الموضوع: مشاكل بدأت تظهر ف العربية - هوندا سيفيك 92

انا معايا هوندا سيفيك 92 كاربراتير, بدأت تظهر عليها مشاكل مؤخراً ورا بعض فجأة .. محتاج مساعدتكوا لأن خبرتي ف العربيات مش قد كدا..
عايز اعرف سبب المشاكل دي وتتحل ازاي وياسلام بقى لو متوسط تكلفة كل حاجة.. تبقى عملت الواجب وزيادة..

- الأول الدريكسيون كان ثابت جداً.. الطبيعي لا خفيف ولا تقيل .. دلوقتي بدأت أحس انه بقى خفيف وفيه تعويمة بسيطة مش كبيرة بالذات على السرعات العالية او فوق الطرق الغير ممهدة حتى لو نقرة صغيرة ف الأسفلت.

- الدريكسيون بيتهز مع الحفر .. بحس ان الحفر بتغير اتجاه الكاوتش وبتسمع ف الدريكسيون ف نفس الأتجاه.

- لما بكون ماشي على طريق متسفلت كويس ومستوي مبقتش أحس ان العربية معزولة عن الطريق.. لدرجة اني بحس بزلط الأسفلت اللي متهيألي فروقه مليمترات قليلة وبيعمل صوت شبيه بصوت الكاوتش لما يمشي فوق زلط كبير بس على أهدى كتيييير.

- لما بكون ماشي على طريق غير ممهد بحس العربية بتترج وكأني راكب جمل (ده ان مكانش الجمل أكتر راحة) حتى لو الحفر والتعرجات خفيفة بحسها بتسمع ف العربية كلها وبتنزل وتطلع وتميل يمين وشمال .. مكانتش بتعمل كدا الأول.. ده ناهيك عن صوت الخبط اللي بحسه بيسمع ف الشاسيه.

- لما بكون طالع مطب او ماشي فوق تعرجات بسمع صوت تزييق قدام ولما بنزل من على المطب بحس برزع ورا وخبط وكأن الكاوتش بيخبط ف الشاسيه.

- العربية كنت باخد بيها اي منحنى او أي غرزة خفيفة يادوب نقلة حارة على سرعة عالية بثبات رهيييييب جداً والدريكسيون بيكون فيها ثابت .. دلوقتي بقيت أحس ان فيه تعويمة بسيطة ف ثبات العربية و ثبات الدريكسيون هي مش مخيفة نهائي ولا بحس ان العربية غير آمنة بس مضيقاني.

- لما أجي أدور العربية الموتور بيشتغل والأر بي ام بيقل يقل بسرعة وتبطل, لازم ادوس على البنزين كذا مرة قبل ما أدور علشان أسحب بنزين من التانك وبتدور عادي بالطريقة دي.

معلش هتعبكوا معايا