد تسريب زيت

كده تسريب زيت والسيارة جديده وع الضمان ده مشكلة كبيرة فعلا
غير ان احتمال يلغي الضمان

**borio1704** · 11-01-2018 08:23 AM

المشاركة الأصلية كتبت بواسطة احمد33227

معلش عشان من الموبايل مش عارف ارتب كل الكلام
بالنسبة للزيت بتاعها اهو اللي ف الكتالوج زي ماقلت حاطين النوع مش عارف قصدك ده اسوأ نوع اشتغل عليه زي الموضوع
تاني حاجه
اللزوجة اللي حضرتك بتقول عليها مش ف الكتالوج يعتي مشفتش 5w30 وبتهيالي انت قلت الخلطات نحذر منها افضل
اهو حاجه بالنسبة للموتور والتشغيل وقت وقوف السيارة بروح مشاوير الصبح بعدين ارجع اوقفها خالص وتبرد وارجع اروح واجي واوقفها وتبرد والمغرب نفس الحكاية والساعه 9 يعني بستعملها كتير بس على فترات
اما بالنسبة

أنا معايا سيراتو 2014 ومقيم في جدة ...

الكتالوج عندي مختلف شوية عن الكتالوج بتاعك... والميزة فيه إني أقدر أستخدم لزوجة 5W-30 بمنتهى الراحة... ومش بس كده.. ده اللزوجة دي هتلاقي فيه منها زيوت محققة كل طلبات الكتالوج...

إنما لزوجة 5W-40 مش موجود منها أي زيوت بتصنيف A5 !!!! ولا هتلاقي لزوجة 5W-40 عليها تصنيف ILSAC GF-4 أو GF-5!!!!

والكتالوج كاتب (في رقم 1 تحت الرسم) إنك تستخدم لزوجة 5W-30 لمنطقة الشرق الأوسط

أنا أتوقع إن الكتالوج فيه غلطة مطبعية... والمفروض تتكتب كده:

"لتوفير الوقود بشكل أفضل، يوصى باستخدام زيت المحرك ذي درجة اللزوجة المعتمدة من جمعية مهندسي المركبات SAE 5W-20 (باستثناء منطقة الشرق الأوسط ومحرك T-GDI) أو 5W-30 (لمنطقة الشرق الأوسط)."

ارجع للكتالوج الانجليزي واتأكد من الصفحتين دول

دول الصفحتين بتوع الكتالوج بتاعي... ماكانش موتور الـT-GDI نزل...

المشاركة الأصلية كتبت بواسطة احمد33227

كده تسريب زيت والسيارة جديده وع الضمان ده مشكلة كبيرة فعلا
غير ان احتمال يلغي الضمان

تسريب الزيت بيحصل في حالة محددة....

إن العربية تكون قديمة بمعنى إن بقالها أكتر من 7 سنوات فالجوانات والأويلسيلات بتاعت الموتور بتكون استهلكت وشرّخت ولازم تكون شغال بزيت معدني طول الفترة دي... ولازم لما تغير تكون بتغير لزيت تخليقي "حقيقي".. لإن 95% من الزيوت التخليقية في السوق عبارة عن زيوت معدنية معدلة بتكنولوجيا تخليقية...

لازم الـ3 حاجات دول مع بعض..

غير كده مفيش تسريب بيحصل... وحتى لو حصل فالحل معروف...غيّر جوانات وأويلسيلات الموتور.. صحيح فيه بعض الأويلسيلات محتاجة غلبة علشان تتغير.. بس الموضوع مفيهوش فتح موتور ولا حاجة خطيرة.

عموما.. التسريب مش بيأثر على أداء الموتور إلا لو كنت مش متابع والزيت نقص خالص...

آخر حاجة...

مفيش ضمان بيتلغى في السعودية علشان محطيتش زيت من عند التوكيل... روح غير زيت من أي مكان.. والصيانات بتاعت الزيت مش لازم تعملها في التوكيل..

يمكن الحاجة اللي ممكن تطلع العربية من الضمان هي إنك تفوت الصيانات الكبيرة.. الـ20 - 40 - 60 - 80 ألف

غير كده الصيانات اللي في النص دي مش أكتر من غيار زيت وفلتر..

أنا بطلت أغير زيت في "الجبر" من حوالي 3 سنين.. وفعليا بطلت أروح التوكيل إلا في صيانات كل 20 ألف كم أو لما يكون فيه عطل في الضمان... والعربية ماشية أكتر من 90 ألف ولسه في الضمان :)

وبستخدم الزيت ده:

...

**احمد33227** · 11-01-2018 09:08 AM

معلش تحيرت اتا يعني انا كتالوج سيارتي مفهمتش ايه اللي استخدمه مع انه كاتبsm** بعدين تحت خالص قال لو مش متوفر استعمل sl

**احمد33227** · 11-01-2018 11:03 PM

معلش تاخرت على حضرتك فعلا زي ما قلت فيه غلط ودي الصورة من الكتالوج الانجليزي

**borio1704** · 12-01-2018 02:14 AM

المشاركة الأصلية كتبت بواسطة احمد33227

معلش تحيرت اتا يعني انا كتالوج سيارتي مفهمتش ايه اللي استخدمه مع انه كاتبsm** بعدين تحت خالص قال لو مش متوفر استعمل sl

مستوى الجودة api sm المطلوب في الكتالوج غالبا مش موجود في الزيوت المعدنية.. إنما أعلى حاجة موجودة في السوق بسهولة هي sl...

واللي أعرفه إن المستوى ده مش موجود غير في أحد زيوت التعاون في مصر... اسمه xpl-sm بلزوجة 20w-50... وده الوحيد قي الشرق الأوسط...

طبعا هما عارفين إن العربية موجهة لأسواق ممكن ما يكونش فيها زيوت تخليقية... وكمان نوعية الزباين اللي حيشتروا العربية.. وأصلا أصلا العربية منتشرة كسيارة إيجار وتاكسيات... وكل دول مش هيحطوا زيوت تخليقية...

عموما.. الاختيارات متاحة قدامك... بس أنا أفضل الالتزام بمواصفات الجودة المكتوبة في الكتالوج مجتمعة...

بمعنى إن أفضل زيت هو اللي يكون مكتوب على علبته مواصفات api sm أو sn ولازم يبقى كمان واخد تصنيف ilsac gf-4 أو gf-5
أو يكون واخد تصنيف acea a5

والأفضل كل دول مع بعض... علشان كده أنا بستخدم بترومين a-1... وراجع المواصفات المكتوبة على ظهر العلبة في الصورة اللي أنا حاططها.

...