ارش القايم ولا أعمل ايه!!! حسبي الله ونعم الوكيل.

**a_tantawy7** · 15-12-2008 11:01 PM

النهاردة نسيت المفاتيح في العربية وهية دايرة ونزلت وقفلت بابي بالمسوجر قبل مانزل من العربية كمان, محدش يسألني ازاي لأن بجد ساعة القدر يعمى البصر, المهم بقت العربية كلها مقفولة ودايرة و أنا واقف برة بالطم لأن مستحيل أوصل للمفتاح الاحتياطي. قولت أشوف واحد بتاع مفاتيح يحللي المشكلة, سبت العريية مع السمسار, لأاني كنت نازل أدور على شقة في أكتوبر وروحت أشوف حد بتاع مفاتيح, رجعت لقيته قال أيه بيحاول يفتح الباب بحتة حديدة من الأرض عن طريق أنه دخل الحديدة بين الباب و بين جسم العربية وقعد يعتل, المهم طبعا جرح القايم بتاع العربية وخلا منظره مرعب.
السؤال بقى أسمكر القايم و أرشه ولا أسيبه في حاله, لأني لو رشيته وجيت أبيع العربية بعد كده محدش هيصدق الحكاية دي وهيفتكر العربية عاملة حادثة, أفيدوني برأيكم وحسبي الله ونعم الوكيل.

**abouelmaggd** · 15-12-2008 11:07 PM

بتفكرنى بواد قريب البواب ، كنا لسه جايبين تلفزيون 29 بوصة و شايلينه فى العربية من غير الكرتونة ، لسه بينزله من العربية راح لابس بالتلفزيون فى بوابة العمارة.
لو كل واحد يخليه ف اللى بيفهم فيه بس لازم الافتاءات ، رأييى ترشه و امرك لله ، مش منظر هتمشى بيه .

**a_tantawy7** · 15-12-2008 11:10 PM

المشاركة الأصلية كتبت بواسطة abouelmaggd

بتفكرنى بواد قريب البواب ، كنا لسه جايبين تلفزيون 29 بوصة و شايلينه فى العربية من غير الكرتونة ، لسه بينزله من العربية راح لابس بالتلفزيون فى بوابة العمارة.
لو كل واحد يخليه ف اللى بيفهم فيه بس لازم الافتاءات ، رأييى ترشه و امرك لله ، مش منظر هتمشى بيه .

أنا كل مافتكر أحس أني هعيط من الغيظ, أنا كان أهون عليا أحطها في شجرة بأيدي ولا ييجي ابن ال... ده ويبهدلهالي. حسبي الله ونعم الوكيل.

**MohaMed_Refaat** · 16-12-2008 12:01 AM

حسب شكل الضرر لو القايم مادمر رشة وامرك للة لو يمشى خلاص سيبة .

**SAMER_ENGINES** · 16-12-2008 12:15 AM

معلش ربنا يعوض عليك و قضي اخف من قضي و إحمد ربنا انها جت في العربية.
انا عارف اني كلامي كله من النوع المصري اللي بيعتمد علي التصبير زي المسكن بس معلش اللي حصل حصل............
المهم دلوقتي بتقول اسمكره و لا ارشه ما هو لو القايم مضعضع يعني كأنه مخبوط بعربية و متبهدل يبقي لازم يتسمكر الأول و إلا حترش أزاي, لكن لو كان الموضوع شوية تجاريح و بس يبقي عادي رشه و خلاص و حاول بقدر الإمكان ميجيش ناحية دواخل العربية.

**ecybrarian** · 16-12-2008 01:05 AM

لو الموضوع تجريحات جامدة فقط يبقى الحل الرسم مش الرش...كلام غريب إللي انا باقوله ده مش كده. اقصد إن بتاع الدوكو يمشي بفرشة صغيرة طرية (زفرة) على التجريحات فقط (مرمة) وبكده العربية تبان مرتطشة على القايم مش مرشوشة. ولما تبيع هتلاقي إللي بيشتري (ممكن) يجرح في اي حتة تانية في القايم هايلاقي دهان الفبريقة.

وفي طريقة تانية برضه هي إن بتاع الدوكو يغطي القايم بورق ما عدا أماكن التجريح ويرش على كده. يعني زي ما بيغطوا الزجاج والأكر ويرشو.

بس في الحالتين..ما دقش على فرق الألوان قوي. أو تشوف واحد من إللي بيطلعوا عربيات الحوادث فبريقة بره وجوه..بس انا نفسيا مش مستريح للناس إللي شغلهم في النصب.

**magyver** · 16-12-2008 01:11 AM

والله لو تعرف نرفعلنا الصور واحنا نقلك علي الحاجة المظبوطة

**sasatony** · 16-12-2008 01:21 AM

والله ياباشا انا حزين ليك لان حصل نفس الموقف بالظبط معايا
نزلت وقفلت العربية وسبتها دايرة وكان استحالة اجيب المفتاح التاني
المهم روحت لبتاع مفاتيح عربيات فتحلي الباب بطفاشة زي حرامية العربيات

**a_tantawy7** · 16-12-2008 04:58 AM

أنا اللي هيجنني أن محدش طلب منه يتدخل ,قولتله خليك واقف جنب العربية وبس, ايه اللي خلاه يتطوع ويخرب عربيتي مش عارف.
عموما شكرا لكل الردود وهحاول أصور المنظر وأرفع الصور بأذن الله.

**Silver_Arrow** · 18-12-2008 12:36 PM

هي العربية نوعها أيه ؟
لو كان القايم مستقيم أو صغير ممكن تلزاء ستكير اسود كاينو ترويش أو تحط حلية نيكل ، كدة مش هتحتج ترش ولا تلعب في الدهن و مش هتاثر في البيع