الموضوع: دعوة لحملة لوقف مهزلة و تخلف مشكلة اللوح المعدنية

احب ابشركم انه حتي الان لم احصل علي لوح ، رغم إنه حسب كلامهم المفروض كانت اللوح تبقي النهاردة و لما كلمتهم الصبح قاللولي تعال بس ع الساعة اتنين كده عقبال ما يكونوا جم من الإدارة ، إدارة محل الفول و الطعمية اللي اسمها إدارة المرور، طبعا كنت هارقص من الفرح في مكاني و لغيت كل مواعيدي ما انا صايع بقه و ما ورييش حاجة غير اللف علي اللوح و لما روحت بشروني ان برده مفيش حاجة جت و اللي موجود لوح موتوسكيلات و فوت علينا يوم الحد الجاي أو عدي علينا كل يوم أصلها أرزاق ما هو ممكن اللوح توصل الساعة حداشر و انا اروح الساعة اتناشر و يبقي باي باي كمبورة و طبعا ده و انا شايف اللوح الملاكي بتخرج قدامي لاصحاب الحظوة ، انفعلت علي الموظف ولاقيت مامنهاش فايدة قمت واخد نفسي و مروح و طبعا عملت يجي عشرين موبايل و ربنا كرمني و واحد هيروح معاي بكرة و ربنا يسهل و يعرف يخلصهالي ،، و حسبي الله و نعم الوكيل و ربنا يجعل القرف ده في ميزان حساناتنا

معلش يا استاذ احمد بس يا رب تلاقي واسطة كويسة0 ساعات وسايط كبيرة وبرضه بتبقي مشكلة تلاقي نمرة0انشالله ربنا يسهلها

امبارح كنت مع ضابط صاحبي في المرور و بساله علي موضوع النمر قالي ممكن يكونو موقفين التراخي مش حكايه نمر ناقصه ولا حاجه زي مرور اسكندريه كده كان موقف التراخيص للملاكي عادي انما النمر موجوده!!!
و اعتقد ان دا كلام صح بدليل اللي معاه واسطه بياخد نمر

امبارح كنت مع ضابط صاحبي في المرور و بساله علي موضوع النمر قالي ممكن يكونو موقفين التراخي مش حكايه نمر ناقصه ولا حاجه زي مرور اسكندريه كده كان موقف التراخيص للملاكي عادي انما النمر موجوده!!!
و اعتقد ان دا كلام صح بدليل اللي معاه واسطه بياخد نمر

السلام عليكم ؛ أحب ابشركم جميعا إني الحمد لله علقت النمر و رخصت العربية ، يوم الخميس قابلت المعرفة اياها و المهم طلعت تقدر تصرف في المرور الرئيسي الدراسة و صعب عليها شوية السلام ، المهم طلعت معاه علي الدراسة و بعد كذا اقتراح رحنا لبتاع النمر الرئيسي هناك فحلفلي مليون حلفان إن يوم السبت هيوصل مرور السلام الف لوحة جديدة جاية من اسكندرية طبعاقعدت اتحايل عليه يخلصني فحلفلي إن كل حاجة هتخلص يوم السبت مع وعد إنها لو مخلصتش يوم السبت ارجعه و في نفس الوقت الناس اللي كانوا معايا اشفقوا عليا عشان كنت لو هاخد نمر من الدراسة كنت هادفع كتير لأنها حاجة مش طبيعية فقلت خلاص مجتش علي يومين و كلمت مرور السلام يوم الخميس اخر النهار فقاللولي ميعرفوش حاجة ومفيش حاجة جت فقلقت تاني المهم رحت يوم السبت بدري علي السلام لقيت فعلا الللوح جت و بوفرة و طبعا بعد الطوابير الطويلة و الزحام الشديد الحمد لله خدت الرخصة و اللوح جديدة لنج مغهاش خرم بعد ما ضبطت بتاع اللوح عشان شفته بيطلع لوح قديمة فاداني لوحة من الكرتونة و الموضوع ده خد ثلاث ساعات بس !!! و من غير واسطة أو دفع فلوس الحمد لله، انا اسف للإطالة بس بقول اهو كله يستفيد من حكايتي دي ، و احب اطيل عليكم اكتر
و أقول الملاحظات التالية علي مرور السلام ،، الواحد ما ينكرش إن الناس هناك شغالة بس قذارة المكان و سوء المعاملة حاجة بتجيب للواحد احباط و احساس بالدونية ، ثاني حاجة مرور السلام بيخدم مناطق الزيتون و المطرية و عين شمس و جسر السويس بأكمله و السلام والعبور و المرج وبركة الحاج و مؤسسة الزكاة فالبذمة ده كلام ناس عاقلين يعني معقول مصر الجديدة و مدينة نصر يتقسموا و كمان مصر الجديدة بقت مرور مصر الجديدة و النزهة و كمان مدينة نصر عمالولها فرع جديد في التجمع !!!! ده المطرية لوحدها قد الحتت دي كلها إلا بقه إذا كانوا بيبصوا أني دي مناطق راقية و دي مناطق شعبية فيعني مرور السلام ده لازم يتقسم علي منطقتين علي الأقل لو حد بيفكر و بالنسبة ليا شخصيا لازم هاغير محل إقامتي عشان امشي من المرور النيلة ده ،،،
بالنسبة لمشكلة النمر انا مش عارف هيا كده اتحلت لللأبد و لا ده بس حل مؤقت و المشكلة هترجع تاني بس لازم في أقصي سرعة يفكروا و يوفروا اللوحات دي في اسرع وقت مش معقول الناس تفضل راكنة عربياتها عشان المرور مش عارف يوفر حتتين الصاج دول و لو فرضنا إن دي ظروف بلدنا و مش عارفين نوفر اللوحات حرام وقت الناس ده يضيع مثلآ وحدات المرور تتطبق الحل بتاع مرور المحلة و يتصرفوا في نمر مؤقته لو القاهرة بلد سياحي و عيب الناس تمشي فيها بلوح مش قد كده يبقي علي الأقل إدارات المرور تاخد الورق من الناس و تعملهم ملفات و تديهم ايصال أو رقم و توقف بس علي اللوحات و يبقي تسليم اللوحات بالترتيب و الواحد يسأل بس لوحته و دوره جم و لا لأ مش اروح لمدة عشرة أيام كل يوم أسأل اللوح جت و لا لأ و لو جت خلصت و لا لأ ، ده أنا كمان شفت ناس بعد ما استنوا اللوحات شهر راحوا و الموظف رجعهم عشان ختم ناقص وهيجيبوا الختم ده من الفيوم و الله اعلم لم يرجعوا هيكون في لوح و لا لأ ، مشكلة بسيطة جدا بس لو في شوية تفكير في الناس و تعبهم و وقتهم
أنا اسف للإطالة بس دي مشكلة ممكن كلنا نتعرض لها لو اشترينا عربية سواء زيرو أو مستعملة