أرجو المساعدة فى معلومات عن الهيوندجاى أكسيل 1998

الاكسيل واحده من انضف ماركات الكورى القديم عموما وتقريبا اعلى عربيه ممكن تركبها فى فئه سعريه متوسطه

* السعر : دايما هتلاقيه ما بين 50 والـ 60 بس انت وشطارتك ممكن توقع حاجه لقطه تحت الخمسين
* انواعها : في منها نوعين السيدان والهاتشباك وكل واحده فيها مميزات وعيوب مختلفه رغم ان الاتنين تقريبا نفس العربيه باختلاف الشنطه
وهشرح مميزات وعيوب الاتنين تحت لان ركبت النوعين فتره طويله وعن تجربه شخصيه مش كلام واخدو من مواضيع

* بالنسبه للاكسيل الهاتشباك بتكون ارخص من السيدان والسبب فى كده انها مش عربيه عمليه ومن غير شنطه لكن ميزتها اللى مش موجوده فى السيدان هى الثبات
- يعني وانت رافع فوق ال 100 ومآشى هتلاقى الهاتشباك ثابته جدا والسيدان طبعا مفيهاش الثبات ده لان الكاوتشات بتاعتها فى طرف الشنطه وفى فراغ كبير وراها
- الهاتشباك تقدر تلعب فى العفشه بتاعتها زي ما انت عايز وخصوصا الجزء الخلفى ( العفشه ) منها تحط علايات او تشيلها مش هتفرق كتير بعكس السيدان طبعا اى لعب فى الجزء الخلفى هيفرق معاك فى الشنطه
- يعني لو فكرت ترفع العربيه شويه لو سيدان هتشيل هم الشنطه اللى هتلاقي منظرها مش كويس فهتضطر تسيبها زي ما هى واطيه وتخف شويه من المطبات

* السيدان
- السيدان عمليه اكتر من الهاتشباك وابعادها متوسطه بس طويله نسبيا مقارنه بالاكسينت والشنطه بتاعتها واسعه جدا وتقدر تشيل فيها اى حاجه سواء عده صيانه او شنط سفر او خلافه
- كده وضحنا الفرق بين الاتنين ندخل بقى فى المميزات والعيوب بتاعت العربيه ككل

* بالنسبه للمميزات ( مميزه )
- تقريبا دي العربيه الوحيده اللى لو اشتريتها النهارده وزهقت منها بعد يومين وحبيت تبيع هتلاقى الف من يشترى لان كلو بيدور على النوع ده تحديدا
- قطع غيارها منتشره فى كل مكان بغزاره شديده وده سبب رخص قطع غيارها يعني عمرك ما هتعطل على حاجه وهتلف عليها دايما هتلاقيها
- قطع غيارها رخيصه جدا
- موفره جدا فى استهلاك البنزين ( بس لو كربيراتير - الانجكشن مجربتهاش )
- اى حد بيفهم فيها لو عطلت فى اى مكان اى حد هيقدر يدورهالك بسهوله لان الميكانيكا بتاعتها مفيهاش حزمه برمه زي بقيت العربيات وانت تلقائى مع الوقت هتتعود تصلح لنفسك
- عربيه سريعه جدا وبتجرى ونوعا ما ناعمه ولو ظابطها كويس مش هتسمعلها صوت نهائى
- الصالون بتاعها واسع
- تقدر تعدل عليها زي ما انت عايز بس كل ده فى حدود المتاح للتعديل زي التكييف مثلا وهشرحو بالتفصيل تحت

* اما العيوب بقى
- اكتر عيب هيقابلك العفشه بتاعتهاا اعمل حسابك كل تلت اربع شهور هتعمل تشيك على العفشه وتربطها ولو ساكن فى مكان متكسر اعمل حسابك هتربطها كل شهر
* هفصل موضوع العفشه وهقولك حلول ليها برده
- اكتر حاجه بتبوظ فى العربيه دي هى الكبالن بتاعتها ( ممكن تبقى مركبها النهارده وبعد فتره صغيره تلاقيها بطقطق والعيب ده تقريبا موجود فى معظم موديلات الاكسيل وده الاسباب بتاعتو معروفه زي الفرك والتخميس بالعربيه والضغط على الكبالن ف المطبات وليها اسباب كتير برده منها ان الخامات اللى بيتصنع منها الكبالن رديئه شويه حتى لو جبتها جديده هتبقى نفس الكلام )
- بس طبعا موضوع الكبالن ليه حل جذرى انك تعمل حجاب ف المقص او تروح لسمكرى يعملك خوصه يربطهالك فى المقصين عشان الكبالن متفتحش معاك وطبعا الكلام ده مش هيمنع الكبالن انها تبوظ بس على الاقل هيطول فى عمرها شويه بدل ما تغيرها كل اربع خمس شهور ممكن تطول معاك شويه لسنه مثلا
- برده المساعدين بتاعتها وخصوصا اللى قدام بتتكسر بسرعه من اقل مطب ودي ليها حل برده ( هتروح لاى عفشجي بيفهم وتقولو عايز اركب صدادات على المساعدين وهى مش مكلفه طبعا وبرده مش هتمنع المساعدين انها تضرب بس على الاقل هتطول فى عمرها شويه برده )
- الروكب ودي معظم مصايب العفشه دايما بتتشرخ بسبب ان عزل العربيه من تحت ضعيف فهي بتلم بارومه وبتصدي مع الوقت وتقعد تتشرخ وتفتح معاك المقصات وخلافه تبوظلك العفشه ودي حلها خوصه عند سمكرى
- عيب العفشه الحقيقى ان العفشه كلها تقريبا على عامود واحد مينفعش يتعمل فيها اى تعديل زي بقيت العربيات وبالتالى بتكون مجبر تعيش بيها على عيبها بدون تعديل

* عيوب الميكانيكا
- العربيه فى الميكانيكا لو واقفه على رجلها ملهاش عيوب نهائيا بس لازم تكون ممشيها على نظام صيانه معين وتخلى بالك من الريداتير بالذات لان العربيه دي بتضرب سخونيه كتير
- عشان تجيب عربيه من النوع ده وعامتا اى عربيه قديمه اول حاجه هتعملها هتحل الريداتير وتعملو صيانه لو لقيتو في اى مشاكل بيعو واشترى جديد متستناش ( لان الاكسيل مشهوره بموضوع وش السلندر بتضرب جوانات كتير وخصوصا لو كان متركبلها تكييف )
- تانى حاجه لما تكون متاكد ان الريداتير سليم ومفيهوش تسريب والجو ده هتشتريلو جركن ميه خضره بس مش الجركن ابو عشرين ده اللى متصنع تحت بير السلم لا هتشتري حاجه مضمونه وتخلى الميكانيكي يعملك تنضيف لدوره التبريد او بتاع الريداتير ويحطلك الميه الخضره بعد كده وهتجيب جركن تانى احتياطى تبقى تزود منو وبكده انسى موضوع التبريد ده
- البوجيهات طبعا كل ست سبع شهور هتركبلها طقم جديد هو مش غالى نفس الكلام بالنسبه للكربيااتير هتنضفو كل فتره يعني دوره صيانه شامله كل كام شهر
* العزل بتاعها ضعيف طبعا
* من عيوبها ملهاش فوانيس شبوره برده فهيكون قدامك حاجه من الاتنين يا اما تفك هوايات الاكصدام اليمين والشمال وتصب مكانهم فايبر وفوانيس متعدله يا اما هتسبهم زي ما هما وتركبلها ليدات مدوره تكشفلك الشارع قدامك وخلى بالك لو هتركب فوانيس متعدله خلى الكهربائى هو يقولك يركبلها ايه ومتكونش محمله على الضفيره
- والعربيه دي برده شياكتها فى صنع بلادها يعني مش من العربيات اللى بتحب الاوفر فى الفنش والكلام ده

* بمعني واضح العربيه ممتازه فى كل شئ باستثناء العفشه والعزل نسبيا

* نيجي بقى للنصبات اللى بتحصل اثناء الشراء عشان تكون واخد فكره
- هتسمع ان العربيه راشه من برا نضافه ( اشتغاله غرضها النصب ) مفيش حاجه اسمها راشه نضافه لو انت معاك عربيه اتبهدلت من برا تمامها علبه بوليش وهتلمعها ملوش لزوم ترش نضافه يعني وطبعا الفيصل فى الكلام ده هيكون الصاج
- هتمسك العربيه حته حته وتقعد تخبط عليها لو الصاج رن معاك بصوت واضح يبقى مش واخد معجون ولو رن بصوت مكتوم يبقى واخد معجون ده غير انكسار الضوء على العربيه بيبان لو كان فيها حاجه مردوده على البارد ودي كلها بديهيات ويستحسن يكون معاك سمكرى ثقه هو اللى يبصلك عليها

- هتسمع ان العربيه هاف باور - ( اشتغاله برده ) - مفيش حاجه اسمها هاف باور اللى معروف يا اما باور يا اما بدون باور ( ودي هتعرفها من مكنه الباور حاجه شبه الدينمو بتكون متركبه اعلى الماتور وفى جنب العربيه على يمينك من الكبوت هتلاقي علبه زيت كده دي بتاعت الباور لو مش موجودين يبقى مفيهاش باور لو موجودين يبقى فيها باور وهو فى الغالب الباور بتاعها ضعيف مقارنه بالشغل الحديث
- وحته هاف باور يعني معناها ان متركبلها علبه الزيت والحاجات ومهيئه يركبلها مكنه باور :)

- هتسمع ان العربيه تكييفها عايز يتشحن ( اشتغاله ) - بص يا سيدي العربيه دي الغالبيه العظمي منها بتنزل من غير تكييف وبيتركبلها تكييف معدل - الشركه كانت بتنزلها بخراطيمها جاهزه ومهيئه للتكييف باستثناء ان الشركه كانت بتنزل مكيفه فعليا -- فعشان تتاكد ان فيها تكييف متبصش على الخراطيم لان كده كده بيتيجي مهيئه بالخراطيم انت هتبص على السربتنينه اللى تحت الريداتير تشوفها موجوده ولا لا وتبص على خرطوم التكييف نفسو والكباس هتنزل تحت العربيه هتلقيه متركب فى الماتور من تحت حاجه شبه مكنه الباور بس كبيره او شبه مواتير التلاجه كده او الغساله القديمه لو كانو موجودين يبقى فيها تكييف لو مش موجوديين يبقى مفيهاش
وخد بالك ان الحاجات دي غاليه يعني لازم تطمن انها موجوده عشان لو كلام على ورق تعرف تنزل ف سعرها

* هتسمع برده ان العربيه دي 1500 ويحلفلك يمين طلاق تلاته ويوريك الرخصه - لو مفيهاش تكييف كامل وشغال يبقى العربيه 1300 لان التكييف بيكون تقيل عليها جدا واى حد معاه مكنه 1300 مبيركبلهاش تكييف علشان التكييف بيجيب اجلها بسرعه - ثانيا الفيصل فى الموضوع ده الميكانيكي فى ناس بتعرف الماتور 1300 ولا 1500 لانو ساعات بيكون مثبت ف الرخصه عكس الواقع ودي حصلت معايا شخصيا

فى حاجات كتير هتسمعها عليك تتاكد من وجودها
وفعلا لو عايز تقتني حاجه فى سعر مميز خليك فى الاكسيل

والف مبروك مقدما

تحياتى