الموضوع: إحذر الانتشار السريع , والكماين العجيبة !

انا كتبت قبل كدة هنا يا أحمد عن الأمين بتاع لجنة المطب ده :d الراجل ده مسخرة .. انا كنت بفكر و الله بجد ألف في اليوتيرن و أخش الكمين تاني عشان خاطره :d

اما التاني ده بقي اللي بيقولك إنت و حظك 100 ولا 150 فعلاَ بيجسد الإتاوة في أحسن صورها و اما السلطة تبقي في إيد واحد جاهل .

الظاهرة اللي انا ملاحظها بقي إن ضباط الشرطة و المرور حالياَ قرفانين زينا بالضبط !! يعني أقف مع ضابط موقفني في كمين ولا اما يحصل مشكلة و أروح القسم و أقعد أدردش معاهم شوية ألاقي الضابط بيقولي الله يخرب بيت التعليمات و والله حرام اللي إحنا فيه ده و يرضي مين و انا لو عليا أشيل الناس فوق دماغي ما الناس دي أهلنا و حبايبنا و يخرب بيت اللي بيحبه و هو من جواه بيحبه و واقف جنبيه واحد بيكرهه و كدة، و ده بيأكدلي كل يوم إن التغيير لازم يبقي من فوق لأن فيه ناس تحت زي الفل و تقف مع الضابط تلاقيه راجل زي العسل .

و أكتر ضباط محترمين بيبقوا في منطقة اكتوبر خاصة زايد ، انا من كام يوم كدة حصلي مشكلة في شقة زايد قمت مكلم البوليس و انا كلي يأس يعني، مفيش 10 دقائق لقيت مأمور القسم جه ! يا نهار إسود .. و بيقولي خير يا فندم فيه حاجة ؟ قلتله حضرتك حصل كذا كذا كذا .. فا فهم الموضوع و قاللي إنت محتاج تعمل محضر في مقر القسم ، إعمله و انا هتابع كل حاجة -كل ده بدون واسطة أو أي حاجة- قلتله حضرتك بصراحة انا معرفش القسم فين .. قام مطلع اللاسلكي .. خمس دقائق لقيت عربية أوكتافيا من بتوع الدورية مشيت قدامي لحد القسم .. دخلت لقيت الناس شايلاني من عالأرض شيل !! بقيت مش مصدق نفسي .. و إحنا بنكتب المحضر رئيس التحقيقات يسألني حاجة فا أقعد أفكر يقولي فكر براحتك بس عشان نعمل المحضر مضبوط و حقك يجيلك .. عملنا كل حاجة و انا ماشي كان المأمور رجع من مشوار تاني .. سلم عليا بحرارة و قاللي ها كله تمام ؟ قلتله تمام التمام و الله حضرتك مش عارف أقولكم إيه !! قاللي لأ إزاي أمال إحنا قاعدين في القسم ليه .. ألف سلامة يا فندم نورتنا (مأمور القسم! و انا يعني شاب عندي 21 سنة) .. و انا خارج داخل راجل شكله بسيط كدة ممكن يكون بواب أو حارس أحد العمارات في زايد بيقول "إنجدوني يا بيه!!" لقيت المأمور إستقبله نفس الإستقبال "خير يا فندم خير إن شاء الله إتفضل"

القسم بتاع زايد الحقيقة يستحق تحية جامدة لأن انا من فترة قريبة برضه كنت في قسم تاني و كانت المعاملة النقيض من دي تماماَ و كان هيحصل مشكلة عشان انا خنقي ضيق .

برضه من فترة وقفني لجنة رادار في أخر طريق العلمين و الضابط كان رتبة و كان راجل زي العسل (رغم إنه دفعني الرادار برضه) و قعدت معاه شوية قعد يقولي ريح من السفر بقي إنت زي إبني و دفعت الغرامة و انا مبسوط تخيل ! شوية و جه راجل سايق مرسيدس متصور رادار علي 150 قعد معانا برده و عملنا حفلة شاي بلبن ( يا جماعة ده مش فيلم كوميدي بجد و الله ) و قعدنا نتكلم شوية في المرور و أحوال البلد .. و إزاي انا هقضي اليوم بعد ما الفلوس نقصت 150 جنيه .. و مشيت و انا مبسوط يعني و مستعد للأجازة اللي انا واخدها و كلي أمل في الحياة ! رغم إني ملسوع غرامة جامدة

اللي عايز أوضحه إن طلع فيه رجال شرطة محترمين فعلاَ بس زي ما إنت قلت يا أحمد ده واحد صحي الصبح راح شغله إدوله بوكس و أربع موتوسيكلات و قالوله ترجعلنا مش بأقل من 9 الاف جنيه .. فا لازم يرخم علي سعادتك .. العيب في النظام اللي حول الجميع إلي دمية يحرك خيوطها بمزاجه .. خاصة و إحنا في الموسم بتاعهم و الإنتشار هيفضل سريع لحد 25 يناير كل سنة و إنت طيب .