الموضوع: فن المحادثة ولحظات الصمت !!

المشاركة الأصلية كتبت بواسطة Rafraf

IslamGen2
عضو فعال

لا اصلا الشلة كبيرة

يعنى اللى بعتبرهم اصدقاء 4 او 5 من 15!!

لما بنكون 15 واحد قاعدين بحس بملل رهيب لانى مش بتكلم نهائيا

مع ان فى ناس تانية بتقول اى تفاهات و الناس ترد عليهم و ينبسطوا و يضحكوا على اى كلام :)

فاهم اللى عايز اقوله؟

أنا عندي لحضرتك نصيحة صغيرة انا استعملتها لما بحس بنفس الإحساس اللي حضرتك بتحكي عنه ..
لما أكون في اي اجتماع والاقي الناس مهتمة بالكلام الهايف بعرف اني مستوايا أعلى من الناس دول (وده مش تكبر بس ممكن تسميه ايمان بالنفس ) واني لازم ما اتكلمش معاهم غير لما يكونو محتاجين كلامي لأني لو اتكلمت مع ناس أقل من مستوايا (الفكري) يبقى بهين كلامي وبهين نفسي لأنهم مش هيفهمو الكلام ده وهيقللو من قدره ..
طبعا انا مش متكبر ولا حاجة زي ما ممكن يتهيألك من الكلام بس أحب أحس بنفسي وبإني أحسن من غيري بكثير وفي نفس الوقت بتعامل مع الناس كلها بس بحاول التزم بالصمت لما ميكونش فيه لازمة اني اتكلم ..
بس طبعا ما أصحابي المقربين جدا باخد راحتي في الكلام لأن الإنسان مهما كان بيحتاج يتكلم ويفضفض .
طبعا في المقام الأول الموضوع ده يعتمد على شخصية الإنسان وطريقته في التعامل .

المشاركة الأصلية كتبت بواسطة IslamGen2

طيب جميل اوى ، الردود مشجعة.

طيب انا هتكلم عن نفسى ، انا من حوالى سنة حسيت انى مش اجتماعى اوى ، قليل الكلام حتى مع اصحابى القريبين ، ببقى مضطرب وقلقان وسط ناس اول مرة اعرفهم ، بروح الافراح محبش اقف واهيص مع الناس ، طبعا مع الجنس الآخر كنت ضايع ، فقررت انى اغير نفسى خاصة لما كنت معجب بواحدة وكنت عاجز عن التصرف ، مكنتش عارف اعمل اى حاجة ، قريت شوية كتب Self development ، الموضوع أخد منى شهرين ، قلت لازم اغير طريقة كلامى ، طريقة حركاتى ، ردود افعالى لمواقف معينة ، وقد كان ، والحمد لله دلوقتى أحسن كتير.

من الحاجات اللى لازم تاخد بالك منها عموما ال Body language بتاعتك ، يعنى طريقة مشيتك ، حركاتك وانت بتتكلم ، وقفتك ، لما يتحسن انت بنفسك هتحس بتحسن ، مثلا طريقة المشى انا كنت معظم الوقت بمشى وايدى فى جيبى ، بعدين غيرت طريقة مشيتى بقيت أمشى زى جيمز بوند فى كازينو رويال ، مشية موديلز ، وانا واقف كنت دايما اتكلم وانا متنى (شاب متنى ) ايدى crossed ، بعدين عرفت ان الصح انك تقف ايدك بتوازى رجلك ، ضهرك مفرود ، ولو انت بتتكلم ايدك بتتفاعل مع الكلام ، عينك دايما فى عين اللى قدامك ، ميبقاش كل لحظة عينك بتبص فى مكان ، حط فى دماغك قاعدة ، ال Body language وال Voice tone بيشكلوا دور كبير فى الإنطباع عنك ، لما تكون شاب متنى ومهزوز كدة يبقى بغض النظر عن محتوى حديثك هيتاخد عنك انطباع مش كويس ، حطها قاعدة لما تكلم حد غريب اتكلم كأنك بالظبط بتكلم صديق مقرب.

فيه قاعدة عامة كدة إن كل ما معلوماتك بتزيد بتقل نسبة التوتر ، قس على كدة حاجات مشابهة كتير ، يعنى مثلا واقف بتدى محاضرة ، وقلقك كله إنك هتقف قصاد مجموعة كبيرة من الناس ساكتين بيتفرجوا عليك بس ، توترك وقلقك دة بيقل كل ما حجم معلوماتك عن مادة المحاضرة كبير ، الموضوع مش أكتر من Mind set.

فيه عندنا مفهوم غلط شائع جدا ، لو انت مش بتعرف تتكلم كويس يبقى هتفضل طول عمرك كدة ، لو انت مش بتعرف ترسم يبقى هتفضل طول عمرك كدة ، لو انت على طبيعتك وعاجز عن عمل شىء معين يبقى هتفضل طول عمرك عاجز ، بمعنى آخر الموهبة ، للأسف مفهومنا عن الموهبة خاطىء جدا ، أى حاجة فى الدنيا عبارة عن Skill ممكن تتعلمها بسهولة ، الموهبة بتفرق بين ال Very good and the best ، فن الحوار دى مش موهبة دى مهارة ممكن تتعلمها وتتقنها كمان ، الرسم مش موهبة ، الرسم دة مهارة ممكن تتعلمها ، العزف مش موهبة ، دى مهارة وممكن برضه تتعلمها بسهولة ، كل المطلوب منك إرادة مش أكتر ، انتوا عارفين يا جماعة لو دخلتوا سايتات زى ehow و wikihow ، هتلاقوا حاجات لدرجة How to shake hands ، وبالتفصيل الممل كمان ، متلاقيش الحاجات دى بالعربى ليه؟.

عشان تكون محاور حلو لازم تكون ملم بمفهوم الحوار ، لازم تعرف ازاى تبدأ حوار ، ازاى تسمع اللى قدامك ، ازاى من كلامه تفتح مواضيع تانية ، لحظات الصمت تفتحها ازااى ، تنهى الحوار ازاى ، هتعرف انك بتتحسن لما وقت حوارك مع الناس يزيد.

انا فتحت الموضوع دة عشان الناس تشارك برأيها وخبرتها وأهو نساعد بعض.

الله عليك يا إسلام يا جامد :k32:

موضوع مهم جدا جدا ومميز للغايه وهادف

المهاره الإجتماعيه تعتبر من أكثر المهارات التي يحتاجها الشخص لكي يتفاعل في المجتمع المحيط به بشكل سليم وصحي وفعال

أنا مش عايز أقولك إن المرحله ديه أنا بمر بيها في الوقت الحاضر وبحاول بشتى الطرق إني أتخطاها بسلام

للأسف المرض ده بيعتبر عائق رهيب تجاه تطور الإنسان في شتى أمور حياته

في إعتقادي إن نوع التربيه وطريقتها واللتي يتلقاها الطفل في صغره من والديه وكذلك طبيعة البيئه المحيطه بيه من أقارب وأصحاب كبار وصغار ليها عظيم الأثر في تشكيل وتهيئة الطفل نفسيا وعقليا وذهنيا وجسديا ووضعه في كيان إجتماعي محدد يبقى معه طوال حياته إلى أن يكتشف بنفسه تأثير هذا الكيان على حياته سواء بالإيجاب أو بالسلب

علشان كده أنا بقترح إنك لو تقدر تنشر أسماء الكتب أو المواقع اللي إنت قرأتها وساعدتك في تخطي هذه المشكله يبقى هاتساعد ناس كتير إنها تتغير خاصه إن هذا المجال واسع للغايه ومتشعب

لو سمحت يا إسلام لو تقدر تحكلنا أكتر عن تجربتك وما مدى تأثير التغيير على حياتك الإجتماعيه

تحيه جامده ليك يا باشا ومتابع للموضوع بإهتمام

المشاركة الأصلية كتبت بواسطة IslamGen2

آه فاهم ، انا بيحصلى كدة برضه ، وانا مشكلتى انى لما بحس بملل من القاعدة ، بحس بتقل كدة وتلاقينى قفلت وعاوز اروح بأى شكل ، بس عادى مش بحس بمشكلة لأن القاعدة كلها بتبقى رخمة اساسا ً ، المشكلة إنك ازاى تكسر حاجز الصمت مع حد حابب تتكلم معاه.

والله يا باشا أنا من وجهة نظري انك ما دمت عايز تتكلم مع حد ومش قادر تكسر حاجز الصمت ممكن تبحث عن الحاجة اللي بتشده وتحاول تفتح معاه موضوع بخصوصها حتى وان كنت انتا مش متحمس قوي للحاجة دهية بس هتلاقيه تجاوب معاك وخصوصا اذا كانت حاجة مش كثير بيتكلمو عنها فهو هيفتكر انك مهتم بيها زيه وهتلاقيه فتح معاك على طول في الكلام .. يعني مثلا تلاحظ من طريقة كلامه وحركاته وانطباعاته عن نمط شخصيته (واعتقد حضرتك ممكن تفهم في الكلام ده كويس نظرا لإنك اطلعت على كتب تنمية بشرية ) وبالتالي تدخل ليه من هذا المدخل ..
فيه كتاب جميل جدا لديل كارنجي ممكن تطلع عليه اسمه كيف تكسب الأصدقاء وتؤثر في الناس الكتاب انا جبته من مكتبة جرير في معرض الكتاب ..

Mohammed_Adel_Amin
عضو جديد

فعلا دا اللى بحس بيه

ان فى اشياء تافهه جدا ما تستهلش انى اتكلم فيها

بس بردو الصمت بيحسسنى انى معزول عن العالم!!

و بالتالى بتتكون صورة غلط عند الناس عن شخصيتى!!

فدائما من يعرفنى يقول لى انت ماكنش يبان عليك كدا

لانى مش بتعود على الناس بسرعة! و مابحبش الاحراج!! وكمان هادئ و صامت جدا فى المجموعات الكبيرة

هى دى المشكلة :) انى مش مدردح

مع انى شايف ان التفاهات دى مش لازم اتكلم فيها! الا انه لو ماتكلمتش فيها هتعزل تماما عن الناس!!!

موضوع جامد والله يا اسلام احسن انا لحظات الصمت ديه بتحصل كتير اوى و المصيبه ساعات بتحصلى مع اصحابى واحنا بنتكلم فى التليفون تلاقى فجأه كده الكلام خلص واحنا الاتنين قاعدين ساكتين بس فعلا الواحد محتاج ينمى الجانب الاجتماعى فيه شويه لأنى مشكلتى ان بطبيعتى مش اجتماعى قد كده الصراحه بتكسف اروح اتكلم مع حد مش عارفه و يمكن ديه كانت مشكله بتقابلنى مع بداية كل مرحله زى ان اتنقل من ثانوى للجامعه وهكذا فى ناس بتفتكرها تكبر منى ولا حاجه بس هو مش كده المشكله انى ببقى مش عارف اروح اتكلم اقول ايه ده حتى مثلا من الحاجات اللى بتخنقنى اوى من نفسى ومش عارف اعالجها انى مثلا اكون عاوز اسأل على حاجه فى محل بتكسف اروح اسأل عليها مبحبش اروح اسأل على حاجه غير اما اكون داخل اشتريها والموضوع خلانى ادبس مره فى محفظه ب200 جنيه من اديداس مره قولت اعمل فيها جرىء واسأل على المحفظه بكام وبعد ما جه الراجل وقالى سعر المحفظه اتكسفت اقوله انى مش هخدها فأضطريت انى اخدها وكعيت الفلوس زى الباشا بس المشكله انى مش عارف احسن نفسى معلش صدعت دماغكوا بس اصل الموضوع ده بيضايقنى جدا

موضوع أكثر من رائع يا إسلام
انا كان عندى نفس المشاكل قبل ما أدخل الكلية - من 4 سنين - كنت ساكت معظم الوقت و بتكسف من حاجات محدش بيتكسف منها زى مثلآ لما كنت أحتاج حاجة من والدى او والدتى أكلم أخويا و هو يتصرف معاهم و حاجات من دى
و كنت لما أروح عند حد من قرايبى أبقى ساكت و هم كانوا بيحسوا انى مش مبسوط او فيه حاجة غلط
و إبتديت آخد بالى من الموضوع ده و قلت لازم أتغير شوية عشان كده مش هعرف أعيش
بصراحة اكتر حاجة غيرت فى هم أصحابى اللى إتعرفت عليهم فى الكلية و بعد سنتين من الصداقة بدأت أطلع معاهم رحلات بعيدة و أعتمد على نفسى و بقى عندى جرأة أكتر
بالإضافة الى السواقة و دى حاجة غيرت فى كتيييييير جدآ

و بالنسبة للحظات الصمت فأعتقد إنها شىء طبيعى بيحصل لكل واحد
يعنى انا مثلآ احيانآ ببقى بتكلم و بفتح مواضيع و أحيانآ ببقى ساكت تمامآ يعنى حسب الحالة النفسية

و بالنسبة للحوار مع الشباب فميش مشكلة اوى يعنى حتة لو شخص جديد ممكن أفتح معاه حوار و أدور على نقطة مشتركة نتكلم فيها
و إنما غير كده محتاج تمرين كتير