اكتب لكم قصتى فى تعليمى للقياده لتبقى ذكرى فى هذا المنتدى الجميل "قصه طويله شويه"
السلام عليكم يا جماعه
انا هحكيلكم مواقفى مع بدايه تعليمى للسواقه بس معلش هطول عليكم شويه لكن ياريت تقروها و ان شاء الله هتضحكوا جدا .. والمواقف كلها حقيقيه وحصلت معاى والله وانا بقول اللى انا فاكره منها بالظبط :O_stupid[1]:
مع العلم انى فى كل المواقف اللى كنت بسوق فيها كنت لوحدى والله العظيم ومحدش قعد جنبى خالص وانا بسوق فى اوائل مراحل عمرى فى السواقه .. يعنى اخرى كنت اخدت المبادئى من والدى وهتشوفوا كل ده فى حكايتى
عمرى فى هذا الجزء : من 16 الى 17 سنه
اولا سياره الوالد كانت من نوع بيجو 505 سيدان .. 2000 سى سى ..:B4_048:
البلد : مدينه زليتن - ليبيا .. "مدينه ساحليه تقع على البحر مباشره "
أول مره سقت سواقه حقيقيه ولفيت بالعربيه كتير وكده كان عمرى بالظبط 16 سنه
كنا بره مصر .. محاولاتى كلها كانت من ورا بابايه سرقه يعنى زى معظمنا كده :D ... كانت محاولاتى من اول خمسه ابتدائى .. وفى مرحله الاعدادى كنت بحرك العربيه كام متر ودايما تفصل منى وارجعها زق عشان مكنتش بعرف ارجع لورا ساعتها ...:D
فى احد سنين الاعدادى يمكن سنه اولى اعدادى .. بابا كان خرج ليصلى احد الصلوت علما اعتقد المغرب او العشاء .. وكان بيروح مشى من غير العربيه .. الجامع كان تقريبا على بعد 200 متير كده
المهم طلعت بره ومعاى مفتاح العربيه وعامل فيها عبده الشجيع :wink: ومكنتش افقه ساعتها كتير عن السواقه غير انى كان نفسى اسوق وخلاص !
فتحت باب العربيه اشطه جدا .. قعدت مكان كرسى السواق .. كينج قاعد على الكرسى .. هو مكانش كينج اوى يعنى لانه يدوب كان شايف بالعافيه من فوق الدركسيون :B4_048: .. {""" الجزء ده اللى بين الاقواس مش متأكد منه أوى للامانه المهم احاول اشغل العربيه .. اتارى بابايه كان مديها نقله .. فالعربيه اتنطرت شويه لقدام وطفت .. انا طبعا اتخضيت وفى نفس الوقت افتكرت انى مشيت بيها شويه """} .. وكنت ساعتها لعبت فى الاشارات والحاجات دى لدرجه انى نزلت بس من العربيه وناسى اشاره الانتظار شغاله .. وطبعا وانا نازل من العربيه عملت مسوجر الباب قفلته .. وببص ورايا يا خبر ابيض ! ده انا سبت المفتاح جوه .. يلهوى ايه العمل .. دخلت البيت والله جبت سكينه وفضلت احاول افتح العربيه والاشارات الانتظار شغاله .. وانا طبعا مرعوب ليلتى هتبقى طين :beatdeadhorse5::beatdeadhorse5:
طب ايه الحل .. ملقتش اى حل .. الصراحه حسب ما افتكر دخلت اعيط لماما .. غايت ما جيه بابا .. رننى العلقه التمام :_Alshmokh11::_Alshmokh11:
المهم دى كانت اول علقه تقريبا فى مجال تجربتى لقياده السيارات
تقريبا على نهايه المرحله الاعداديه فى دراستى كان بابايه ادانى مبادئى تعليم القياده بمعنى انه قالى العربيه بتتساق كذا وكذا وازى انقل وازى اعمل الحاجات دى كلها .. لكن مخلانيش اجرب وذلك لانى كنت صغير فى السن وغالبا لانى ابنه الوحيد " اخ ل 2 بنات " فأنا اعتقد انه مكانش عاوزنى اخاطر او اغامر او اطلع طايش يعنى
ومع ذلك الطيشان كان فى دمى :049: والسواقه دى من صغرى وانا بعشقها .. طبعا للامانه .. السواقه فى مصر حاجه :k40: .. وبره مصر فى الدول العربيه حاجه تانيه :k10:
يوم 31-12-2002 .. تاريخ عيد ميلادى 31-12-1986 .. اى كان عندى يومها بالظبط 16 سنه .. كنا فى سوق الخضروات .. السوق ده فى جنبه ارض كده شويه منها زراعى على شويه طريق رملى كويس يتمشى فيه بالعربيه .. ده طبعا يوم عيد ميلادى .. انا قلت انا لازم اسوق لازم .. بابا كان نزل يشترى متطلبات البيت من السوق .. طبعا هناك السوق حاجه كبيره جدا .. على مساحه 1 كيلو متر مربع على الاقل !
شغلت العربيه .. اجى امشى تفصل .. اشغلها تانى غايت ما تمكنت منها كويس جدا والله يومها كنت هطير من الفرح .. الصراحه اخدت بالعربيه لفه محترمه جدا وكنت بمشى جنب العربيات اللى راكنه من غير ما اخبط فى اى عربيه والله وحمد لله كانت ثقتى بنفسى عاليه جدا ساعتها وبعد اللفه الحلوه اللى اخدتها قلت ارجع العربيه تانى فى مكانها ورجعتها وكنت ميت من الفرح :wink::049::wink:
المهم بقى وانا عندى 16 سنه كنت بسوق كويس جدا حمد لله ساعتها وكنت دايما بطلع بالعربيه الساعه 2 بليل يكون بابايه نام ... بحكم المدينه اللى كنت فيها كانت الشوارع نظيفه وزحمه مش زى هنا خالص .. ف كنت بجرى بيها كتير
والله انا هحكيلكم شويه مواقف لسه والله فاكرها كويس جدا ...
مره كنت ماشى بليل الساعه 2 كده بالعربيه طبعا انا مكنتش محترف جدا ساعتها ف ساعات لما كنت ابدل الغيارات احرق بنزين من غير اصدى ..
المهم مره ماشى فى امان الله وكنت نازل من على كوبرى ونازل داخل ف شارع جانبى حارتين بس كان فاضى وسريع يعنى .. لقيت لك شويه شباب وقفولى ف نص الشارع وانا لوحدى فى العربيه وهما شكلهم سكرانين ولا مش عارف مالهم .. طبعا انا قلت مستحيل اقف وايلا هروح فى داهيه الله اعلم دول عاوزين ايه انا كنت على التانى او على التالت ساعتها الله اعلم ! .. المهم رحت جايب العربيه على الاول ودستلك بقى بنزين يا معلم خليت العربيه جايه من بعيد بسرعه معتدله لكن صور الموتور كان عالى جدا بطريقه فظيعه لانى كنت بحرق على الاول ورحت والله باصص تحت كأنى باصص على الدواسه اللى تحت رجلى وهما شايفنى وانا عامل كده ومش باصص لهم وفاتح ناحيتهم وطلعوا كلهم يجروا والله من نص الشارع لدرجه انى شفت شبشب واحد منهم طاير قدامى قدام العربيه .. والحمد لله الموقف عدى سليم ..
لكن بعدها بكام اسبوع لقينا قزاز العربيه الورانى متكسر والكاوتشات متقطعه والله .. بس حمد لله جت على اد كده ومحدش من الاسره او العائله عرف بأى حاجه ومحدش حصله مكروه ولم ولا يعلموا حتى الان ما السبب .. انا اخمن انى فى الغالب السبب الا اذا كان هناك سبب اخر حيث ان احنا كنا فى مدينه ناحيه مكان على بعد حوالى 200 متر الناس بتسكر وتشرب فيه كل يوم خميس تقريبا !
ده موقف من المواقف اللى حصلت لى !
موقف تانى .. كنت ماشى فى نص المدينه عادى جدا بالعربيه وكان الكلام ده فى وسط النهار .. غالبا بابا كان نايم برضه بعد ما جيه من الشغل .. وانا شكلى لسه صغير 16 سنه علما افتكر برضه ولقيتلك عربيه شرطه نوبيرا 2 جاى فى الطريق العكسى ليا ! او معرفش يمكن انا اللى كنت عسكى ساعتها ! ولقيته وقف جنبى وبيشاور لى اقف .. والله العظيم انا اترعبت من جوايا .. اعمل ايه معيش رخصه .. ده انا حتى معيش رخصه العربيه .. والله من غير تفكير .. رحت دايس بنزين بغباء .. فعلا ب غباء جدا ورحت العربيه فاركه فى الارض ومديها اول تانى تالت رابع زى الصاروخ غايت البيت لدرجه انى والله موقفتش خالص تقريبا حتى فى الاشارات !
ونزلت من العربيه بسرعه دخلت البيت وقبل ما اخش البيت بصيت ورايا والله لقيت زى اثر مشى العربيه بالسرعه ا لجنونيه الهوا طاير مع التراب والعربيه مولعه نار طفيتها ودخلت .. والحمد لله الموقف ده عدى على خير هوه كمان !
كنت بطلع على الطريق السريع كتير وامشى بسرعات عاليه جدا واعدى بين عربيات نقل والله واخد غرز على كوبريات ..
كنت بصراحه فى السن دى اعصابى حديد وقلبى قوى جدا واقدر امرجح العربيه يمين وشمال واتحكم فيها كويس جدا مع انها كانت ضخمه الحجم بالنسبه لانها عربيه بيجو 505 !
مره والله العظيم .. شفت واحد جارنا .. واحد كده انا مش بطيقه .. لقيته فى وسط المدينه .. وانا ماشى العربيه وهو بعربيته .. وشد قدامى سبقنى يعنى .. طلعت فى دماغى .. ازاى يسيقنى .. والله لوريه .. والشارع رايح جاى والله .. رحت مسقط غيارات ودايس بنزين جامد جدا .. الشارع كان شبه اول شارع مصر والسودان من ناحيه ميدان حدائق القبه لو حد عارفه يعنى الشارع رايح جاى لكن مفيش رصيف فى النص .. لكن الشارع كان اوسع شويه من شارع مصر والسودان .. المهم رحت دب واخد غرزه منه وماشى فى نص الشارع غايت ما عديته بكام عربيه .. ورحت مميل ناحيه اليمين واستنيته فى اخر الشارع وبصيلته كده اما وصلى بزغره احتقار ورحت فاتح تانى بعدها .. وعلى فكره بعد الموقف ده فى الشارع مره كنت ماشى وهو ماشى برضه من غير عربيات واتخانقنا ف الشارع بسبب اللى حصل ده :B4_592:
مرات كتير كنت باخد عربيه بابا مثلا الساعه 7 الصبح ولا حاجه .. هو كان بيقولى اطلع اسخن العربيات ويحذرنى انى اسوقها .. المهم انا كنت بسوقها الصراحه واروح بيها عند مدرستى الثانويه .. وكما يفعل معظم الشباب تفحيط ردم هدم مش عارف ايه كنت بروح اعمل زيهم اخطفلى ربع ساعه وارجع بسرعه قبل ما بابا يطلع من البيت :049:
طبعا بابا كان بيطلع يلاقى العربيه سخنه جدا .. اكيد من كتر التفحيط واللى حصل فيها وكان بيسألى الصراحه مرات انت سقتها .. وبأمانه .. انا كنت بكذب :H_angry[1]:
المهم فى مره من المرات اللى كنت باخد فيها العربيه الصبح واروح عند مدرستى لقيته طلع مستنينى قدام البيت وانا راجع بالعربيه يا خبر ابيض .. هعمل ايه ! كارثه
وقفت ونزلت من العربيه قدامه من سكات وكنت علما افتكر سبتها فى نص الشارع ساعتها كمان .. دى علما افتكر كانت اول مره بابا يشوفنى بسوق فيها ..
المهم دخلت البيت رزعنى حته دين قلم مش هنساه غايت دلوقتى والعلقه التمام :_Alshmokh11::_Alshmokh11:
من ساعتها عرف انى كنت بعرف اسوق .. ومرات بليل خالص كان بيخلينى اسوق شارع صغير وهو قاعد جنبى مثلا .. بس مكانش مدينى مطلق الحريه
ده انا حتى والله مره من المرات اللى كان جنبى رحت واخد العربيه وبقصدى والله كنت بروش قدامه رحت وانا داخل على ملف خليت العربيه تعمل حته Drift كده .. قالى انت بتعمل ايه .. بزعيق علما اتذكر .. اكيد بزعيق :Oc_sun1[1]: .. قلت له متخفش عادى بقصدى :biggrin:
بعد كده بقى .. قلت مش هينفع كده انا طبعا كنت كل مره اخد المفتاح من وراه وهو نايم كان حاطه فى جيب جاكيت بنطلون .. اى حاجه المهم كنت بخش عليه الصراحه وهو نايم واتسحب زى الحرامى واقلب المفتاح واطلع الف لفه محترمه بالعربيه وارجع ..:verygood: .. طبعا النظام ده ممشيش معاى .. قلت انا خايف يقفشنى وانا بقلب المفتاح ويصحى .. رحت عملت نسخه على المفتاح ..:049:
وفى مره من المرات برضه كان نايم فى وسط اليوم كده وانا كنت طالع الف شويه بالعربيه .. ولفيت لفه صغيره اوى وراجع ابص من قدام البيت لقيت طالع و عينه حمرا .. الظاهر جاله حلم وحش انى بسوق العربيه .. كابوس مزعج صحاه ولا حاجه .. وطبعا انا كنت ناسخ مفتاح ا لعربيه زى الحراميه .. ومشيت براحه اوى وافكر اعمل ايه يلهوى هيشوف المفتاح .. اعمل ايه اعمل ايه .. رحت والله العظيم فصلت المفتاح عن الكونتاكت .. والعربيه بتفضل شغالهه عادى لكن لو حاولت تلف الدريكسيون القفل بتاعه بيقل .. المهم فصلت المفتاح عن الكونتكات وبخفه رميته تحت الكرسى اللى جنبى .. :049: .. ومشيت غايت عنده من غير مفتاح :O_stupid[1]: اه والله ده اللى حصل .. وانا بقى لما قربت منه بحاول اعدل العربيه .. هوب راح الدركسيون عامل ال Lock .. قالى ادخل جوه البيت ..
اترنيت حته دين علقه .. اخت اللى قبلها بالظبط :_Alshmokh11::_Alshmokh11:
وفضل بابا يسألنى ازاى سقت العربيه كده .. وزى ما بعمل كل مره كذبت عليه .. ده انا دورت العربيه ورجعت المفتاح تانى جوه البيت وطلعت سقتها وال Lock بتاع الدركسيون مقفول .. قلت له كده على اساس انى لفيت لفه صغيره وفى شوارع واسعه :049:
طبعا كنت من الحين للاخر بطلع بالعربيه والف بيها كالعاده !
طب ده انا والله فى مره من المرات ماشى بالعربيه كنا ف وسط النهار برضه .. لقيت واحد صحبه فى الشارع .. زميله فى الشغل يعنى ..انا من جوايا يا خبر ابيض .. ده اكيد هيقول لبابا على انه شافنى .. المهم اما قربت منه شاورلى .. وقفت له .. قالى تعالى وصلنى البيت .. وطبعا انا فى ثقه كبيره عامل عبيط ومش معرفه اكيد انى سارق ا لعربيه .. ووصلته البيت ودعيت على اليوم اللى شفته فيه .. مش فاكر الصراحه هو قال ل بابا ساعتها ولا لا
بس لو كان قاله اكيد كنت خدت علقه تمام برضه :mad2:
فى مره من المرات اللى بابا كان بيرضى فيها عليا ويخلينى اسوق وهوه قاعد جنبى .. كنا ماشين على الساعه 1 بليل مثلا كده .. واذا بينا نلاقى كمين قدامنا .. ومش أى كمين .. دى أعلى شرطه موجوده فى البلد كلها .. اسمها " الدعم المركزى " ودى اقوى شرطه واعلى شرطه فى الدوله كلها .. ودول اللبس بتاعهم بيكون لبس صاعقه ازرق .. واقل سلاح معاهم رشاش ألى والعربيات بتاعتهم اللى هيه التويوتا تقريبا اللى عامله زى النص نقل دى .. مش بتاعت مصر التعبانه اكيد .. حاجه اضخم بكتير زى اللى بيتشال فيها اسلحه مضاده للطائرات .. واذا بواحد منهم بيقولى اقف على الجنب .. انا طبعا كنت بتحايل على بابا قبلها عشان يخلينى اسوق .. اول ما اقول اقف على الجنب حسيت انا بابا هيموتنى .. وبعدين الراجل جيه ورا العربيه .. طبعا انا نزلت صدرت نفسى فى الوش وقبل ما اى حد ينطق ب كلمه ولا يطلب رخصه قلت بسرعه انا لسه بتعلم السواقه .. وراح باباه قاله نفس الكلمه علما اتذكر .. المهم حمد لله بتاع الدعم المركزى عداها لينا بحكم اننا مش من الدوله وكمان ناس محترمه يعنى مش حشاشين ولا بتوع حريم لا قدر الله
المهم بابا جاى يسوق بقى بعد ما الراجل شاف ورق العربيه .. راح الراجل بتاع ا لدعم المركزى قاله خليه يكمل عادى .. الصراحه انا فرحت جدا اما قال كده ورحت ركبت وقلت لبابا تعالى بس متخفش :wink: ورحت مكمل سواقه لحد البيت عادى جدا :B4_048:
نأتى هنا لاول حادثه علمتها فى حياتى بقى .. كان راكب جنبى واحد صحبى عراقى .. وانا ماشى جدا فى امان الله .. وجاى وانا ماشى على الحاره اليمين والشارع عباره عن حارتين .. وانا فى اليمين عاوز الف شمال رحت من غير تفكير مره واحده لافف شمال والاقيلاك عربيه لبست فيا من ورا .. الصراحه اانا زودت السرعه جدا عشان الحادثه تخف شويه ورحت بعدها مكمل اللفه وجريت بالعربيه والله ..
والراجل التانى جاى ورايا وانا مرعوب اعمل ايه مصيبه دى .. العربيه عندى محصلهاش خاجه خالص . لكن عنده هو الفانوس الشمال طار وكانت عربيته علما اتذكر مازدا 929 سيدان موديل تسعينات او 2000
المهم صاحبى وانا بجرى بالعربيه عمال يقولى اقف اقف اقوله هنعمل ايه ومش عارف ايه .. قالى اقف بس وانا هتصرف .. وفعلا وقفت .. ونزل هوه اتكلم مع الراجل اللى ف العربيه التانيه .. مش فاكر صحبى قاله ايه ساعته بصراحه لكن اللى فاكره ان الراجل نادانى واتكلم عادى جدا وقالى حصل خير ومش عارف ايه واهم حاجه ان احنا كويسين ومحدش تأذى من الحادث .. الصراحه قمه فى الاحترام .. والراجل لم يطلب منى مليم واحد !
ياريت الناس فى مصر تعرف المواقف دى .. :k10::k10:
وحمد لله يومها روحت البيت بخير
الى هنا اتممت كتابتى وهذه اول مره والله اكتب القصه دى ...
وان شاء الله اتابع معاكم جزء تانى قيادتى فى مصر ... :E_braces[1]:
علما بأنى كتبت هذه القصه من حوالى الساعه 11:55 pm بتاريخ 13-12-2008
وغايت الساعه ا لان 1:08 am بتاريخ 14-12-2008
حوالى ساعه وشويه بكتب كتابه مستمره من المواقف اللى لسه فاكرها كويس جدا
ارجوا ان ينال الموضوع اعجابكم
وانا اسف للاطاله:k10:
ويارب لو فى اى جزء فى القصه قلت مكانش حصل بالظبط فى المواقف دى ربنا يسامحنى عليه لانى قلت اللى انا فاكره بالظبط :k10:
