إحذر الانتشار السريع , والكماين العجيبة !

**ihab** · 16-12-2008 08:26 AM

لا الفوجات العادية مش الزينون و الاصلى الموجودة فى العربية كمان مش اللى راكبة كاكسسوار

**D . a .\ AYMAN** · 16-12-2008 10:02 AM

المشاركة الأصلية كتبت بواسطة MoToRiZeR

طب حضرتك لو الواحد ضابط وقفه و قاله انا هفتش العربية يتصرف معاه إزاي ؟ لأن انا متحطتش في الموقف ده قبل كدة .

و شكراَ علي المعلومات .

المشاركة الأصلية كتبت بواسطة Rafraf

صح انا عايز اعرف لو واحد قالى هفتش العربية!

اعمل له ايه!

ياجماعة مانا قلت

لا يعد من قبيل التفتيش الأمر بوقف السيارات الخاصة والعامة والأجرة للتأكد من مراعاة القواعد الخاصة بالتراخيص وسلامة المركبة الآلية أو للتفتيش عن مجرم هارب أو التأكد من شخصية ركابها أو أي سبب آخر من هذا القبيل كل ده صح ومظبوط ...

يعني من حقه يبص جوة العربية بعنيه فقط ويبص في الشنطة وبس ...

وهاتلاقوا معظم الضباط أصلا مابيعملوش أكتر من كده لأنهم برضه بيبقوا فاهمين شغلهم وعارف هو حدوده ... المهم زي ماقلت ميقعدش يدعبس في أماكن خاصة زي درج التابلوه مثلا

يعني لو جه يقلب في العربية ويبص تحت الكراسي ويفتح التابلوه وما الى ذلك حضرتك المفروض توقفه وتقوله لحد هنا وتقف

وخلوا بالكوا انه لازم يكون ضابط اللى بيعمل كده مش أقل ولو أمين شرطة فلازم يكون في ظابط واقف معاه وهو بينفذ أوامره

المشاركة الأصلية كتبت بواسطة Rafraf

وكمان الفوجات فيها ايه؟ دى نازلة مع العربية!!

إحتمال يكونوا بيدخلوها جوة النص اللى بيمنع الإضاءة المبهرة ودي طبعا تبقى تلكيكة

**MohaMed_Refaat** · 16-12-2008 12:55 PM

المشاركة الأصلية كتبت بواسطة MoToRiZeR

انا كتبت قبل كدة هنا يا أحمد عن الأمين بتاع لجنة المطب ده :d الراجل ده مسخرة .. انا كنت بفكر و الله بجد ألف في اليوتيرن و أخش الكمين تاني عشان خاطره :d

اما التاني ده بقي اللي بيقولك إنت و حظك 100 ولا 150 فعلاَ بيجسد الإتاوة في أحسن صورها و اما السلطة تبقي في إيد واحد جاهل .

الظاهرة اللي انا ملاحظها بقي إن ضباط الشرطة و المرور حالياَ قرفانين زينا بالضبط !! يعني أقف مع ضابط موقفني في كمين ولا اما يحصل مشكلة و أروح القسم و أقعد أدردش معاهم شوية ألاقي الضابط بيقولي الله يخرب بيت التعليمات و والله حرام اللي إحنا فيه ده و يرضي مين و انا لو عليا أشيل الناس فوق دماغي ما الناس دي أهلنا و حبايبنا و يخرب بيت اللي بيحبه و هو من جواه بيحبه و واقف جنبيه واحد بيكرهه و كدة، و ده بيأكدلي كل يوم إن التغيير لازم يبقي من فوق لأن فيه ناس تحت زي الفل و تقف مع الضابط تلاقيه راجل زي العسل .

و أكتر ضباط محترمين بيبقوا في منطقة اكتوبر خاصة زايد ، انا من كام يوم كدة حصلي مشكلة في شقة زايد قمت مكلم البوليس و انا كلي يأس يعني، مفيش 10 دقائق لقيت مأمور القسم جه ! يا نهار إسود .. و بيقولي خير يا فندم فيه حاجة ؟ قلتله حضرتك حصل كذا كذا كذا .. فا فهم الموضوع و قاللي إنت محتاج تعمل محضر في مقر القسم ، إعمله و انا هتابع كل حاجة -كل ده بدون واسطة أو أي حاجة- قلتله حضرتك بصراحة انا معرفش القسم فين .. قام مطلع اللاسلكي .. خمس دقائق لقيت عربية أوكتافيا من بتوع الدورية مشيت قدامي لحد القسم .. دخلت لقيت الناس شايلاني من عالأرض شيل !! بقيت مش مصدق نفسي .. و إحنا بنكتب المحضر رئيس التحقيقات يسألني حاجة فا أقعد أفكر يقولي فكر براحتك بس عشان نعمل المحضر مضبوط و حقك يجيلك .. عملنا كل حاجة و انا ماشي كان المأمور رجع من مشوار تاني .. سلم عليا بحرارة و قاللي ها كله تمام ؟ قلتله تمام التمام و الله حضرتك مش عارف أقولكم إيه !! قاللي لأ إزاي أمال إحنا قاعدين في القسم ليه .. ألف سلامة يا فندم نورتنا (مأمور القسم! و انا يعني شاب عندي 21 سنة) .. و انا خارج داخل راجل شكله بسيط كدة ممكن يكون بواب أو حارس أحد العمارات في زايد بيقول "إنجدوني يا بيه!!" لقيت المأمور إستقبله نفس الإستقبال "خير يا فندم خير إن شاء الله إتفضل"

القسم بتاع زايد الحقيقة يستحق تحية جامدة لأن انا من فترة قريبة برضه كنت في قسم تاني و كانت المعاملة النقيض من دي تماماَ و كان هيحصل مشكلة عشان انا خنقي ضيق .

برضه من فترة وقفني لجنة رادار في أخر طريق العلمين و الضابط كان رتبة و كان راجل زي العسل (رغم إنه دفعني الرادار برضه) و قعدت معاه شوية قعد يقولي ريح من السفر بقي إنت زي إبني و دفعت الغرامة و انا مبسوط تخيل ! شوية و جه راجل سايق مرسيدس متصور رادار علي 150 قعد معانا برده و عملنا حفلة شاي بلبن ( يا جماعة ده مش فيلم كوميدي بجد و الله

) و قعدنا نتكلم شوية في المرور و أحوال البلد .. و إزاي انا هقضي اليوم بعد ما الفلوس نقصت 150 جنيه .. و مشيت و انا مبسوط يعني و مستعد للأجازة اللي انا واخدها و كلي أمل في الحياة ! رغم إني ملسوع غرامة جامدة

اللي عايز أوضحه إن طلع فيه رجال شرطة محترمين فعلاَ بس زي ما إنت قلت يا أحمد ده واحد صحي الصبح راح شغله إدوله بوكس و أربع موتوسيكلات و قالوله ترجعلنا مش بأقل من 9 الاف جنيه .. فا لازم يرخم علي سعادتك .. العيب في النظام اللي حول الجميع إلي دمية يحرك خيوطها بمزاجه .. خاصة و إحنا في الموسم بتاعهم و الإنتشار هيفضل سريع لحد 25 يناير كل سنة و إنت طيب .

حضرتك بتهزر ولا بتتكلم جد معقولة الكلام دة فى مصر ؟؟؟؟ انا عمرها محصلت معيا دة انت اكيد بتتكلم عن مسلسل شوفتة على سوبر مفيز ولا حاجة لا موش قادر اصدق انا اجى انقل واعيش فى زايد وخلاص .

**ahm3d ham>ed** · 17-12-2008 07:24 PM

كشفات الضباب!
لية هو ناقص اية تانى؟

مايشيلوا الكسوة بتاعت الكراسي كمان والسي الدى ََ

**SeiffoZ** · 17-12-2008 09:04 PM

المشاركة الأصلية كتبت بواسطة MoToRiZeR

ده حقيقي .. لكن قانون الطوارئ بيسمح للضابط يفتش العربية و يفتشك شخصياَ .. المشكلة في قانون الطوارئ .. بيلغي الحقوق و بيمسح أي قانون تاني بالأستيكة .

متهيألى يا MotoRizer إن قانون الطوارئ ليه شروط معينة إنه يتنفذ مش أى ظابط كده و السلام ..
بس انا مش عارفها

**MoToRiZeR** · 22-12-2008 03:02 AM

المشاركة الأصلية كتبت بواسطة NYSMA

ياجماعة مانا قلت

لا يعد من قبيل التفتيش الأمر بوقف السيارات الخاصة والعامة والأجرة للتأكد من مراعاة القواعد الخاصة بالتراخيص وسلامة المركبة الآلية أو للتفتيش عن مجرم هارب أو التأكد من شخصية ركابها أو أي سبب آخر من هذا القبيل كل ده صح ومظبوط ...

يعني من حقه يبص جوة العربية بعنيه فقط ويبص في الشنطة وبس ...

وهاتلاقوا معظم الضباط أصلا مابيعملوش أكتر من كده لأنهم برضه بيبقوا فاهمين شغلهم وعارف هو حدوده ... المهم زي ماقلت ميقعدش يدعبس في أماكن خاصة زي درج التابلوه مثلا

يعني لو جه يقلب في العربية ويبص تحت الكراسي ويفتح التابلوه وما الى ذلك حضرتك المفروض توقفه وتقوله لحد هنا وتقف

وخلوا بالكوا انه لازم يكون ضابط اللى بيعمل كده مش أقل ولو أمين شرطة فلازم يكون في ظابط واقف معاه وهو بينفذ أوامره

إحتمال يكونوا بيدخلوها جوة النص اللى بيمنع الإضاءة المبهرة ودي طبعا تبقى تلكيكة

كلام جميل .. طب في حالة إن الضابط أصر يفتش العربية و إستخدم طريقة "يعني إيه أقف لحد هنا" و "طب إنت قاعد معانا شوية" و إبتدي يقل أدبه .. الحل إيه ؟

**D . a .\ AYMAN** · 22-12-2008 11:03 PM

المشاركة الأصلية كتبت بواسطة MoToRiZeR

كلام جميل .. طب في حالة إن الضابط أصر يفتش العربية و إستخدم طريقة "يعني إيه أقف لحد هنا" و "طب إنت قاعد معانا شوية" و إبتدي يقل أدبه .. الحل إيه ؟

سيبه يعمل اللى هوة عايزه لأن ماينفعش إنك تقاومه ... لكن ده لا يمنع انه بكده متعدي لحدود سلطته ومن حقك القانوني إنك تتصل بالنجدة (طبعا لو جت) وتعمله محضر ... ومن حقك إنك تعمل فيه شكوى في وزارة الداخلية في التفتيش الفني

بس حاول بقدر الإمكان ان يكون في شهود على الواقعة دي ... وإذا ماكانش في حد تعرفه يبقى أي حد ماشي في الشارع لو عرفت إسمه ورقم عربيته مثلا وشاف الواقعة حاول تحفظه في عقلك الله أعلم يمكن تحتاجه ... بس في الحالة دي عقبال مايجيبوه (ده إذا جابوه) ممكن يكون نسي أو مايكونش صاحبها هو اللى كان سايق في اليوم ده ... بس دي إحتمالات قليلة المهم تعمل اللى تحس فيه بالأمان

انا مرة كنت على طريق بلبيس الصحراوي الساعة 9 بالليل وكان فيه لجنة في أول الطريق من ناحية بلبيس والظابط اللى كان فيها كان قمة في قلة الأدب وكان أخويا هو اللى سايق وقل أدبه على أخويا لأنه -على حد قوله- ضاربين النور العالي في وشه وده مخالفة وحصل مشادة كبيرة بينهم وأخويا إتصل بالنجدة في ساعتها وهو واقف وفي ساعتها النجدة كلمت قائد الضابط ده وقالته على الموقف والقائد كلم الضابط على اللاسلكي ووقفه عند حده

وبصراحة انا كل ده كنت ساكت خالص مافتحتش بقى وكنت متشوق أشوف الموضوع هايمشي إزاي ... لكن الحمدلله الموقف ده إداني أمل شوية في البلد ... بالضبط زي الموقف بتاعك بتاع مأمور قسم زايد اللى أنا مش قادر أصدقه لغاية دلوقتي

الموضوع: إحذر الانتشار السريع , والكماين العجيبة !

LinkBack

أدوات الموضوع

عرض

-

-

-

-

-

-

-

المواضيع المتشابهه

إحذر ثم إحذر عند تزويد سيارتك بالوقود...

ممكن نقول أن الشرطه بدأت الانتشار من جديد

مستحيل الانتشار الرهيب للسيراطو ده

ظاهره تفيم الزجاج الامامى بدأت فى الانتشار

الانتشار الشديد

الكلمات الدلالية لهذا الموضوع

المفضلات

المفضلات

ضوابط المشاركة