طرق جديدة للشحاتة

**Amrrr** · 16-12-2008 11:04 AM

المشاركة الأصلية كتبت بواسطة abo_hosni

و إيه رأيك أنه ممكن يطلع نصاب كمان؟ يخليك تتلفت له و تكلمه و ييجي واحد تبعه من يمينك يسرق أي حاجة يلاقيها (من موبايل على التابلوه أو جنب الفتيس أو شنطة على الكرسي) و انت مسلم كل حواسك للي على شمالك و بيكلمك

نصيحة و انت ماشي في شوارع المحروسة:
1- ماتسيبش الزجاج مفتوح عالبحري
2- اقفل السنتر
3- ما تردش على حد
4- ما تسيبش حاجة في العربية

لا أدعي الحرص بس أنا باعمل كده فعلاً بعد ما حصلت مواقف كده مع عمي و صديقي

+11111111111111111111111

**amrtalaat** · 16-12-2008 02:12 PM

فية سواق تاكس 125 يوميا موجود عند عمارات الاوقاف فى المهندسين اخر شارع وادى النيل عشان دة مكان بتركن فية عربيات كتيير.... وقابلنى فوق ال 5 مرات فى شهرين ....وهو تخين وعينية ضيقة وماسك دايما ورقة من علبة دواء وبيمشى بالراحة ويستلم اى حد بيركن

**Amrrr** · 16-12-2008 03:10 PM

اللي محيرني في موضوع التاكسي انه ممكن لو لف بعربيته شوية وركب زباين من غير ما يتنك ويختار المشوار اللي يروحو هيعمل القرشين دول ومن غير شحاتة ولا سؤال الناس وأكيد ربنا هيبارك !!! لو قابلته تاني هسأله السؤال دا ؟!؟!؟!

**tamohsen** · 16-12-2008 03:23 PM

المستفز انه معاه تاكسي
يعني لو قضي وقته في السعي لكسب الرزق بدل الشحاته
أكيد ربنا هايرزقه بالحلال

**nobody** · 16-12-2008 03:27 PM

ربنا يكفينا شر مصر الواحد ما عادش حاسس بالأمان خالص

**SAMER_ENGINES** · 16-12-2008 04:30 PM

المشاركة الأصلية كتبت بواسطة nobody

ربنا يكفينا شر مصر الواحد ما عادش حاسس بالأمان خالص

تصدق كلمة ربنا يكفينا شر مصر دي تقيلة عليا اوي بجد عمر مصر ما كانت شر, بس الأشكال اللي زي دي و الشحاتة و السنكحة و خلافه خلت شكلنا و خاصة قدام السياح زبالة, تخيل لما واحد زي الشحط لابس جلابية مقطعة و مهربدة و ريحته تقرف و يجي جنب السايح و يقولوا (جيف مي بقشيش) منظر مقرف و يشعرك بالحرج كمصري طبعا.

بس استنوا ستنوا انتم مستغربين ليه من البني ادم ده طب مرة كنت قاعد في الشغل و دخل عليا واحد شحط برضه و شنبه يقف عليه الصقرو قال لي:
سلامه عليكم
قلتله عليكم السلام
قال لي انا مباحث
قلت له و ماله اهلا وسهلا بيك برضه
قال لي طيب عايزين نفطر
انا عملت عبيط و مش فاهم
قلت له ما تفطر يا عم
قال لي طيب ما تشوف لنا فكة (تخيلوا دي)
قلت له و الله مفيش فكة (و كنت عايز اقوله يحنن و عيب عليك تبقي شحط طويل عريض و شغال في المباحث و شنبك يقف عليه الصقر زي ما بيقولوا و تيجي تشحت) بس مسكت لساني.
و بعدين لما لقي مفيش فايدة راح مطلعلي الكارنيه بتاعه زي تحذير كدة يعني شحات و بالإكراه و عايز لقمة فينو.
و ادي أخر تعاليق بعض الشحاتين برضه.

بس الصراحة البلد هي اللي عملت كدة في البني ادم ارتفاع اسعار و مفيش فلوس و لا مرتبات الناس هتعمل ايه؟؟؟؟؟؟؟؟؟؟!!!!!!!!!!!!!
بس بصراحة بتاع التاكسي ده احسن له يشتغل علي التاكسي بتاعه اكرم و اشرف من الشحاتة اللي بيعملها و شغلانة كويسة و فيها فلوس مش بطالة.

**ahmediz2000** · 16-12-2008 04:51 PM

الموقف ده حصل معايا وانا بركن لقيت تاكسى قديم والسواق بيندهلى ... بيقولى ابنى هيعمل عملية ابوس ايدك بوس جزمتك والله انا مش نصاب ولقيته هيعيط بصراحة صعب عليا واديتله مبلغ محترم .. حسبى الله ونعم الوكيل فى الناس دى

**abo_hosni** · 17-12-2008 08:06 AM

نصيحة ما تبقاش ترد على أي حد في الشارع و خلاص. مش عارف كده قسوة أو تطنيش لكن ده الحل الأسلم

ده غير اللي بيوزعوا ورق بتاع الصم و البكم لسه مقابل واحد امبارح!
عايز تقفشه اللي عامل أخرس ده خده عيادة أنف و أذن و وصي الدكتور بدل ما يدفي المراية بتاعة الكشف خليه يسخنها أكتر و هو بيكشف يلسعه في زوره هتسمع منه أحلى "آآآآه" متنغمة كمان

امبارح كمان قاعد أنا و صاحبي لقيت واحد شكله في الجامعة 20 سنة و بيكلمنا بجدية على واحد زميلهم في تجارة انجليش عنده فشل كلوي و محتاج مساعدة و لو (One pound :) ) كان نص كلامه عربي و نصه انجليزي. أنا قلت له في وشه "لأ" و صاحبي صعب عليه و ماكانش معاه فكة خد من عندي و قلت له تبقى ترجعهم :)
عايز تخليه يمشي قول له لو محتاج بجد ممكن أجيبه ببلاش مستشفى الجامعة و ياخد أحسن واجب

ده غير اللي تلاقيهم جنب المواقف و ينده لك عشان ماعهوش فلوس يركب المواصلات و مش عارف إيه. وتلاقيه بياخد من اللي بعدك و اللي بعده

ده غير أيام ما كنا في سنة أولى في الجامعة كان ييجي لنا في المدرج شباب ظريف كده يقول "احنا بنعمل مذكرة امتحانات من خلاصة رؤوس أساتذة الكلية" حضرتك تدفع جنيه للحجز و بيسجلوا الأسامي في ورقة و بعد ما يلم بتاع 500-700 جنيه مع السلامة. كنا طيبين قوي :)

**شاهين - بنز** · 17-12-2008 09:05 AM

حصلت معايا برضه قاللي سواق التاكسي عايز فلوس أمي في مستشفى الدمرداش وعايزة نقل دم طبعا أنا إستغربت جداومادتلوش حاجة سايب شغله وعمال يشحت

**homme49** · 22-12-2008 03:18 AM

الغريب حاليا هو أن الكل بيشحت
عندما تذهب لشراء عيش فينو أو بسكويت أو نواشف من الفرن البائع هناك يطلب منك البقشيش بطريقة سمجة
عندما تذهب لشراء أى شئ من سوبر ماركت تجد نفس الشئ من البائع
بالأمس دخلت سوبر ماركت و قابلت أحد العمال يكنس أرضية السوبر ماركت بالمقشة و عندما رأنى أتى ناحيتى و قال لى كل سنة و إنت طيب يا بيه
قلت له و إنت طيب، و فهمت قصده، فسألته إنت بتشتغل هنا ؟ فقال لى أيوة يا بية
فقلت له بتهكم أمال عايز إيه تانى ؟
قال لى و لا حاجة كل سنة و إنت طيب يا بيه
نظرت له شذرا و مضيت فى حالى