الموضوع: عطل بتكييف النيسان الصني الشكل القديم n16 موديل 2010

حضرتك قلت إن التكييف كان ممتاز في أول 5 سنوات وبعدين بدأ يضعف...

دي أعراض نقص الفريون .. وغالبا السبب هو التسريب

لما التكييف بيفصل ده بيكون بسبب إن الفريون ناقص جدا للدرجة اللي نظام التكييف بيفصل الشغل علشان الكمبريسور ما يبوظش..

الموضوع ده معمول لسلامة النظام والحفاظ عليه لإن مسألة الضغوط فيه حساسة جدا..

الوضع حاليا (حسب تصوري) هو كالتالي:

الأورنجات والأويلسيلات (موانع التسريب) بتاعت الوصلات والكمبريسور نشفت وما بقت تمنع التسريب.. ومهما تحط فريون هيسرب تاني..

المشكلة التانية كمان إن الدايرة حاليا فيها هواء بالإضافة إلى الفريون.. وده في حد ذاته مشكلة لإن الفريون له ضغط معين علشان يبرد (الضغط اللي المفروض الكمبريسور يضغطه علشان الفريون يتحول من الحالة الغازية إلى الحالة السائلة) في حين إن الهوا ضغطه مختلف تماما..

علشان كده لازم اللي يشتغل على التكييف عندك يسحب كل الغازات الموجودة في الدايرة (عندهم طلمبة شفط للموضوع ده) وبعدين يضخ الفريون.. وده كله لازم يتعمل بعد تغيير موانع التسريب.

ممكن حضرتك تراجع بنفسك على مواسير التكييف... ببساطة هتلاقي المكان اللي بيسرب فريون عليه طين أو تراب مزيت.. ولو ما لقيتش حاجة فتقدر تستخدم محلول صابون بحيث تكتشف التسريب لما تظهرلك فقاعات..

الصورة دي لشكل صامولة أحد مواسير التكييف:


ممكن برده المواسير دي تكون بتسرب نتيجة شرخ أو خرم صغير... ودي مالهاش حل غير تغيير الماسورة أو اللحام.. بس اللحام ده عايز لحام ألومنيوم ودول قليلين جدا في مصر..

عموما.. ادخل على الموضوع ده علشان تعرف أكتر عن تسريب الفريون في العربيات..

Automotive Air Conditioner Problems, Part III

مشكلة صنايعية التكييف في مصر إنهم متعودين على شغل التلاجات ومكيفات المنازل.. ودي أنظمة مقفولة تماما مفيهاش أي توصيلات مربوطة.. كله لحام.. وبالتالي فاحتمال تسريب الفريون يكاد يكون معدوم.

...