إحذر الانتشار السريع , والكماين العجيبة !
الانتشار السريع لايه بالظبط؟
للجان متحركة جديدة من نوعها في القاهرة كموضه جديدة - على حد علمى - اتحفتنا بيها وزارة الداخليه ..
وهيا ببساطة عبارة عن عربية شرطة - الكحلى - ومعاها 3 موتسكيلات شرطة او 4 !
ابتدوا ينتشروا اوى اليومين دول ولسه لابس 50 جنيه حزام النهاردة في اول فيصل وانت جى من الرماية كده..
داخل بسرعه لانه مجاش في بالى ان ممكن يكون في كمين في المكان العجيب دا, واذ فجاتن الاقيلك على الجنب العربيه دى واقفه ووراها موتسيكلات بظباطها قاعدين .. وفجاة يطلعلى امين شرطة من تحت الارض..
الامين: الرخص .. عشان الحزام.
انا باستغراب: وهوا دا مكان كمين برضه؟! , اتفضل يا سيدى.
قالى: هانسحب الرخص !
انا بكل قرف: مش في تصالح فورى برضه يا بيه ؟
هو: اه طبعا يا باشا , اتفضل روح للظابط وانت وحظك , 100 , 150 جنيه !!
انا : نعم؟ دا على اساس انك بتكلم واحد هندى مثلا ومش عارف عقوبة الحزام كام؟! , وبعدين هوا الظابط هايحط ارقام على مزاجه ولا ايه! ,
المهم ركنت وروحت للظابط - كان شاب قاعد على الموتسيكل - وقعدت اتكلم معاه شوية, بص على العربيه وقالى, حزام وكمان في ملصقات اهو !
قولتله دا اسمى يعنى على الازاز من فوق ماهياش ملصقات بمعنى ملصقات يعنى, في ناس بتحول العربيه وماشيين بيها عادى.. المهم انه كان لذيذ وشاب محترم , فا قالى خلاص خليها حزام بس.. 50 جنيه.
قعدت اسئله عن الدورية العجيبة دى , قالى دى حاجة اسمها الانتشار السريع ومتنقله من مكان للتانى ..
وبعدين قالى حاجة عجيبة جدا: احنا لازم في اليوم نعملنا بتاع 9 الاف جنيه ولا حاجة.. دا بيبقى الزام علينا وتعليمات !
قولتله معنى كده انك ممكن تلبس الناس بقى ارقام فلكية لمجرد انك تجمع الحصيلة, ضحك وقالى لا, بس شوف لما يبقى في ميكروباص .. رخصته منتهيه وغرامتها في القانون300 جنيه , شوف بقى كام ميكروباص رخصهم منتهيه , وادينا يا سيدى استفتحنا بيك اهو D:
عموما هما فعلا منتشرين , لسه راجع من ساعتين كده ولقيته واقفين عند باب كلية تجارة - جامعة القاهرة , الساعه 10 بليل ..
وفي اكتوبر النهاردة كان في برضه كمين على مطب, يعنى يوقفك فوق المطب !, بس كان امين عجيب اوى , بص في الرخص وبعدين: ميرسى يا أحمد بيه , يومك جميل !d:
قاعد النهاردة طويل اليوم , بضحك على يومك جميل دى !
المهم كل واحد يخلى باله من حزامه واى مخالفات تانية قد تتراءى لبشوات المرور.