كابتور ام كورولا ام تيبو ؟؟! (زيرو)

الاخوة الكرام انا عضو جديد ومحتاج استشارتكو
بعت عربيتي كيا كارينز 2011 وكانت وافية لكل ما اطلبه من عربية لا اكتر ولا اقل من حيث الاستخدام العائلي سواء داخل المدينة او طرق سفر ومن حيث كفائتها و وانها طول مدة الخدمة ماعملتش موقف واحد بايخ والحمد لله :d
حاليا انا مقبل علا شراء عربية جديدة ومحتاج النصيحة
بعد بحث كتير ومقارنات كتير و واسكشاف ميزات وعيوب ومشاكل عربيات كتير في رينج السعر اللي حاكمني واستبعاد اللي ما يلبيش احتياجي او اللي اعرف من مالكيها (ع النت وفي المنتديات)مشاكلها الشائعة او ليه بلاش اجيبها اقتنعت بالتلاتة دول بعد ما قرات عنهم كتير
Renault captur فئة واحدة هي signature ب 325000
Toyota corolla الفئة الاولي في الاوتوماتيك ب315000
Fiat tipo بيز ب292000
طبعا دي اسعار التوكيل
انا عارف ان المقارنة بينهم صعبة لانهم حاجات مختلفة خالص XD ولكن لكل واحدة فيهم ما يميزها والمواصفات اللي بادور عليها متحقق في كل واحدة منهم شوية وكذلك عربيات تانية برضو زي بيجو 301 و نيسان سنترا و سيات توليدو ولانسر وسنترا و اختيارات تانية كتير
لو كان في ميكس بينهم ماكنتش هفكر لكن لو هختار واحدة فيهم يبقي ه اضحي بشوية من طلباتي XD
سؤالي هو ليه اختار واحدة منهم والاتنين التانيين لا؟
مثلا من حيث الكماليات الكورولا مع كامل التقدير لسمعتها وجودتها واعتماديتها الا اني شايف اني ممكن ازود شوية اوصل للكابتور او اوفر الفرق واجيب التيبو اللي برضو فيها كماليات ورفاهيات اكتر من الكورولا والفرق في ثمن اعادة البيع هكون موفره اصلا :-$
برضو في حاجات داخلة في الاعتبار زي تكاليف الصيانة علي مدي من خمس لعشر سنين واسعار قطع الغيار وتوافرها وهل انا هحتاج اصرف علي العربية اصلا ولا هتعجز بدري و ساعتها هلاقي فني شاطر بيفهم في العربية ولا هاصرف في توكيل معتمد اضمن
واحساس بالرضا ان ثمن العربية تستحقه فعلا ولا كان في فرصة لاحسن من كدا
انا غير متحيز لاي منهم وارجو مساعدة الملاك واصحاب الراي الحيادي لو اه يبقي ليه ولو لا يبقا ليه ولو غيرهم وبلاش دول خالص احب اسمع وجهة نظرهم
مع جزيل الشكر