هل إنت شايف إن التهور في السواقة مرتبط بالشباب ؟
انا شايف معظم الناس مخلية فيه إقتران بين الشباب و التهور و إن الشاب اللي راكب عربية أبوه و أمه جايبنهاله و مش حاسس بتمنها و إن لو عمل حادثة بيجيبوله غيرها و إنه نازل الشارع فقط عشان يلعب و يجري و خلاص عرفنا قصة حياته و أبوه و أمه بمجرد إن شفناه معدي بالعربية ، و لو حصل أي موقف في الشارع بين شاب سايق عربية و راجل كبير سايق، الناس بتغلط الشاب قبل ما تعرف أي حاجة و من غير ما تشوف و مهما كان الموقف فا الشاب هو اللي غلطان .
فين حين إن انا كل يوم عالطريق بشوف الناس و الشعر الأبيض بيزغرط في دماغها بتاخد من أدامي غرز مميتة ! و مميتة بمعني مميتة ... و يبقي معاه مراته و ولاده في العربية و ماشي زي الثعبان في الطريق و غرز غرز غرز .. ده غير إن اما يبقوا ماشيين وراك يبقي لازق فيك يعني لو لمست الفرامل لأي ظرف إنتوا الإتنين ضعتوا ! و انا بصراحة ببقي مستغرب جداَ و انا عندي 21 سنة و بجري ورا واحد عنده 40 ولا 50 سنة عشان أقوله سوق كويس إنت مش لوحدك في الشارع .
انا مش عايز أخوض في حوارات قتلت بحثاَ زي إن الجيل اللي بيشتكي هو اللي ربي الجيل اللي بيشتكي منه في الأساس (هو يعني هيجيبوه من برة !؟) أو إن الشباب اللي بيترمي عليه كل اللوم جه الدنيا أصلاَ لقي البلد بتطلع في الروح .. انا بس هسأل سؤال بسيط جداَ
هل إنت شايف إن التهور في السواقة مرتبط بالشباب ؟