الموضوع: التفاصيل النهائية لمقابلة دايهاتسو الجمعة 19 ديسمبر

مساء الفل لأحلي الناس

دلوقت خلاص كل شئ إتفقنا عليه، المقابلة يوم الجمعة 19 ديسمبر بعد صلاة الجمعة مباشرة في مدينة السادس من أكتوبر.

بالنسبة للمكان تم حجز كافيه هوليوود بدريم لاند (الكافيه قدام باب دريم بارك بالضبط) ، الكافيهات في الممشي اللي قبل مدخل دريم بارك مقسمة علي الجانبين تم حجز واحد كامل لينا إن شاء الله و هنروح نقعد علي طول و هيبقوا مجهزين كل حاجة .

انا لقيت المكان ده أحسن لسببين أولاَ إن دريم بارك مكان مميز و مشهور سهل الوصول له و تاني ميزة و هي الأهم علي الإطلاق .. الباركنج عبارة عن حوالي كيلو و نص متر مربع من الفضااااااااااااء :) يعني مش بس نلعب بصور العربيات ده ممكن تيست درايف كمان داخل المكان بدون ما نطلع علي الطريق ، و بالمناسبة الباركنج بتاع دريم بارك هو اللي بيتعمل فيه الأوتوكروس ، و إنهاردة اما رحت أتفق مع الناس قعدت عشر دقايق بدور عالعربية عشان أمشي و تهت في الباركنج :)

كمان الجمعة دي هتبقي رايقة عشان الناس لسة خارجة من العيد و مفلسة و مفيهاش حيل تفسح عيالها و الشباب داخل علي إمتحانات فا إن شاء الله تبقي رايقة و حتي لو مش رايقة إحنا كدة كدة محجوزلنا مكاننا .

طرق الوصول لدريم لاند :

أولاَ : تطلع الدائري في إتجاه الهرم .. بس .. هتفضل ماشي طوالي لحد ما يخلص هتلاقي نزلة الرماية علي شمالك سيبها و كمل علي طول هتخش في وصلة لطريق الواحات إفضل معاها لحد ما تخلص و تنزل عالطريق ، أول ما تنزل عليه هتلاقي بنزينة وطنية علي يمينك كدة إنت وصلت هتلاقي بعدها مباشرة مفيش 150 متر مدخل مكتوب عليه "دريم بارك" و رسومات للشخصيات الكارتونية بتاعة دريم بارك ، إدخل منه و أدخل و حاول تقرب من مدخل دريم بارك علي قد ما تقدر ، مدخل الكافيه هو هو نفس باب دريم بارك لأن هو موجود في الممشي المؤدي لباب دريم بارك الملاهي ، بإختصار هتطلع الدائري في إتجاه الهرم و تفضل ماشي طوالي لحد ما تلاقيها لا هتحود يمين ولا شمال و ده أفضل طريق .

ثانياَ : عن طريق المحور ، تاخد المحور و تعدي الشيخ زايد و كل حاجة لحد ما توصل لميدان جهينة ، تعرفه إزاي ؟ فيه أوصل مطب هيقابلك من ساعة ما تمسك المحور ، هتعدي المطب و تلف شمال بس مش يو تيرن هتخش الطريق اللي في وشك (هيبقي علي يمينك بنزينة موبيل) و تكمل طوااااالي لحد ما هتنزل علي طريق الواحات و الفيوم أول ما تنزل عليه تاخد يو تيرن و تفضل ماشي طوالي هيقابلك بنزينة موبيل هتلاقيها علي يمينك ، أول ما تشوفها إمسك شمال و لف يو تيرن (هتلاقي يافطة مكتوب عليه الدوران للخلف مدينة 6 أكتوبر و الطريق الدائري ) أول ما هتلف هيبقي أكنك نازل من الدائري هتلاقي وطنية و مدخل دريم بارك من علي يمينك .

ثالثاَ : من الهرم ميدان الرماية تخش طريق الفيوم و تفضل ماشي هتلاقي وطنية و مدخل دريم بارك علي يمينك .

الطرق دي يوم الجمعة الوقت ده بتبقي رايقة كلها فا محدش يخاف من زحمة ميدان الرماية أو المحور.

سعر الفرد 20 جنيه شاملة الكافيه و الخدمة بتاعته و كل حاجة و ميني بيتزا و ساليزون و كرواسون و باتون ساليه + مشروب .

المفروض و إنتو داخلين هيقولك عالباب فيه فلوس باركنج اللي مش عايز يدفعهم يقوله انا داخل السينما بس عامة تذكرة الباركنج ب 2 جنيه .

و لأي ظرف في الطريق أو اي حاجة نمرتي 0102209960
و نشوفكم يوم الجمعة الجاية :k10:

يا ريت كل واحد كمان يقولي جي معاه كام فرد عشان أبقي مزبط كل حاجة .

المشاركة الأصلية كتبت بواسطة MoToRiZeR

يا ريت كل واحد كمان يقولي جي معاه كام فرد عشان أبقي مزبط كل حاجة .

فرد كمان معايا
وموجه الدعوة لتلاتة زمايلي ملاك دايهاتسو اتنين معاهم سيريون وواحد معاه تيريوس بس لسة مأكدوش الحضور
تحية واجبة إليك يا محمود على مجهودك العظيم في تنظيم اليوم

ده لينك المقابلة علي فيس بوك
http://www.facebook.com/event.php?eid=49522339594

شكرا يا محمود باشا على المجهود ده وان شاء الله تبقى مقابله هايلة

انا مبدئيا مش اقل من فردين

انا بالسريون و محمد ايهاب ابن خالتى بالتريوس

لكن هأكد عليك فى خلال يومين بالكتير مين زيادة هيجى

جزاك الله كل خير يا محمود :k10:

جزاك الله خيرا يا باشا كده تمام و ان شاء الله انا جاي لوحدي و معايا ابني الصغير عمر (اربع سنوات بس ماشاء الله متخصص عربيات) وطبعا صديقتي العزيزه تيريوس .

المشاركة الأصلية كتبت بواسطة Nile_Storm

احم احم ممكن اجي باذن الله اسلم علي حبايبي
بس بعربيه فيرنا كوري علي مصري معلش اخواني اليابانيين :)

محمد باشا

ده احنا فى منطقة نفوذك

تشرف طبعا