الموضوع: زيوت تويوتا كورولا 2005

المشاركة الأصلية كتبت بواسطة mesho413

طيب فى ناس نصحتنى اعلى اللزوجة بتاعت الزيت فا ايه الزيوت اللى متوافقه

ليه نصحوك بكده؟؟؟

أكيد علشان العربية ماشية مسافات طويلة...

أكيد اللي قال الكلام ده قاللك إن الموتور خلوصاته وسعت وما ينفعش نستخدم زيت خفيف..

الكلام ده مالوش أي أساس من الصحة... نهائي...

موضوع استخدام لزوجات تقيلة لما العربية تقدم ده عبارة عن أسطورة وحكاية مفهومة بشكل خاطئ تماما...

أصل الحدوتة دي من حوالي 45 سنة.. لما آمسويل نزلت أول زيت تخليقي في العالم...

الزيوت التخليقية كانت معروفة إنها بتنظف الموتور من الرواسب وبتدوبها.. ولما الزيت بيتحط في موتور قديم فالموتور بيبدأ يسرب زيت من الجوانات لإن الرواسب اللي كانت عليها من الزيوت المعدنية دابت والجوانات دي قدمت ونشفت وشققت.. وسمحت للزيت يخرج من الشقوق دي..

فطلعت من ساعتها حكاية إن الزيوت التخليقية ما تنفعش للمواتير القديمة... علشان هتسرب زيت..

في مصر الناس فهمتها إن المواتير القديمة ما ينفعش معاها زيوت خفيفة.. لإن الزيوت التخليقية أغلبها خفيفة..

في أمريكا وأوروبا.. عندهم زيوت تخليقية للعربيات اللي ماشية مسافات طويلة .. مهمتها إنها ترطب الجوانات والأويلسيلات بتاعت الموتور علشان ما تسربش زيت..

وعموما.. الزيوت التخليقية في مصر مفيهاش موضوع التسريب ده لإنها أساسا زيوت معدنية معدلة.. وده موضوع كبير تاني مش عايز أشغل دماغك بيه..

بالنسبالنا في مصر.. بافتراض حصل تسريب عند حضرتك... فكل اللي حضرتك هتعمله هو تغيير أويلسيل الكرنك (أمامي وخلفي) وجوان كارتيرة التاكيهات

لو حضرتك عايز تستخدم زيوت بلزوجات تانية.. فأنا شرحت لحضرتك إن أسباب الكلام ده تعتمد على أسلوب استخدامك للعربية أو المتاح من الزيوت قدامك..


تقدر ترجع للمواضيع دي لو عايز تفاصيل أكتر..
أسطورة الـ100 ألف كيلومتر... هل لها أصل؟؟؟
إزاي تختار لزوجة زيت الموتور المناسبة لعربيتك؟؟؟


...

المشاركة الأصلية كتبت بواسطة mesho413

معلش انا تاعب حضرتك معايا طيب 5_30 هتنفع لو هقرص على العربية ولا هحتاج ازود اللزوجة

تنفع بس بشرط إنها تكون مرات قليلة... مش أسلوب سوافة

يعني مثلا لو سواقتك هادية وحبيت تعدي من واحد ماشي قدامك وبعد كده رجعت هادي تاني...
أو كنت طالع من شارع جانبي وحبيت تجري شوية علشان تبقى بنفس سرعة العربيات في الشارع..

الحالات دي ما نقدرش نعتبرها قرص يستدعي زيادة اللزوجة.. لإنها بتحصل مرات قليلة خلال مدة سواقة العربية..

بس الأول إيه مفهوم القرص عند حضرتك؟؟


...