خطوات فحص وتجديد نيسان صنى 3 سنوات

المكان : مجمع تراخيص الاميرية
الزمان : الثلاثاء 2018/10/09 ---- السبت 2018/10/13
المهمة : فحص وتجديد العربية 3 سنين
النتائج : تمت بحمد الله
الاوراق المطلوبة : (شهادة مخالفات - ورق فحص وتجديد 3 سنين - فحص - شهادة صلاحية طفاية - تامين اجبارى - صورة رخصة العربية - بطاقة شخصية سارية)
الشرح : -
بداية اخذت القرار انى اخلص المهمة على يومين علشان احافظ على قواى العقلية من زنقة المرور
بدات يوم الثلاثاء ورحت المرور جبت الورق وعملت التامين الاجبارى وشهادة المخالفات ورحت ميدان الفحص اخذت البصمة و فحص المهندس وفحص البيئة
تكاليف اليوم ده كانت كالاتى
الورق فحص وتجديد 3 سنين = 55 جنيه
التامين الاجبارى 3 سنين = 310
شهادة مخالفات (الحمد لله مطلعش عليها مخالفات) = 10
انهيت اليوم ده بانى فحصت العربية ورحت ماشى اخذت وقت تقريبا ساعة ونصف
كان فاضلى فحص الطفاية وتقديم الورق
رحت يوم السبت عملت فحص للطفية وطلعت الدور الثانى الخاص بمربع الزيتون والاميرية اخذت رقم واستنيت دورى
طبعا كلنا عارفين ان ضريبة السيارات غليت من فترة وطبعا زمان كان الموظف بيكتب قيمة الضريبة بدون تفصيل وتروح تدفعا فى الخزنة
دلوقتى بقوا يطبعوا ورقة فيها كل التفاصيل وكانت الصدمة , ماعلينا خليها فى وقتها
رحت للشباك وقدمت الورق الموظفى قالت لى ناقص شهادة فحص صلاحية نظام الغاز (عربيتى غاز طبيعى بقالها سنة و 8 شهور) قلت طيب خلينى ادفع الضريبة واروح اجيب شهادة فحص الغاز تكون طلعت ملف العربية من الارشيف
المهم طلعت على محطة الغاز جبت شهادة الصلاحية ورجعت ودفعت الضريبة وقدمت الورق وكله تمام ونزلت استنى الرخصة
شوية ندهوا عليا وقالوا عايزين ملحق تامين اجبارى بشهريبن (مش عارف ليه) المهم رحت عملته عند نفس الشباك اللى جببت منه التامين الاجبارى
ورجعت تانى للموظفة وقدمته ونزلت استنى الرخصة لحد ما استلمتها اخيرا
تكاليف اليوم ده كانت كالاتى /-
فحص طفاية = صفر (صلاحية الطفاية خمس سنين وكانت معاية ولسة بعلبتها)
ضريبة تجديد 3 سنين = 2592.80 (الفان وخمسمائة اثنان وتسعون جنيها مصريا و 80 قرشا فقط لاغي)
مقسمة كالاتى (ضريبة = 90 جنيه / رسم تنمية = 2250 جنيه / رسم راديو = 4.20 جنيه / رسم استعمال لوحات = 1.20 جنيه / صندوق تحسين خدمة المرور = 75 جنيه / قيمة ملصق مرور = 2 جنيه / قيمة رخصة ونموذج = 20 جنيه / دمغة نوعية = 10 قروش / دمغة تنمية موارد = 30 قرش / رسم تامين صحى = 150 جنيه)
شهادة صلاحية نظام الغاز = 46 جنيه من محطة غز كارجاس
ملحق تامين اجبارى بشهرين = 34 جنيه
استلمت الرخصة وطلعت جرى من بوابة المرور وكالعادة قلت فى سرى مش وهشوف وشكوا تانى غير بيعد 3 سنين يا بشر