الموضوع: الرجاء المساعدة من خبراء المنتدي اطارات ( كومهو )ام ( دانلوب )

المشاركة الأصلية كتبت بواسطة Omar kamel

السلام عليكم
انا سيارتي تويوتا كرولا 2013 و نازل فيها كاوتش ( جوديير ياباني ) هو كاوتش ناعم و لكن من 20000 الف كيلو مدوخني
انا من محافظة السويس و الطرق عندنا مش كويسة و فيه مدقات كثيرة كل شوية يتخرم انا عارف ان المشكلة في الطرق بتاعتنا مش في الكاوتش
انا عايز اغير كاوتش يكون نوعيته كويسة و لكن مش غالي اوي يعني خير الامور الوسط
* زميلي رشحولي ( كومهو ) و قاللي بيغيره علي 70000 كيلو و مغيره مرتين و هو بيسافر كتير و بيجري بس هو بيغيره لجيلي ام جراند و اوبل استرا يعني اخف بكثير من الكرولا و لا وزن السيارة ما يفرقش في الكاوتش ؟
* لي زميل اخر معاه افيو و نازلة بالكومهو بس قاللي بعد 20000 الف كيلو فيه فردتين فرقعوا و لا انصحك به
*فيه ناس اخري شكروا في الدانلوب الياباني و انا عارف ان الدانلوب اصله الماني بس هو نازل ياباني في سياراتهم و ما بيشتكوش منه و سالت في ( التوكيل ) عليه
لقيت Danlop st 300 الفردة ب 1130 جنيه و لكنها انتاج ( الاسبوع 30 من 2015 ) يعني بقالها سنة و نصف متصنعة بس هو قاللي ما تقلقش منها انا (بضمنهالك خمس سنين او 60 الف كيلو )
فارجوكم ساعدوني في الاختيار
* و ارجو من اهل الخبرة بيان خصائص الكاوتش ( دانلوب اس تي 300 ) لانني بحثت عنه علي الانترنت بس مشعارف اطلع خصائصه او مواصفاته
*و هل السنة و نصف الفائتة من عمر الاطار هذه لا تسبب مشكلة و لا عادي خصوصا انه بيقولي فيه ضمان 5 سنوات او 60 الف كيلو اسف جدا اسئلتي كثرة و لكنني في حيرة كبيرة لاختيار نوعية الكاوتش
جزيل الشكر والاحترام لحضراتكم

أول حاجة وقبل أي كلام...

الكاوتش مش بيتغير بالكيلومترات... الكاوتش بيتغير بأحد حاجتين... العمر أو التآكل

لو الكاوتش متاكل .. يبقى لازم تغيره.. وكل فردة فيها علامات محددة لو وصلت لها يبقى لازم الكاوتش يتغير... سواء مشيت بالكاوتش 10 آلاف كيلومتر أو 100 ألف كيلومتر

نفس الكلام يتقال على العمر... آخر الفردة 5 سنوات... سواء مشيت بيها 10 آلاف أو 100 ألف كيلومتر.

المشاركة الأصلية كتبت بواسطة Omar kamel

* زميلي رشحولي ( كومهو ) و قاللي بيغيره علي 70000 كيلو و مغيره مرتين و هو بيسافر كتير و بيجري بس هو بيغيره لجيلي ام جراند و اوبل استرا يعني اخف بكثير من الكرولا و لا وزن السيارة ما يفرقش في الكاوتش ؟
* لي زميل اخر معاه افيو و نازلة بالكومهو بس قاللي بعد 20000 الف كيلو فيه فردتين فرقعوا و لا انصحك به

الكومهو كماركة تعتبر كويسة جدا وأسعارها معقولة جدا جدا... ومن تجربة مرتين.. أقدر أقوللك إنه أحسن كاوتش في الكاوتش الكوري كله..

بس العبرة باختيار الفردة أولا وأخيرا...

كل فردة ليها مواصفات معينة بنقدر نعرف منها إذا كانت تناسبنا أو لأ..



مواصفات الفردة كالتالي:

المقاسات:
قطر خارجي وداخلي وعرض وارتفاع البروفايل.. هو ده الأرقام المعروفة لينا كلنا زي 185/60R15

تحمل الأوزان:
ليها كود عبارة عن رقم (غالبا بين 78-105).. وكل ما زاد الرقم كل ما الفردة اتحملت أوزان أكتر...
الكورولا الرقم المناسب ليها بين 82-91

السرعة:
وده عبارة عن كود حروف... بيعبر عن أقصى سرعة تتحملها الفردة... ولازم تبقى السرعة اللي تتحملها الفردة أكبر من السرعة القصوى بتاعت العربية...
بالنسبة للكورولا.. كود H (210 كم/س) أو V (240 كم/س) مناسبين جدا جدا

تحمل الحرارة:
وده كود حروف.. بيعبر عن مدى تحمل الفردة لحرارة الأسفلت والاحتكاك..
يفضل دايما في الأجواء الحارة إن الكود يبقى B على الأقل... والأفضل A والأفضل على الإطلاق AA.

التماسك مع الطريق:
وده كود حروف بردو.. بيعبر عن مدى جودة الفردة إنها تمسك في الطريق كويس وتساعد على ثبات العربية في الملفات بالذات..
يفضل دايما تختار أكواد عالية لا تقل عن B.. والأفضل A والأفضل على الإطلاق AA.

آخر كود هو كود تآكل المداس..
وده كود رقمي (غالبا بين 200 - 700) بيعبر عن سرعة وصعوبة تآكل المداس مع الاستخدام ... وكل ما زاد الرقم كل ما كانت الفردة ناشفة وصعبة التآكل (عمرها طويل) لكن ممكن الكلام ده يأثر على نعومة الركوب وكمان يأثر على التماسك مع الطريق...
حاول تجيب كود بين 240-400..


ادخل هنا لو عايز معلومات تفصيلية:
ما الذي تعنيه الأرقام الموجودة على إطارات السيارات؟
https://www.tirerack.com/tires/tiret....jsp?techid=35

المشاركة الأصلية كتبت بواسطة Omar kamel

*فيه ناس اخري شكروا في الدانلوب الياباني و انا عارف ان الدانلوب اصله الماني بس هو نازل ياباني في سياراتهم و ما بيشتكوش منه و سالت في ( التوكيل ) عليه
لقيت Danlop st 300 الفردة ب 1130 جنيه و لكنها انتاج ( الاسبوع 30 من 2015 ) يعني بقالها سنة و نصف متصنعة بس هو قاللي ما تقلقش منها انا (بضمنهالك خمس سنين او 60 الف كيلو )
فارجوكم ساعدوني في الاختيار
* و ارجو من اهل الخبرة بيان خصائص الكاوتش ( دانلوب اس تي 300 ) لانني بحثت عنه علي الانترنت بس مشعارف اطلع خصائصه او مواصفاته
*و هل السنة و نصف الفائتة من عمر الاطار هذه لا تسبب مشكلة و لا عادي خصوصا انه بيقولي فيه ضمان 5 سنوات او 60 الف كيلو اسف جدا اسئلتي كثرة و لكنني في حيرة كبيرة لاختيار نوعية الكاوتش
جزيل الشكر والاحترام لحضراتكم

دنلوب على فكرة شركة ياباني 100%... يمكن الاسم كان ألماني زمان.. ولكن حاليا الشركة يابانية 100% ومقرها في اليابان...

دورت لك على الفردة اللي حضرتك بتقول عليها ST300... بس الحاجة الوحيدة اللي لقيتها دنلوب بالرقم ده عبارة عن حذاء رياضي!!!!!!

اللي ممكن تلاقيه برقم مشابه عند دنلوب اسمه ST30... وده مفيش منه مقاسات أقل من 245.. يعني للعربيات الرياضية الكبيرة...

اتأكد من رقم الفردة علشان نقدر نجيبلك مواصفاتها.


بالنسبة لعمر الفردة.. فالأفضل طبعا إنك تشتري فردة جديدة ما يكونش عدى عليها أكتر من 1 سنة... لإن ده معناه عمر أقل في التشغيل على عربيتك...

دايما احسب 5 سنوات من تاريخ الإنتاج... فات سنة ونص.. فاضللك 3.5 سنوات من الاستخدام.

...