الموضوع: ما هو قانون التعامل مع الناس في مصر .. مش عارف أعيش في مصر

المشاركة الأصلية كتبت بواسطة MoToRiZeR

بص انا حصلي الموقف ده مرتين .. و بنفس الطريقة إحنا شارعنا ميكفيش غير عربية تركن و عربية تمشي برضه و كان فيه سواق تاكسي بارد بييجي يركن و يسد الشارع و اما أكلمه يقل أدبه فا إضطريت انا كمان أقل أدبي و بعدها إضايقت إني نزلت لمستواه و قلت مش دي الطريقة للتعامل مع الأشكال دي عشان كدة بقولك متسيبوش يجرك و ينزلك لمستواه .

تاني مرة عمل كدة لقيته بيقولي "يا بيه الشارع شارعنا و اللي مش عاجبه يعزل !" .. رحت ركنت عربيتي عند واحد صاحبي و قلتله بص هنركن عربيتك و هتروح و تيجي من الجامعة معايا كام يوم كدة .. و جبت عربية صاحبي ( لادا ) و قفلت عليه قعدته في البيت 3 أيام .. و بسمعه كل يوم عمال يهلل و هيتجنن يعرف دي عربية مين .. و خليت صاحبي ييجي ياخدها رابع يوم الفجر عشان محدش يشوفه و من ساعتها بقي يركن في شارع تاني أصلاَ .

عندك برضه بعد صلاة الفجر كدة تصليلك ركعتين و تستغفر ربنا و تقوم رايح جايبله الأربع فرد عالأرض ، بحر الأذي واسع بس متكسرلوش حاجة عشان متجبش الحق عليك .. عطله بس و وقفله حال العربية دي .. إقفل عليه .. العجل تجيبه عالأرض .. لو عملتوا مكرونة و معجبتكبش تقوم دالقها من البلكونة .. بالليل و إنت راجع كيس بأربعة جنيه من أون ذا ران بتاع أكل الكلاب و عالعربية كلها و سيب الكلاب تدلع العربية .. مدام دخل في سكة انا حر يبقي إنت كمان حر ! يعني إتسلي عليه و متحرقش دمك .

هو ممكن يشتغلك في الأزرق برضه بس هو هيخاف أكتر و مش هيتمادي معاك و يخش في حرب عشان ده أكل عيشه فا هيلم نفسه سريع سريع .

بس انا عايزك في الفترة دي تسمع بلاك ميتال و تنمي نزعة الشر جواك

والله يا جماعة انا مبعرفش نزعة الشر دي خالص .. أنا كل اللي يعرفني عن قرب بجد (مش شكرانية في نفسي والله) .. مش عاوز اتكلم عن نفسي .. ما يشكر في نفسه إلا ابليس .. المهم أنا بقالي في المنطقة دي من ساعة ما اتولدت .. يعني من 34 سنة .. عمري ما بوقت في حد ولا عليت صوتي على حد سواء كبير أو صغير .. تقوم تيجي نوعية زبالة زي دي .. مش المنطقة أساساً يقل ادبه .. وأنا بالرغم من أني بعرف كويس أخلي .. مش أخلي بس .. أجبر اللي قدامي أنه يحترمني بأسلوبي معاه .. فشلت معاه .. وكل الناس قالت وهي واقفة .. ده لطش مع باسم .. يبقى مفيش فايدة خالص منه .

موضوع الخناق وقلة الأدب دي مش مستبعده .. بس نامخليها آخر حل خالص .. لسبب معين ألا وهو .. أن ابويا ربناني أني ممدش ايدي أو اقل ادبي على حد من المنطقة أو قريب منه .. وذلك لسبب مقتنع بيه جداً .. أنه أول ما تحصل مصيبة ليا .. أول واحد حيقف معايا جاري في العمارة أو الشارع .. وحيلحقني قبل أخويا أو أبويا .. وده صح ميه في الميه .. تاني حاجة أنك لما تتخانق مع حد قريب منك .. أو تعرفه ويعرفك .. مش حتخلص خالص من المواضيع دي .. أنت حتعمله كذا .. يقوم هو يعمل كذا .. وهكذا في دوامة مستمرة .. والعند يشتغل بقى (بتكلم عن نفسي على الأقل في العند).

بس هو حل كويس جداً موضوع أكل الكلاب والقطط ده .. وليه من عند أون ذا رن .. ممكن من عند أي مسمط شوية كارتة (اكل الكلاب) وعيل صغير على العربية وهي واقفة .. وبعدين أنا كنت موقف ليه عربيتي وراه .. وجبت عربية واحد صاحبي وقفت قدامه .. وكنت ناوي أوقفهاله باليومين والتلاتة (عربيته ماتريكس الجديدة فأكيد عليها طلب في التأجير) وكنت ناوي على الله أن أي حد لو لمس عربيتي ........تتتتتتتتييييييييييت .. بس هو جاري اللي اتفلحص وكان فاكر انه ممكن يجي بالكلام ..

أنا بعمل دراسة جدوى للكلام اللي أنت قلته ده دلوقتي وبقلبه في دماغي يتنفذ ازاي .. بس أنا حاسس أن الموضوع ده في المنتدى حيبتدي ييتقلب بضحك وسخرية .. مع أني متضرر منه جداً .. وحيخرج عن نطاق الأراء ويخش في نطاق الهزار .. وانا لو فايق كنت هزت معاكم .. ها ها ها .

وفي الأخر أشكرك على أرائك الجديرة بالاحترام :k32: