الموضوع: الى مستشارنا و استاذنا المهندس احمد البرعى

كل عام وحضرتك... وأشكرك على ثقتك الغالية... وأدعو الله إني أقدر أفيدك فعلا..

هو متهيألي علشان نفهم لغز الشيفروليه آفيو.. محتاجين نعرف شوية حاجات عن تاريخ موتورها..

موتور الآفيو واحد من أكتر مواتير جنرال موتورز اللي اتحط تحت مسميات عربيات كتير...

حضرتك عارف إن الشيفروليه آفيو هي في الأصل من تصنيع دايوو... وكان اسمها في كوريا دايوو كالوس (بعد انتهاء دايوو لانوس من التصنيع في كوريا)

دايوو في الأصل كانت (وما زالت) معتمدة في كل هندستها وتكنولوجيتها على أوبل... وكل مواتيرها في الأصل من تصميم أوبل (أوبل كانت إحدى شركات جنرال موتورز من سنة 1929 لحد 2017).


الموتور ده تحديدا كان متركب أخوه (1400 cc) في عربية أوبل كاديت سنة 1990...

نفس الموتور بتاع عربيتك ده اتركب في دايوو سييلو (ريسر) - دايوو اسبيرو - دايوو لانوس - دايوو نوبيرا... وبعد كده دايوو كالوس..

توصيات أوبل للزيوت كانت مرنة جدا من ناحية اللزوجة...

الصور دي على سبيل المثال من توصيات دايوو لانوس.. وهي منقولة بالحرف من توصيات الزيت لأوبل كاديت...




زي ما حضرتك شايف.. الموضوع مفتوح عالبحري…

ومع ذلك هو كاتب بعض اللزوجات المفضلة (5W-30 , 10W-30 , 10W-40 , 15W-40)

الفكرة بقى كمان إن دايو كالوس بقى اسمها بعد شوية شيفروليه آفيو... وفي أوكرانيا زاز فيدا.. وفي الهند شيفروليه سيل sail.. وفي الصين اسمها شيفروليه كافالييه - وفي أستراليا اسمها هولدن بارينا... وفي المكسيك اسمها شيفروليه سونيك.. وفي اليابان اسمها سوزوكي سويفت+ .. وفي أوزبكستان رافون نيكسيا.. وكمان نزلت في أمريكا تحت اسم بونتياك ويف wave...

ومع التنوع الكبير ده في الأسواق.. مش طبيعي إن توصيات الزيوت تكون واحدة في كل حتة... خصوصا إن بعض المناطق ليها قوانين خاصة بالبيئة وبتفرض استخدام لزوجات خفيفة لتوفير الوقود (زي أمريكا وكندا).. ومناطق تانية بتفرض استخدام زيوت بمواصفاتها (زي أوروبا)...

والناس اللي زي حالاتنا مفيش عندهم أي مواصفات في الحتة دي... وبيتوهوا مع اختلاف المواصفات من كل حتة في العالم...


معلش أنا طولت في الشرح.. بس أنا حاولت أفك اللغز ده لإنه بيحير ناس كتير..

دي بعض الروابط لتأكيد المعلومة
http://en.wikipedia.org/wiki/Chevrolet_Aveo#T200
http://en.wikipedia.org/wiki/GM_Family_1_engine#E-TEC



خلاصة الكلام...

توصيات جنرال موتورز في آخر 10 سنوات بتفضل استخدام زيوت بلزوجة 5W-30 أو 10W-30 ويفضل تكون معتمدة بأحدث مستوى أداء API SL على الأقل و ILSAC GF-3 على الأقل.. والأفضل خالص تكون واخدة علامة ديكسوس (العلامة المعتمدة من جنرال موتورز)..

أي توصيات أخرى معتمدة أساسا على توصيات أوبل اللي بتسمح باستخدام لزوجات تانية... بس بشرط تكون واخدة تصنيف ACEA A3 وكمان مطابق لمواصفة أوبل GM-LL-A-025 (مواصفة أوبل دي بقت ديكسوس حاليا).


وده سبب إن التوكيل استخدم لزوجة 20W-50.. لإنه موجود في توصيات أوبل ومستخدم في شيفروليه لانوس لحد دلوقتي ومتاح بسهولة في السوق.

من ناحية استخدام لزوجة 5W-40.. فهي مناسبة خصوصا لو مطابقة لمواصفة ACEA A3.. ولكن أنا شخصيا أفضل الموبل1 x1 لإنه مطابق لمواصفة Dexos.. وخلي بالك إن أي زيت مطابق لمواصفة ديكسوس لزوجته مش هتزيد عن 10W-30.


على فكرة... كود A3 مش بيدي حماية أكبر من A1...
هو بيديك ثقة إن الزيت ممكن يشتغل معاك فترة طويلة (أكتر من 10 آلاف كيلومتر) بس... إنما في خلال مدة التشغيل الطبيعية (أقل من 10 آلاف كيلومتر).. فالـA1 والـA3 زي بعض.


لو لسه قلقان وعايز تروح للزوجة أعلى.. فراجع طريقة استخدامك للعربية... واسأل نفسك الأسئلة دي:

- هل بتحمل فيها أوزان تقيلة (إجمالي أكتر من 250 كجم) بشكل متكرر ؟؟
- هل بتقطر عربيات أو مقطورات؟؟
- هل حضرتك ساكن في منطقة جبلية (جبال سيناء مثلا) وبتضطر تطلع وتنزل منها كتير؟؟
- هل بتحب تقرص على الموتور (الموتور يوصل لأعلى من 4000 RPM) وبتكرر الحكاية دي كتير؟؟

لو كل إجاباتك "لأ" يبقى اللزوجة الخفيفة أكثر من كافية.


بالنسبة لمواعيد التغيير...

فالكتالوج بتاع دايو كالوس بينصح بالتغيير كل 7500 كيلومتر أو 6 أشهر في الأحوال الشاقة... أما في الأحوال العادية (المثالية) فالتغيير بيتم كل 15 ألف كيلومتر أو سنة.

والاستخدام الشاق المكتوب في الكتالوج هو كالتالي:

- تكرار التشغيل على البارد (تشغيل السيارة بعد مرور أكثر من 3 ساعات من توقفها عدة مرات خلال اليوم)
- تكرار المشاوير القصيرة (أقل من 8 كيلومتر)
- جزء كبير من التشغيل بطريقة التوقف والحركة (الزحام)
- القيادة المتكررة في درجات الحرارة المتجمدة
- ترك المحرك يعمل بسرعة التباطؤ (السلانسيه) لفترات طويلة
- القيادة بسرعات بطيئة بشكل متكرر
- القيادة في المناطق المغبرة

وبعض الكتالوجات لسيارات أخرى بتضيف حالات أخرى مثل:
- القيادة في الزحام في دراجات حرارة مرتفعة (فوق 32 م)
- سحب أو قطر سيارات
- القيادة كسيارة تاكسي أو سيارة دورية أو تجارية
- القيادة بسرعات عالية (فوق 160 كم/س)
- القيادة في شوارع بها مواد آكلة أو ملح.


دول شوية كتالوجات ممكن تساعدك:

Daewoo Kalos - Owners Manual
دايوو لانوس - دليل المالك
ZAZ VIDA - Service Manual
Chevrolet Aveo 2008 - Owners Manual (USA)
شيفروليه آفيو 2014 - دليل المالك
Deawoo Espero - Owners Manaual


أرجو إني أكون قدرت أفيدك..


...

أنا هجاوب على كل سؤال لوحده علشان ما نتوهش :)

المشاركة الأصلية كتبت بواسطة mohamedibk

السلام عليكم ياباشمهندس احمد واتمنى ان تكون حضرتك بصحة جيدة
انا لى كذا استفسار ولكن انا اتبعت نصيحتك كما قولت حضرتك انى التزم بما ورد فى الكتالوج وبالفعل قمت باستخدام زيت 5-30ولفر منذ شهر والملاحظ عليه توفير استهلاك البنزين وعدم وجود صوت التكتكة التى كانت تظهر لمدة ثوانى مع بداية الدوارة للعربية الافيو فى اى يوم وعدم نقص الزيت الا وجود ترشيح بسيط للزيت فقط من اويل سيل الكامة ودية امرها انا شاء الله سهل
بدلا من 5-40 الالمانى الذى كنت مواظب علي تغييره مابين فترات سنة اوعشر شهور واللى كنت بسمع صوت تكتكة مع اول بداية دوارة العربية فى اليوم لمدة ثوانى قليلة جدا تماما .

وعليكم السلام ورحمة الله وبركاته..
مبروك.. أول خطوة صحيحة حضرتك عملتها هي الالتزام بالكتالوج.. وحضرتك شفت النتيجة بشكل مباشر :)

المشاركة الأصلية كتبت بواسطة mohamedibk

اول سؤال لما كنت باستخدم ولفر 5-40 بعت ايميلين لولفر هل الزيت ده يتبع ILSAC GF-3,4or5 ويصلح ان يمشى اد ايه ؟فكان الرد فى الايمليين الاتيين
فكان الرد فى الايمليين الاتيين



فا انا بحب انا اسمع راى سياتك برده فى السؤاليين دول مع ان الاستخدام الشاق فى حدود 6 شهور واستخدامى انا سفريات قليلة وماشى كتيير داخل اسكندرية مع حرصى لعدم تحميل الاربي ام للماتور والقرص عليه وكذلك الاوزان

95% من الزيوت التخليقية اللي بتنزل مصر هي في الأصل زيوت معدنية معدلة بتكنولوجيا الهيدرو-كراكنج Hydro-Cracking.. اللي بيتقال عليها تسويقيا (تكنولوجيا تخليقية)

الزيوت التخليقية الحقيقية هي اللي معمولة من أساس اسمه (PAO).. والزيوت دي أغلى من الزيوت التخليقية العادية بحوالي 30-50%

طبعا.. زيوت التكنولوجيا التخليقية عمرها أقصر من زيوت الـPAO.. نقدر نقول إنها بتعيش نص عمر زيوت الـPAO تقريبا..

فالحتة بتاعت السنة دي أشك فيها في زيت تكنولوجيا تخليقية... مع إن كذا شركة زيت بتقولها...

بس خد بالك إن الشركات في الغالب بتقوللك دايما الحدود القصوى بدون الأخذ في الاعتبار لظروف التشغيل...
مسألة تسويقية في الأساس والموظفين اللي بيتكلموا بتوع تسويق أساسا.. إنما الناس الفنيين مش بيعرفوا يتكلموا مع الناس.. وهيبوظوا الدنيا من ناحية المبيعات.. لإنهم غالبا مش هيكدبوا.

لو عايز تعرف أكتر عن زيوت الأساس .. ادخل على الموضوع ده
الزيوت التخليقية ... هل هي تخليقية فعلا؟؟



بردو .. مواعيد تغيير الزيت هي المذكورة في كتالوج عربيتك.. مفيش تغيير في الكلام ده...

أنا كنت شرحت في الموضوع ده الأسس الصحيحة لمواعيد تغيير الزيوت..
إمتى تغير زيت الموتور؟؟؟


للأسف.. مفيش حد محدد مسافة معينة للزيت إلا كتالوج الكالوس (النسخة الكوري).. النسخة المصري بتقوللك امشي مع التوكيل ... والنسخة الأمريكي بتقوللك عندك جهاز بيحددلك تغير كل قد إيه.!!

يبقى هنسترشد بالنسخة الكوري...

مكتوب في الكتالوج:
في الأحوال العادية.. غير كل 15 ألف كيلومتر أو سنة
وفي الأحوال الشاقة.. غير كل 7500 كيلومتر أو 6 أشهر..

في الدول العربية.. الكتالوجات بتضطر تنزل المسافات دي إلى 10 آلاف كم (بدلا من 15 ألف) و 5000 كم (بدلا من 7500) بسبب وجود نسبة كبريت عالية في البنزين..

إيه اللي جاب البنزين للزيت؟؟؟!!! ده موضوع تاني شرحه يطول..

المهم..
لو اعتبرنا إن الكتالوج عامل حسابه على استخدام زيوت معدنية بالمواصفات المطلوبة (أيوه فيه زيوت معدنية بالمواصفات دي بس مش بتنزل الشرق الأوسط)..
واحنا هنستخدم زيت تخليقي.. فالمتوقع إن المسافة ممكن تطول...

بس في جميع الأحوال.. ما تزودش المسافة عن 10 آلاف كم مهما حصل (كده ما زلنا ملتزمين بالكتالوج)..

مسألة 6 شهور أو سنة دي .. أنا شخصيا ميال لـ6 شهور.. خصوصا مع زحمة اسكندرية.

المشاركة الأصلية كتبت بواسطة mohamedibk

ولكن برده انا صورت بيانات 5-30 للولفر عشان تؤلى الاستخدام الشاق بتاعه الافضل كام كم ومدة اد ايه التزم بيها

الزيت ده يمشي .. بس مش مطابق لمواصفة ILSAC
على الموقع كاتبين إنه مطابق لمواصفة أوبل GM-LL-B-025.. ودي مواصفة أوبل لمواتير الديزل.. مش البنزين

Wolver SuperTec 5W-30

زي ما قلت لحضرتك.. الزيت يمشي.. ومع إنه مريحك أكتر من الزيوت التانية.. بس مش هو الأفضل..

المشاركة الأصلية كتبت بواسطة mohamedibk

والسؤال الاخير هل مقاس الزيت بتاعى ده مظبوط ؟ ام عند بداية الخط | اللى اول او قبل X بتاعت ماكس




ام ان صديق يقول لى ان هذا المقياس هو الانسب وان اللى انا عمله بيؤدى الى مشكلة التسريب من الاويل سيلات والجوانات وصورته امامنا

صديقك هو الصح...

الصورة دي من كتالوج الآفيو العربي... (أنا معدل عليها بالألوان)



زي ما حضرتك شايف... الخطوط دي ( | ) هي الحدود بتاعتك... الحروف ما هياش حاجة واضحة ولا محددة علشان أقيس عليها.

دي حاجة..

الحاجة التانية... مش لازم تخلي مستوى الزيت يوصل لحد علامة الـMax...

لو الزيت كان واصل لأي حتة في النص فده يعتبر "مستوى آمن" .. يعني مفيش مشاكل.


حضرتك باختصار خليت الزيت يقفل الفتحات بتاعت تنفيس الضغط جوه البلوك..

ادخل على الموضوعين دول علشان الصورة توضح أكتر...

تبخر الزيت... هل هو حقيقة أم خرافة؟؟
مستوى الزيت في المحرك .. إيه أسباب نقص الزيت؟؟؟

المشاركة الأصلية كتبت بواسطة mohamedibk

انا كنت جربت مرة من كذا سنة موبيل ون X1 5w-30 لما كان واخد كود ACEA A1 وطبعا التوكيل كان مغرم لى بالاتش اكس ابى اللى كرهنى وعقدنى فى حاجة اسمها موبيل فانا معنديش استعداد انى استخدم حاجة اسمها موبيل ون x1 5w-30 اللى هو ACEA a1.a5 فبصراحة قفلت منه اثناء الصيانة بتاعت التوكيل وارتحت منه بعد انتهاء الضمان فرق شاسع مابين الزيوت المعدنية والتخليقية ذات GF-3 وكان موبيل ون X1 5w-30 لما كان واخد كود ACEA A1 ممتاز معايا ولكن انا مستقر و اشد ثبات مع زيت ولفر يمكن حوالى او 5 سنوات من استخدام 5ًًW-40 واخيرا 5W-30

أنا في العادة برشح زيت موبل1 x1 لإنه أكتر زيت (المواصفات المطلوبة) ممكن تلاقيه بسهولة في السوق ومضمون تلاقيه...

معنديش أدنى مشكلة في استخدام أي زيت آخر مادام مطابق للمواصفات المطلوبة..

عموما.. زيت الموبل1 X1 مطابق لمواصفة ILSAC GF-5.. بالإضافة إلى ACEA A1 و ACEA A5... وكمان معتمد بعلامة ديكسوس... يعني مطابق تماما لمواصات جنرال موتورز...

بالنسبالي.. الزيت ده أحسن لعربيتك من زيت وولفر اللي حضرتك بتستخدمه..

على العموم.. وولفر عندها زيوت ماشية مع المواصفات بالضبط... ادخل عليهم في الروابط دي:
Wolver Ultratec A1 5W-30
Wolver ProTec 5W-30

تقدر بردو تستخدم الزيوت دي.. ومطابقة تماما لمتطلبات موتورك... كلها بلزوجة 5W-30

زيت بترومين سوبر سنثتك A-1

PETROMIN LUBRICANTS PRODUCTS/

زيت ليكوي مولي سبيشال تك AA
Liqui Moly Special Tec AA 5W-30

زيت ليكوي مولي موليجين
Liqui Moly Molygen New Generation 5W-30

زيت ليكوي مولي سبيشال تك DX1
Liqui Moly Special Tec DX1 5W-30

زيت آمسويل OE
Amsoil OE 5W-30 Synthetic Motor Oil

زيت آمسويل XL
Amsoil https://www.amsoil.com/shop/by-product/motor-oil/gasoline/sae-5w-30-xl-extended-life-synthetic-motor-oil/?code=XLFQT-EA

آمسويل سجنتشر (الزيت التخليقي الحقيقي الوحيد المتوفر بسهولة نسبيا ومن أساس PAO)
ِAmsoil Signature Series 5W-30 Synthetic Motor Oil

المشاركة الأصلية كتبت بواسطة mohamedibk

معلش بدوش حضرتك وبتعبك معايا

مفيش تعب ولا حاجة.. وتحت أمرك في أي وقت


...