لو سمحتم محتاج اعرف اغير زيت نوعة اية ولوزوجة كام الاوبترا 2009

**elzem2012** · 15-10-2018 11:08 AM

السلام عليكم ورحمة الله وبركاتة
انا محتاج اعرف اغير زيت لزوجة كام ونوعة اية بالتحديد علشان انا تعبت من مابين الشل 5000 والموبيل 5000 للزوجة 20w-50
الشل استخدمتة فى الاول وبعد مدة العربية جابت منى بلوف وغيرت 3 بلوف
والموبيل موجود الان بس مش مرتاح للصوت العربية حاسس انة عالى جدا وخشن
واسال الميكانيكى يقولى استخدم 20w-50
وميكانيكى تانى يقولى استخدم 10w-40
وغيرة يقولى استخدم للزوجة 5w-30
لما انا وزهقت من العربية بسبب وجع القلب دة

العربية اوبترا 2009 اوتوماتيك عاملة 111 الف كيلو

**borio1704** · 15-10-2018 04:22 PM

أكبر غلط إنك تاخد رأي حد في اختيار الزيت بتاع عربيتك...

محدش يعرف عربيتك أكتر من اللي صانعها... هو أحسن واحد يعرف إيه الكويس للعربية وإيه الوحش..

علشان كده بيبقى مع العربية كتالوج مكتوب فيه إزاي تستخدم عربيتك بأحسن طريقة تحافظ عليها لأطول فترة ممكنة... ومن ضمن الكتالوج مكتوب إيه هي السوائل اللي تستخدمها ومواعيد تغييرها..

عايز تعرف إيه الصح.. شوف كتالوجك عايز إيه.

نزل كتالوج الأوبترا من هنا..
Chevrolet Optra.Lacitti - Owners Manual (Australia.UK)

توصيات السوائل والزيوت مكتوبة في صفحة 272 و 273

الكتالوج بيقوللك إن الزيت اللي تحطه (في مواتير البنزين) لازم يكون مستوى الجودة بتاعه API SL على الأقل ومتصنف ILSAC GF-3 على الأقل...

واللزوجة واحدة من 3 للمواتير البنزين
0W-30
5W-30
10W-30
ما ينفعش تحط أي لزوجة تانية غير دول...

الكلام اللي فوق ده معناه إن مش أي زيت 5W-30 في السوق ينفع تحطه في عربيتك... خد بالك من الحتة دي كويس قوي.

طيب... إيه بقى من الزيوت اللي في السوق يمشي معانا هنا؟؟؟

الزيت اللي ممكن تلاقيه بسهولة ومطابق للمواصفات دي:

موبل1 x1 بلزوجة 5W-30
Mobil 1™ x1 5W-30

السوق فيه زيوت تانية بس كلها مستوردة ومش متوفرة إلا عند الموزعين المعتمدين...

لو حابب تعرف إيه الزيوت دي قوللي وأنا هقوللك عليهم.

خد بالك من حاجة مهمة جدا...

العربية موديل 2009... وده معناه إن الجوانات والأويلسيلات قدمت وهتبدأ تسرب زيت...

فالأحسن إنك تغير الأويلسيلات والجوانات دي علشان حرام تحط زيت تخليقي غالي ويروح منك في التسريب.

الجوانات والأويلسيلات اللي قصدي عليها هي:
- جوان وش التاكيهات
- أويلسيلات الكرنك

وأنا معاك في أي استفسار تاني.

...

**borio1704** · 20-10-2018 09:57 PM

المشاركة الأصلية كتبت بواسطة elzem2012

ربنا يكرمك يا باشا انت حد محترم جدا جدا ..
بس انا لسة مغير جوان وش التيكهات من 15 يوم
ثانيا ان حاليا موجود فى العربية زيت موبيل 20w-50
بس صوت المكينة مش عجبنى اخشن وعالى ...
والزيت التخليقى دة سعرة غالى عليا
وانا عايز زيت يكون حنين وكويس الان تقريبا بغير الزيت والفلتر كل 3 اسابيع
ملحوظة مهمة
العربية بتعمل كيلوهات كتير جدا يعنى ممكن 1000 كيلو فى اسبوع
الان انا شغال اوبرا وكريم ودائما فى زحمة وعوامل شغل شاقة جدا

على حسب ما فهمت من كلامك.. حضرتك كده بتغير الزيت كل 3000 كيلومتر...

وده أقل من المفروض بكتير.... وفلوسك بتروح عالأرض.. حرام عليك..

استخدم الزيت الصح وقعده في موتورك المدة الصحيحة.. هتلاقي نفسك وفرت فلوس وكمان حافظت على عربيتك...

والأهم إنك تشتري الزيت من أماكن مضمونة...

ما تشتريش زيت من بياع زيت.. اشتري مباشرة من بنزينة محترمة بتبيع زيت من نفس ماركتها...

يعني تشتري من محطات موبل نفسها ..

الزيت اللي حضرتك بتستخدمه ده يا ريت ما تحطوش في المكنة تاني... زي ما قلتلك المفروض تستخدم زيت لزوجته 5w-30 بمواصفات محددة

حسب الكتالوج.. مدة خدمة الزيت في عربيتك 5000 كيلومتر في الحالات الشاقة زي ما حضرتك وصفت... وفي رأيي الزيت ممكن يقعد لحد 6000 كيلومتر بدون أي مشاكل...

خد بالك كمان إنك لو غيرت كل 6000 كم فحضرتك كده وفرت تمن فلتر زيت..

خد بالك من حاجة تانية كمان...

الزيت الـ5w-30 هيوفر معاك في استهلاك البنزين... فغيار الزيت ممكن يكون مكلف.. بس حضرتك هتوفر في المقابل في تكلفة البنزين.

وكمان.. الزيت الصح هيخليك تنسى خشانة الموتور اللي حضرتك بتشتكي منها...

كل المزايا دي ثمنها غيار زيت غالي شوية.. بس هو في الحقيقة بيوفرلك فلوسك..

حضرتك لازم تجرب وتشوف الفرق.

...

**borio1704** · 03-12-2018 09:27 PM

المشاركة الأصلية كتبت بواسطة SAMSAM2019

لو سمحت كنت عايز اعرف عند تغيير الزيت هل يتم وضع ال4 لتر كلهم ام يتم التقليل لأنى سمعت ان ال4 لتر كتير و الزيت الزيادة بيدور على اضعف مكان و يخرج منه فياريت حد يفيدنى فى الموضوع ده

المقاس الصح هو بين علامة الـFull (أو الـMax) وعلامة الـEmpty (أو الـMin)

مش لازم الزيت يوصل للعلامة اللي فوق... المهم ما ينزلش عن العلامة اللي تحت.

ممكن ببساطة تحط 3 لتر وتشوف مستوى الزيت على المقاس.. وزود حبة حبة لحد ما توصل للماكس...

ادخل على الموضوع ده لو عايز تفاصيل أكتر..
مستوى الزيت في المحرك .. إيه أسباب نقص الزيت؟؟؟

...