سيب عربيتك شوية !!! (وائل عطية)

**وائل عطية** · 07-08-2007 04:04 PM

أحبائي
طبعاً حضراتكم عارفين إني بعت عربيتي، ولسه لم أُقرر شراء أُخرى ولم أستقر على نوع مُعين (بس إن شاء الله لن يخرج عن ياباني أو ألماني أو فرنسي) وهاستغرق بعض الوقت في حسم قراري،
المهم ، من ساعة ما بعت العربية وطبعاً مقضيها مواصلات (طبعاً بكل قرفها)، بس والله فيها ميزة جامدة جداً : الحركة
يعني الواحد بالعربية كان أقصى مجهود يعمله إنه يفتح باب الشقة وينزل السلم (ماعنديش أسانسير) والعكس صحيح يعني من باب البيت لباب الشغل وبدون أي حركة تُذكر، أضف إلى ذلك الجلسة على مكتب لمايزيد عن ثلث اليوم تقريباً، ترتب على هذا إيه:
- بوادر كرش مُحترم
- آلام بالظهر وأسفل العمود الفقري
- خمول وميل للكسل
- آلام بالمفاصل وخاصة الركبتين
والقائمة طويلة
ولكن مع الحركة والتنطيط في المواصلات تحسن الوضع إلى حد كبير فعلاً
أدعوكم لترك السيارة يومين على الأقل في الأسبوع والذهاب إلى العمل بالمواصلات،
أنا عارف إن الموضوع صعب التنفيذ، لأني كنت حاولت أكثر من مرة وماقدرتش، كنت أنزل من البيت وناوي إني مش هاخد العربية، بس للأسف ألاقي " عفريت " دخلني فيها ورجعت في كلامي تاني (ممكن ماتاخدش مفتاح العربية معاك وانت نازل)
جربت حل تاني وهو ممارسة الرياضة، بس للأسف ماقدرتش أواصل لأنه مش متاح غير يوم الأجازة والواحد مابيصدق يوم يريح فيه
يبقى إيه الحل؟
في رأيي هو زي ماأنا قلت، وهو التحرر شوية من العربية، والموضوع دا هايحتاج شوية عزم وإصرار
إيه رأيكم في الكلام دا؟
وياريت لو حد جرب يحكي لنا عمل إيه

**AlmAhAtmA** · 07-08-2007 04:32 PM

فعلا كلامك صح يا وائل
انا بكسل امشي 50 متر و باخد العربيه
المشكله اني من غير العربيه المشوار بين الاسكندريه حيث الاهل و العاشر من رمضان و القاهره حيث الشغل حيكون صعب قوي
تقريبا حاخد 5 انواع مختلفه من المواصلات ما بين قطار و تاكسي و ميكروباص و ده طبعا صعب
لكن اللي انا مستغرب له اني بقيت بكسل
ساعات اقول ايه اللي حيمشيني في الحر ده يا واد اركب العربيه و كل مره بحجه
من الحاجات اللي مخلياني و انا في العاشر من رمضان استخدم العربيه كتير ان الركنه سهله قوي و كل مكان فيه ركنه احلي من التانيه

**modux** · 07-08-2007 05:03 PM

انا بردو مع اني لسه شباب 23 سنة و مش متجوز بس منها لله العربية طلعتلي كرش و بقيت تقيل الحركة جدا

نفسي حد يشجعني علي الرياضة

**وائل عطية** · 07-08-2007 10:14 PM

إيه دا ؟؟؟
هو ماحدش عنده استعداد يسيب العربية شوية ولا إيه؟

**Karim_Monir** · 08-08-2007 12:10 AM

الموضوع اكبر من كدة يا وائل
انا بعاني من الالام الظهر دي بقاللي اكتر من 5 سنين بسبب القعدة قدام الكمبيوتر
الغريبة اني نسيت مهارت المشي في الشارع
تخيل ان يدي ليها مهارة فعلا
لما بانزل اتمشي مع اصحابي واعدي الشارع وادخل من مكان لمكان حاسس اني نسيت الكلام ده
مرة مشيت من اسبوع كدة حوالي كيلو عشان كنت رايح مع صديق ليا مشوار بعربيتة تخيل ماشي في الشارع ببص حواليا
اينعم مهارات السواقة زادت جدا بس برضة علي حساب اعصابك لانك في توتر عصبي دائم نتيجة السواقة في غابة الميكروباصات والنقل دي
بس تصدق فكرة خاصة ترييح الاعصاب من السواقة دي
بس بيني وبينك بعد ما يومين الحر دول يعدوا احسن الواحد مش طايق نفسة
اما عن التمارين حدث ولا حرج لما بروح النادي بقعد زي البطة المأنتخة حتي كنت بنزل البسين مع كنزي دلوقتي كبرت وبتنزل البسين بتاعها لوحدها وابوها قاعد زي البطة برضة
بس الحاجة اللي نجحت فيها الحمد لله اني نزلت كرشي شويتين ووزني نزل من 89 ل 75 الحمد لله عشان الالام الضهر

فكرة رائعة احييك عليها

**Dr Ahmed** · 08-08-2007 03:10 AM

أنا لما بامشى فى الشارع لما أعوز أشوف ورايا ببص للجنب مكان المرايات الجانبية فى العربية ، وساعات لو معدى على اشارة وانا على رجلى ببقى هقفل الموبايل أحسن ياخدونى مخالفة!!! دا غير انى بعرق شوربة فى الحر وتكييف العربية نعمة كبيييرة . حد يرفس النعمة؟؟؟؟

**M_ashraf** · 08-08-2007 03:11 AM

فعلا انا وحشتني ايام المشي قبل العربيه كان الواحد صحته احسن ونفسه اريح واكثر انتظاما مع المجهود

**خالدابوالنجا** · 08-08-2007 05:51 AM

يا اخوانا انته هتجننونى
بقه انا مستنى العربيه بفارغ الصبر تقوموا انته تيجوا تقولوا سيبها واتمشى
ده كلام ناس برده .
بالنسبه للكرش : موجود والحمد لله مع ان مفيش عربيه
الام الظهر والركبتين : برده موجود ومفيش عربيه
قرف وتعب المواصلات والسواقين والواحد يقف 1/2 ساعه عشان تاكسى يوقف
ويعبرنى ويوصلنى : برده موجود عشان مفيش سياره .
تقوم انته بعد ده كله تيجى وتقلى متركبش العربيه .
ياراجل بلاش كلام واحد معندوش سياره
ههههههههههههههههههههههههه هههههه

**hazem_khidr** · 08-08-2007 08:09 AM

مش صعبه علي فكره انا ساعات الفجر بعد ما اخلص شغلي ببقي مخنوق بنزل اركن العربيه في اي مكان و اتمشي لوحدي في الهدوء الجميل بتاع بالليل دا ولما ازهق اقوم راجع البيت.
انما بالنهار ما بعملهاش اطلاقا.غير ان شغلي محتاج عربيه دايما و الا حتبهدل و الحمد لله علي النعمه اللي ربنا مديهالي :)

-

الموضوع: سيب عربيتك شوية !!! (وائل عطية)

LinkBack

أدوات الموضوع

عرض

سيب عربيتك شوية !!! (وائل عطية) - انشر الموضوع فى :

-

-

-

-

-

-

المواضيع المتشابهه

توسط في كل شيء !! (وائل عطية)

10 نكت !! (وائل عطية)

زفـــــــــة ..!! (وائل عطية)

الكلمات الدلالية لهذا الموضوع

المفضلات

المفضلات

ضوابط المشاركة