نصائح سائق جديد .... لمواجهة الخوف ... والاجابة على تساؤلات المبتدأين
نصائح سائق جديد
ـــــــــــــــــــــــــ ــ
اول نصيحة هى
ـــــــــــــــــــــــ
رجلك على الفرامل واضغط دبرياش وانت بتعدى على اى تقاطع او اى يوتيرن او زحمة
لو ظهر لك اى حاجة هاتضغط على الفرامل علطول
طبعا لازم تدرب على الموضوع ده كثير
تمشى وتدخل على تقاطعات او يوتيرن .... فى اى وقت وقفت انقل الغيار ببساطة والعربية موش هاتبطل منك
ولو حصل وظهر لك اى شىء مفاجىء رجلك اساسا على الفراممل مافيش اى مشاكل اضغط على الفرامل
لا قدر الله
لو دخلت على تقاطع او يوتيرن ورجلك كانت على البنزين مع الخوف هاتتلخبط وتضغط على البنزين بدل الفرامل وتحصل مشكلة لا قدر الله
طبعا محتاج انك تتدرب ازاى تتحكم فى سرعة العربية عن طريق الفرامل
تفضل تضغط عليها براحة لحد ما تاخد السرعة المناسبة
مثلا اليوتيرن لازم اكون داخل براحة قوى
التقاطعات لازم اكون مهدى العربية كويس
واى مكان فيه زحام متوقع
فى المنحنيات والتقاطعات المفروض تدخل عليها بسرعة بسيطة
عشان لو ظهر لك اى حد بشكال مفاجىء او خطأ تلحق تقف ببساطة
النصيحة التالية
ـــــــــــــــــــــــ
اى ملف لازم تكون هادىء جدا فى سرعتك وتكون داخل الحارة اللى بتلف فيها طبعا فى الغالب بجوار الرصيف
واوعى تخرج من حارتك الا بعد ما العربية تعدل نفسها
وقبل ما تدخل الملف لازم تنظرعلى الناحيتين يمين وشمال
يعنى لو داخل يمين ... انظر شمال بسرعة على العربيات اللى جاية
وارجع انظر امام عربيتك
اوعى تنسى وتفضل باصص على العربيات اللى جاية من الشمال
لحد ما عربيتك تنزل نص الشارع وانت سرحان
نفس الكلام لو داخل شمال
وطبعا والعربية بتلف تكون محضر الغيار المناسب عشان تمشى على طول
وما دام رجلك اصلا ضاغطة على الدبرياج هاتقدر تختار الغيار المناسب بسرعة وكده العربيات اللى خلفك موش هاتعمل لك كلاكس لانك ماشى كويس
ولو بتلف فى حارتك بجوار الرصيف
حتى ولو فيه حد جاى بعربيته وبيجرى هاتكون انت فى امان
فى الاول والآخر انت داخل صح بجوار الرصيف وملتزم بحارتك تماما ولا يوجد عليك اى خطأ
واوعى تنقل نفسك من الحارة اللى بجوار الرصيف فجأة دون النظر فى المرايات
اما لو كنت بتعمل يوتيرن
وكنت فى الحارة الخارجية وليست الحارة التى بجوار الرصيف
نفس الكلام لازم تفضل ملتزم بها
واوهى تخرج منها حتى بعد ما تلف بالعربية اليوتيرن
عشان ما ترميش نفسك على اى عربية ثانية
النصيحة التالية
ــــــــــــــــــــ
الاتلزام بالحارة التى تسير فيها
يعنى الحكومة عاملة خط بين كل حارة
اوعى تمشى على الخط
لان كده معناه انك شاغل حارتين
والعربيات عشان تعدى منك لازم تعملك "كلاكس" وتسبب لك ازعاج وارتباك
عشان كده لازم تمشى داخل حارتك تماما وليس على الخط الموجود بين الحارتين
كده اللى عايز يعدى هايعدى بدون مشاكل وعمره ما هايضايق منك حتى ولو كنت ماشى بطىء
النصيحة التالية
ــــــــــــــــــــــ
لو كنت فى شارع سريع مثلا "شارع المطار"
وانت فى طريقك الى المطار
طبعا صعب انك تمشى فى وسط الشارع وانت بطىء
خصوصا انه معروف ان الشارع ده بتاع جرى
يبقى الافضل انك تمشى فى اليمين على ادك
النصيحة التالية
ـــــــــــــــــــــــــ
لو حصل وظهر لك مطب
اوعى تغير مسار عربيتك الى حارة تانية
الافضل تاخد المطب وامرك لله
احسن ما تغير مسار العربية فجأة الى حارة ثانية وتسبب خطر لك وللأخرين
كل العربيات بتاخد مطبات مافيش مشاكل
لكن الخطر انك تخبط عربية تانية
طبعا ممكن تغير مسار عربيتك من حارة الى حارة بعد النظر فى المرايات والتأكد من خلو الطريق والانتقال يكون تدريجى "سنة سنة" وبراحة قوى ولو فيه اشارة يبقى هايل عشان اللى جاى وراك ياخد باله
ولو ظهر لك حد ماشى على رجليه امامك
انا من وجهة نظرى الافضل تهدى سرعتك حتى لو لزم الامر انك تقف تماما بالسيارة
افضل من انك تغير حارتك وتسبب مشاكل للآخرين
خصوصا لو عديت امام المشاة ممكن يجرى امامك بدل ما يتوقف وساعتها تحصلة مشكلة كبيرة لا قدر الله
النصيحة التالية
ـــــــــــــــــــــ
لو حصل وكنت عايز تقف مرة واحدة او هاتنقل نفسك من حارة الى حارة او هاتلف فى يوتيرن
لازم تنظر فى المراية كويس وتشوف مين اللى جاى وراك او بجوارك ..... ودى اصعب حاجة "موضوع استعمال المرايات"
خصوصا ان المرايات فيها نقاط عمياء لا تظره فيها السييارة الموجودة بجوار الباب الخلفى ولما تنقل نفسك من حارة الى حارة تفاجىء بأن فيه عربية بجوار الباب الخلفى وانت موش شايفها
معلهش دى بالممارسة والتدريب الجيد جدا جدا لازم تراعى الموضوع ده لانه بيحصل من مشاكل كثيير
النصيحة التالية
ــــــــــــــــــــــ
لو مشيت لوحدك بالعربية يفضل يكون يوم الجمعة مثلا قبل الصلاة الساعة 8 صباحا
امشى ساعة ولا ساعتين مافيش مشاكل عشان تاخد الثقة
النصيحة التالية
ـــــــــــــــــ
لو حبيت تركن عربيتك
اركن ف مكان واسع فى الاول
لحد ما تتعلم الركنة كويس
ما تحاولش تركن فى مكان ضيق وانت لسه بتتعلم عشان ما تخبطش عربيتك وعربيات الناس التانية
فى البداية موش لازم تجرى بالعربية
كفاية انك تمشى بها حوالى 60 كيلوا
لحد ما تتعود على المشى كويس
وتنقل الغيارات بسهولة
وتقدر تقف لو ظهر اى حاجة مفاجأة
السرعة المطلوبة فى نقل الغيار المناسب وليس الجرى بسرعة
السرعة مطلوبة فى اختيار المكان المناسب للسير عشان ما عطلش باقى السيارات
النصيحة التالية
ـــــــــــــــــــــــ
لازم يكون بينك وبين السيارة التى امامك مسافة
لازم تحافظ على المسافة دى
النصيحة التالية
ـــــــــــــــــــــ
لو ماشى فى طريق طوالى
ممكن ترفع رجلك عن البنزين
عشان السرعة تخف
تدون الحاجة الى الضغط على الفرامل
الفرامل فقط فى التقاطعات والزحام واليوتيرن
رجلك لازم تكون عليها ومستعدة
والتوقف لا يكون مفاجىء بل تدريجى
بعد التدريب هاتقدر تعرف قوة فرامل عربيتك وتحس بها
واخيرا اوعى تمشى فى اماكن زحمة عشان ثقتك فى نفسك ما تتهزش
امشى مع اى حد راكب معاك فى اماكن خالية وخليه يعلمك
وتدريجى اختر اماكن زحمة
وفى اوقات مختلفة
النصيحة التالية
ــــــــــــــــــــــــ
لو هاتعدى مطب صناعى
لازم تتحكم فى الفرامل وسرعة العربية
واول ما عجل العربية الامامى يكون فوق المطب وهايبدأ ينزل
تكون اخترت الغيار المناسب "الاول او الثانى" حسب سرعة العربية
وطبعا ما دمت انت دايس على الدبرياج اساسا وانت بتعدى المطب
خلاص هاتختار الغيار المناسب وهاتمشى على طول
لدرجة ان العربيات اللى خلفك موش خاتحس انك مبتدأ
لازم تتدرب على الموضوع ده كثيير وتختار شارع يكون فيه مطب صناعى
النصيحة التالية
ـــــــــــــــــــــ
احترس من اى سيارة بتركن
او خارجة من جراج
او رتفتح الباب
احترس من الاطفال وتحركهم المفاجىء
احترس من سيارات الاجرة والميكروباس والتوك توك لان توقفهم مفاجىء ومتكرر وفى اى مكان بدون تحذير
وفى البداية فى ناس تفضل انك تمشى فى جهة اليسار بجوار الرصيف
واللى عايز يجرى يجرى
خصوصا ان كل تركيزك هايكون فى اللى جنبك من الجهة اليمنى فقط
طبعا الكلام ده ينفع فى الطريق الداخلى فقط
لكن لو كان الطريق سريق يبقى خطأ انك تمشى شمال وانت سرعتك بطيئة جدا
رأى الشخصى الافضل انك تمشى فى منتصف الشارع ... واللى عايز يجرى شمال يجرى ... واللى عايز يتوقف على اليمين يتوقف .... وانت مالكش دعوة خليك فى منتصف الشارع علطول
ان شاء الله هاتابع معاكم
وكل مرة هايكون فيه جديد
فى انتظار تفاعلكم والرد على استفسارتكم بصدر رحب
مع اطيب التمنيات
اخوكم حسين غزالة
