يا جماعه انا عندي فكرة بسيطة ...ممكن تساعد الناس ايلي معندهاش خبرة في حكاية المصنعيات دي ...وبدل ما الواحد يحس انة اتضحك علية او ان الصنايعي غشة واخد منة فولس اكتر من حقة..

الفكرة ببساطة ....اننا نقسم المصنعيات علي حسب نوع الخدمة...يعني شغل الصاج السمكرة ..شغل الميكانيكا (تظبيط موتو انجيكشن او تظبيط هوا او تكيهات او تركيب بوجيهات او اي شيء مماثل)...شغل العفشة بمشتملاتة ...وهكذا...

طبعا هايكون في اختلاف برضة من مكان لمكان ..وبلد لبلد..وطبعا ودة الاهم من صنايعي شاطر لواحد نص نص ...لواحد ضايع وبيضيع العربية...

انا عامة ...هابتدي بيا وبعربيتي اللادا....

هابتدي بالعفشة ..ايلي هي اكتر صيانات اللادا:

تركيب تيل فرامل (امامي وخلفي) 20 جنية بعد الفصال (عامة بيطلب 30)
اخد هوا الفرامل (دة مش محدد بس ممكن يبتدي من 2 جنية ..وانت براحتك )
تغير غويشة في الفتيس....(دي كانت ملحمة ...واخد 70 جنية ...بعد ما فك الفتيس كلة تماما وركبة تاني ... والعربية اشتغلت الحمد لله)
تغيير ماستر فرامل وخزنيتن (60 جنية )

ثانيا ...الميكانيكا ....:
تغير بوجيهات وابلتين وكوندسر (20 جنية ....من غير ولا كلمة )
تغير سير الكاتينة (50 جنية .....وعاملها شغلانة وفك وش السلندر ....مش عارف لية ..بس في ناس قالتلي ان اللادا الكاتينة الكاوتش لازم يفك وش السلندر )
غسيل كاربيتير وتظيفة (الجاز او بنزين الغسيل علي حسابي ) 30 جنية ...بالعافية ..
الحمد لله ماعملش اي شيء في العربية غير كدة...وربنا يستر ..

ثالثا....السمكرة والدهان...:
دي بقي ايلي مالهاش حل ابدا....يعني ممكن تعمل حتة قد الرفرف بـ 50 جنية وترشها بـ 100..
وواحد تاني يعملة بـ150 ويرشة بـ150 ....

رابعا ...الشكمان ...:
دة انا باغيرة كل سنة تقريبا علشان دايما بيراكم مية في الشكمان ...وبيخلي العلب تصدي وتتاكل ...العلبة بتعمل حوالي من 55 لـ 56 بالتركيب...