الموضوع: مجموعة استفسارات عن الزيت ؟

وعليكم السلام ورحمة الله وبركاته..

أهلا وسهلا بحضرتك معانا..

أنا هجاوب على أسئلة حضرتك واحد واحد.. وإن شاء الله حيرتك تروح...

المشاركة الأصلية كتبت بواسطة فارس الواحة

اولا : طبعا نوع الزيت يختلف باختلاف البلد لان كل بلد ولها طقس ، هنا فى مصر فى الشتاء درجة الحرارة فى بعض الايام قد تصل إلى 10 درجات صباحا ، أنا حاليا استخدم زيت موبيل 20w50
فهل اغير هذا الزيت فى الشتاء ؟

صحيح الجو له دخل في اختيار لزوجة الزيت ... بس ده مش العامل الوحيد... والأهم من كده.. لزوجة الزيت مش هي العامل الأساسي في اختيار الزيت...

الحقيقة الموضوع فيه سوء فهم منتشر للأسف عن كيفية اختيار الزيت الصح

المرجع الوحيد اللي ترجعله هو كتالوج عربيتك... ولا تجارب ولا آراء .. ولا أي حاجة تانية..

ببساطة تفتح الكتالوج في قسم الصيانة وتشوف إيه مواصفات الزيت المطلوب...


مواصفات الزيت مش لزوجة وبس.. إنما فيه حاجة أهم اسمها "مستوى الأداء" .. أو تقدر تسميه مستوى الجودة ..

السوق مليان أنواع زيوت مختلفة بلزوجات متشابهة.. وكتير جدا تلاقي نفس الشركة عندها أكتر من نوع زيت كلهم ليهم نفس اللزوجة... أكيد مش كلهم زي بعض

المشكلة الكبيرة إن كل عربية ليها توصيات مختلفة عن التانية.. ونفس العربية ممكن تلاقي فيها أكتر من مواصفة مطلوبة حسب نوع الموتور اللي راكب فيها..


فمش أي حاجة تتحط في أي عربية...


كمان الماركة مهياش معيار للاختيار...

الموضوع تقدر تشبه بشركات الأدوية.. كلهم بينتجوا أنواع كتير من الأدوية.. ولو مسكت نوع معين مثلا (خافض حرارة مثلا) فكلهم عندهم نفس المادة الفعالة بس بأسماء مختلفة..


أما بقى موضوع تغير اللزوجة في الشتا.. فده كلام قديم قوي اختفي من 70 سنة بدون مبالغة... بس الناس بتردده لإنهم حافظين مش فاهمين.

ياريت تعدي على الموضوعين دول علشان تاخد فكرة أكبر...

القواعد الذهبية لاختيار زيت العربية.... موسوعة مبسطة لأساسيات زيوت المحركات
إزاي تختار لزوجة زيت الموتور المناسبة لعربيتك؟؟؟
إيه معنى أرقام اللزوجة اللي مكتوبة على علبة الزيت؟؟؟ (إزاي تختار لزوجة زيت الموتور المناسبة لعربيتك؟؟؟)

المشاركة الأصلية كتبت بواسطة فارس الواحة

ثانيا : كيف اعرف ان الزيت 5 ألاف او عشرة ألاف كيلو ، فى الغالب يكون غير مكتوب علية ذلك ، وعندما اسأل البياع الإجابات تتفاوت ؟

مفيش حاجة اسمها زيت 5000 وزيت 10 آلاف...

كل الزيوت بتعيش المدة المكتوبة في كتالوج العربية.. ارجعله واعرف المدة الصحيحة لتغيير الزيت بتاع عربيتك.

بس لازم الزيت يكون زي طلبات الكتالوج.

ادخل هنا علشان تعرف ... إمتى تغير زيت الموتور؟؟؟

المشاركة الأصلية كتبت بواسطة فارس الواحة

ثالثا : ما رأيكم فى اضافة ايزى اكسترا على الزيت فى فترة الشتاء ؟

الزيوت الحالية مش محتاجة أي إضافات عليها لإنها أصلا عليها ما يكفي من الإضافات...

والإضافات دي موجودة بدون شك وده السبب في وجود أكواد "مستوى الأداء" على علبة الزيت .. والأكواد دي بتثبت إن الزيت بيحمي الموتور إلى مستوى محدد طبقا للاختبارات اللي تمت عليه.

فإوعى تصدق أي حد بيبيع أي إضافات.

ادخل هنا لو عايا تعرف عن.. إضافات الزيوت... إيه الحكاية؟ (إضافات الزيوت... إيه الحكاية؟)

المشاركة الأصلية كتبت بواسطة فارس الواحة

رابعا : هل زيوت ترميم الموتور حقيقة ام خداع تجارى ؟

بردو.. ما تصدقش أي حاجة من دي...

بفرض إن المرمم ده بيعمل حاجة فعلا.. فتأثيره محتاج فترة طويلة جدا علشان يعمل فرق حقيقي...

وبفرض إنه عمل فرق.. ففي أماكن المفروض ما يحصلهاش أي تغطية..

مثلا.. جدران السلندرات فيكون فيها "تخويشات" مائلة أو خربشة .. التخويشات دي مقصودة وبتطلع كدة من المصنع لإن ليها دور في انتظام حركة السلندر ..

فلو استخدمنا المرمم زي ما بيقولوا.. التخويشات دي حتختفي.

من الآخر.. الموتور اللي فيه مشكلة يتعمر... إنما الكلام ده كله عبارة عن اشتغالات وناس عايزة تبيع على قفا ناس تانية ما تعرفش.


وملخص الكلام ده كله...

استخدم الزيت الموصى بيه في كتالوج عربيتك أو أحسن منه (من ناحية مستوى الأداء)... وغيره في مواعيده اللي في الكتالوج..

وساعتها مش هتلاقي أي مشاكل من اللي الناس بتشتكي منها في العادة.. وهتحافظ على موتورك بأحسن حالة.


يا ريت تقوللنا نوع وموديل عربيتك علشان نشوف إيه توصيات الكتالوج .. أو لو عندك الكتالوج تصورلنا صفحة توصيات الزيت.. وإن شاء الله نساعدك تلاقي الزيت الصح لعربيتك.

...

المشاركة الأصلية كتبت بواسطة فارس الواحة

مشكور ، طيب سيارتى هوندا سيفيك مانيوال 92 ، قولى احد زيت ايه ؟

أنا آسف إني اتأخرت عليك في الرد.. بصراحة الكتالوج دوخني شوية لحد ما لقيته...

ده الكتالوج لو حابب يكون عندك..

Honda Civic 1992 - Owners Manual

حسب المكتوب في الكتالوج في صفحة 110.. فالزيت المسموح بيه مواصفاته كالتالي:

مستوى الأداء:
تصنيف API SG على الأقل.. يعني تقدر تحط أي زيت مكتوب عليه SH أو SJ أو SL أو SM أو SN بالترتيب من الأسوأ إلى الأفضل..

ويفضل يكون موفر في الطاقة..


اللزوجة:
5W-30 أو 10W-30 .. ومش مسموح بأي لزوجة تانية غير دول..

حسب المواصفات دي.. فحضرتك تقدر تحط أي زيت بلزوجة 5W-30 لإن مستوى الأداء المطلوب في الكتالوج أقل من أي زيت في السوق باللزوجة دي..

فاضل بس إننا نشوف إيه الزيوت باللزوجة دي اللي بتوفر في استلاك البنزين حسب ما الكتالوج بيفضّل...

الزيوت دي في السوق مش كتير الحقيقة..

وعلى العموم.. أي زيت مكتوب في المواصفات بتاعته مواصفة ACEA A1 أو A5 هيكون موفر في البنزين (الـACEA مواصفة تانية مش مطلوبة هنا بس بتساعدنا نختار صح) ..
بردو الزيوت اللي عليها مواصفة ILSAC هتكون موفرة في البنزين..

الزيوت الموفرة دي هتبقى في الحالة دي أفضل زيوت تتحط عندك..

الزيوت دي هي:

زيت آيسن بلزوجة
AISIN Engine Oils Catalogue



زيت موبل1 x1 بلزوجة 5W-30
Mobil 1™ x1 5W-30



زيت مانول إنرجي فورمولا بلزوجة 5W-30
https://www.mannolegypt.com/mannol-p...-formula-5w-30



زيت بترومين سوبر سنثتيك A-1 بلزوجة 5W-30
https://www.petromin.com/product-category/gasoline/



زيت آمسويل OE بلزوجة 5W-30
Amsoil OE 5W-30 Synthetic Motor Oil



زيت آمسويل XL بلزوجة 5W-30
Amsoil XL 5W-30 Synthetic Motor Oil



زيت آمسويل سجنتشر بلزوجة 5W-30
Amsoil Signature Series 5W-30 Synthetic Motor Oil



زيت ليكوي مولي سبيشال تك AA بلزوجة 5W-30
LIQUI MOLY SPECIAL TEC AA 5W-30



زي ما قلت لحضرتك... دول المفضلين... بس أي زيت بلزوجة 5W-30 تقدر حضرتك تستخدمه بدون مشاكل إن شاء الله...

بس نصيحة .. لو هتشتري زيت حاول تثبت عليه.. لإن التغيير باستمرار بيقلل من كفاء الزيت الجديد.


...

المشاركة الأصلية كتبت بواسطة فارس الواحة

أخى مشكور جداا لردك المستفيض والوافى ، بس فيه كام نقطة بتفرض نفسها بحكم انت فاهم جدا اسمحلى اطرحها عليك :
أولا : الزيت مثلا موبيل وان 5w30 أمشى بيه كام كيلو ، لأن الزيت مبيكونش مكتوب عليه النقطة دى ، ولما اسأل اللى بشترى منه بتكون الاجابات متفاوته ؟
ثانيا : المانيوال بيكون بالانجليزى و استخراج معلومة لزوجة الزيت منه لناس كتير هتكون صعبة ده غير صعوبه العثور عليه ، مفيش طريقة سهلة لمعرفة اللزوجة المناسبة للعربية ؟
ثالثا : سؤال برا الموضوع شوية ، عربيتى 92 بغسلها من تحت و ارشها زيت مستعمل ، الإجراء ده ناس بتعمله كطبقة عازل من الرطوبة المية فى الشتا ، ده صح ولا غلط ، ارشها زيت مش مستعمل انضف ، ولا ارشها بإيه ، بس عايز مادة مش مكلفة ، و أرشها كل قد إيه ؟
* خالص شكرى لوقتك أخى ،،،

هو يبدو إني اتكلمت كتير لدرجة إن بعض الأسئلة أنا جاوبت عليها فعلا بس الظاهر تاهت وسط الكلام الكتير..


السؤال الأول أنا جاوبت عليه قبل كده في أول رد على حضرتك...

المشاركة الأصلية كتبت بواسطة borio1704

مفيش حاجة اسمها زيت 5000 وزيت 10 آلاف...

كل الزيوت بتعيش المدة المكتوبة في كتالوج العربية.. ارجعله واعرف المدة الصحيحة لتغيير الزيت بتاع عربيتك.

بس لازم الزيت يكون زي طلبات الكتالوج.

ادخل هنا علشان تعرف ... إمتى تغير زيت الموتور؟؟؟

والتفاصيل كلها في الموضوع اللي في الرابط


بالنسبة للسؤال الثاني ...

للأسف المانيوال المتاح لينا على الإنترنت بيكون بالإنجليزي في أغلب الأوقات.. خصوصا للعربيات القديمة.. بس مفيش عربية جديدة بتتباع في الشرق الأوسط إلا ولازم يكون موجود فيها مانيوال باللغة العربية..

المانيوال بييجي مع العربية بالضبط زي العدة والاستبن.. وبيكون موجود في درج العربية..


طيب إزاي نعرف معلومة الزيت في الكتالوج؟؟؟

ببساطة.. معلومات الزيت "غالبا" بنلاقيها في مكان من 3 أماكن..

1- قسم الصيانة (Maintenance) في الكتالوج.. صفحة زيت الموتور (Engine Oil)
2- قسم المواصفات (Specifications) أو المعلومات الفنية (Technical Information)... وده غالبا بيكون آخر قسم في الكتالوج.. صفحة السوائل والزيوت (Recommended Fluids and Lubricants)..
3- كتيب الصيانة اللي بييجي بشكل منفصل عن الكتالوج (بالذات في العربيات الأوروبية).

والكتالوج بيبقى فيه فهرس قبل كل قسم في الكتالوج بيقول كل موضوع موجود في أنهي صفحة

وآخر صفحات في الكتالوج بيبقى فيها فهرس للكلمات وبيقوللك الكلمة موجودة في أنهي صفحات... يعني تدور على كلمة Engine Oil حتلاقيها (مثلا) في صفحة 100 و 102 و 150..

ومعلومة اللزوجة هتلاقيها مكتوبة في الكتالوج في نفس الأماكن اللي قلت لحضرتك عليها..

غالبا ممكن تستخدم أكتر من نوع لزوجة .. ودي بتعتمد أساسا على درجة الحرارة .. وعادة بتيجي رسمة بتشرح كل لزوجة تستخدم بين درجات حرارة كام (حد أقصى وحد أدنى).. وحاليا مبقاش فيه حد أقصى للحرارة.. لإن الموتور درجة حرارته واحدة دايما.

ادخل على الموضوع ده لو عايز تعرف إزاي تقرا الكتالوج وإيه أهميته..
اقرا كتالوج عربيتك.. هتستريح

وادخل هنا لو عايز إزاي تختار اللزوجة.. وفيه شرح أوضح لرسمة اللزوجة في الكتالوج.
إزاي تختار لزوجة زيت الموتور المناسبة لعربيتك؟؟؟


بالنسبة للسؤال الثالث:

رش العربية بالزيت يعتبر إجراء مؤقت للحماية.. مش حاجة دايمة..

ولو كنت بترش الزيت على حاجة متحركة زي الكبالن مثلا فالزيت فعلا هيطير بمجرد التحرك بالعربية أو زيادة سرعة العربية عن 30 كم/س...

والمشكلة إنك لو بترش جسم العربية من تحت علشان تحميه.. فلو جه عليها مية كثيفة أو صابون مثلا طبقة الزيت دي حتتشال ببساطة.. ده غير إنها بتتأثر بالحرارة بدون شك..

سواء استخدمت زيت مستعمل أو زيت جديد.. النتيجة واحدة.. فوفر فلوسك..

عموما .. استخدام الشحم أفضل بكتير لإنه هيفضل مدة أطول.. بس بردو بيتشال .. وأكيد مكلف أكتر..

والأفضل من ده كله إنك ترش العربية بطبقة حماية ثابتة (أندركووت) Under Coat..

مكلف شوية صحيح.. بس هتعمله مرة واحدة وتريح بالك تماما.


...

المشاركة الأصلية كتبت بواسطة فارس الواحة

السلام عليكم استكمالا للموضوع ، اليوم ذهبت لشراء زيت موبيل1 5w30 ، لكن الرجل استغرب جدا وقال ده للمحركات الحديثة وسيارتك موديل 92 ، القديم كله يأخذ لزوجة 20w50 وقال ده هيتبخر بسرعة معاك ولزوجته خفيفه جدا على حالة الماكينة معاك ودورت على النت لقيت ناس كتير بتأكد المعلومة دى
رغم ان ده الزيت اللى موصى بيه فى الكتالوج ، اصدق الكتالوج ولا كلام الناس ؟!!

صدق الكتالوج طبعا

الناس بتتكلم من حالات مروا بيها في عربيات مختلفة.. وأغلب اللي اتكلموا وطلعوا السمعة دي مش فاهمين يعني إيه مواصفات زيت.. وكمان الكلام اللي زي ده طلع من فترة طويلة (40-50 سنة) وفي الفترة دي العربيات القديمة مش بتستخدم زيوت خفيفة ولا تخليقية.

خد بال حضرتك من حاجة...

موبل1 على سبيل المثال عندها 3 زيوت بلزوجة 5W-30.. كل واحد فيهم مواصفاته تختلف عن التاني.. فمش معنى إنهم لزوجتهم واحدة يبقوا ينفعوا كلهم معاك...

علشان كده بنقول الكتالوج أهم حاجة لإنه بيقولنا إيه الصح وإيه الغلط.

موضوع الكيلومترات ده ملوش دخل في اختيار لزوجة الزيت نهائي.. وللأسف دي أسطورة الناس فهمتها غلط وكان مقصود بيها حاجة تانية خالص... تقدر تاخد فكرة عنها من هنا..
أسطورة الـ100 ألف كيلومتر... هل لها أصل؟؟؟


طيب.. هسأل حضرتك سؤال... الزيت بينقص في الموتور ولا لأ... ولو بينقص .. بينقص قد إبه؟؟

الحاجة الوحيدة اللي ممكن نتوقعها مع استخدام الزيت التخليقي إن الزيت ممكن ينقص شوية أول غيارين زيت علشان الشنابر ممكن يكون عليها ترسبات صمغية نتيجة استخدام الزيوت المعدنية "الرديئة"... وبمجرد ما الترسبات دي تتشال الشنابر بترجع تحكم تاني..

الزيت التخليقي هيدوب الترسبات دي بس يمكن تاخد معاك مدة شوية (غيارين زيت بالكتير إن شاء الله)