ملـخــص تجربة الهوندا سيفيك 92 - مهم للمقبلين على الشراء
السادة الزوار والأعضاء الكرام .. تحية طيبة ..
لأن الهدف من المنتدى نقل الخبرات والآراء.. حبيت أنقل ملخص تجربتي للهوندا سيفيك 92 جايز تفيد المقبلين على الشراء واللي مش عارفين عنها حاجة .. بسم الله نبدأ الموضوع .
اولاً الفئة دي تحديداً من 92-95 تحسها كانت سابقة عصرها وأوانها, بتخيل انبهار الناس سنة 1992 وهما بيشوفوا عربية جديدة ف السوق اسمها هوندا سيفيك موديل 92 بشكلها الرياضي الجذاب اللي بيضاهي تصاميم البي أم دبليو والمرسيدس في وقتنا الحالي من وجهة نظري.. لو هنمسك العربية من برا مبدئياً, تصاميم خطوطها مع أبعاد وقياسات التصميم وتناسقها مع بعض بتكون محصلته شكل جذاب جداً وبيشد الأنتباه ومتحسش انها عربية موديل قديم .. أخت مراتي لما شافت العربية استغربت انها موديل 92 !!
بتكون ماشي ع الطريق وتلاقي معظم الناس بتبص على عربيتك .. اللي عنده خبرة قليلة ف العربيات بيكون عايز يفهم ايه الكائن ده اللي ماشي ع الأرض .. اللي باين انه موديل تسعيناتي بس تصميمه عصري وخطوط اتجاهات العربية ع الطريق مبينة مدى ثباتها واتزانها .. واللي عنده خبرة كبيرة ف العربيات لا إرادياً لو معدي جنبه بتلاقيه بيدوس بنزين وبيتحدى موتور عربيتك لأنه بيكون عارف ان فيه عفريت مستخبي تحت الكبوت عندك وفاهم كويس اوي يعني ايه هوندا..
كماليات نادراً ما تلاقيها ف مثيلاتها ف الوقت ده .. العربية تحسها فعلاً سابقة عصرها و أوانها وقتها وبتضاهي التصنيع والتصميم الحالي للسيارات..
الموتور مش هتكلم عنه لأنه غني عن التعريف وشركة هوندا من الشركات الرائدة في مجال صناعة السيارات .. بس يكفي كواحد مش خبير ف المحركات تحس ان الموتور مش آلة ميكانيكية وتحسه كائن حي بيتنفس ويفكر مع نفسه ويدي رد فعل واوقات تحسه بيتكلم عن نفسه وتحس انه صديق ع الطريق مرافقك طول رحلتك..
نتكلم عن ثبات العربية على الطرق .. انا معايا الهوندا سيفيك 92 بقالها سنة ومازلت كل يوم وكل تجربة قيادة أنبهر بالثبات بتاعها أكتر من التجربة اللي قبلها.. ف الوقت اللي العربيات بتاخد المنحنيات ع الواسع وعلى أهدى سرعة, العربية دي بتخليك تاخد المنحنى ع الضييق وبنفس سرعتك, بل أحياناً تحس الموتور صديقك بيكلمك ويقولك : عيب عليك انت راكب هوندا .. دووووس بنزين .. نظام التعليق بحسه متطور لدرجة انه بيعزل العربية على الطريق.. تجربتي للقيادة فيها .. نعووومة شديدة تحسسك ان العربية أنثى رقيقة .. وثبات رهيييب وموتور بيقولك هل من مزيد ويحسسوك ان العربية فجأة اتحولت من أنثى رقيقة لوحش خشن وعنيف..
الأنبهار الأكتر كان بعد ما تحصلت على الـ Service Manual للعربية .. بيتكون من حوالي 1140 صفحة شارح كل كبيرة وصغيرة ف العربية .. كل كبيرة وصغيرة ايه !! ده شارح كل مسمار وصامولة فيها .. بيدخلك ف رحلة جوة ادق تفاصيل عربيتك .. مليان معلومات دسمة وارقام ومعايرات انت نفسك تقدر تحدد بيها عربيتك محتاجة صيانة ولا ده آداء طبيعي .. شارح ازاي تفك وتركب كل أجزاءها بالتفاصيل المملة .. دوائر كهربية والكترونية كاملة للعربية ككل .. لو انت مهندس الكترونيات او هاوي وعندك فكرة جهنمية زي كومبيوتر رحلات, انذار سرعة عالية, شاشة لعرض بيانات اكتر عن آداء الموتور .. الدوائر دي بتسهل عليك المهمة يا هندسة .. وانا شخصياً عندي أفكار كتير هطرحها ف الموقت المناسب بعد تجربتها..
انا لما اشتريت العربية قولت هجيبها موقتاً لغاية ما اشوف حاجة احسن .. واختارت الموديل ده بالذات بعد عناااء طويل وتفكير ومقارنات وكانت أحسنهم من وجهة نظري بس مكنتش اعرفها كويس .. بعد ما جربتها بنفسي واتعرفت عليها أكتر .. وقعت ف غرامها ولا يمكن افرط فيها .. حتى لو ربنا كرم بعربية تانية (نعتبرها زوجة تانية :grin02:) هتفضل السيفيك أم العيال الأصيلة ومش هبيعها .. مش متخيل اصلاً هتقبل اركب عربية غيرها ازاي !!
العربية دي بعد ما تستخدمها وتاخد خيرها كله من رأيي لازم تتحط ف متحف ..
أتمنى مكونش بالغت ف المدح والثناء بس كان لازم أديها حقها ..
