الموضوع: مساعده ضروري ...عايزه انقل الملكيه و الرخصه مسحوبه (معرفش اى حاجه عن الاجراءات )

أشتريت سينوفا A1 2016 من سنه بتوكيل من توكيل
الرخصه انتهت من شهر 12 السنه الى فاتت و مشيت بيها و هى منتهيه و اتسحبت الشهر الى فات و اتكتب ف الوصل انتهاء رخصه قياده و السير بدون رخص !!
عايزة انقل الملكيه و ارخص اعمل ايه بالتفاصيل ؟ و المصريف كام انشاء الله
ملحوظه غير مدركه ايه هو المرور القديم و المرور الجديد و شهر عقاري
الرخصه المنتهييه مرور مدينه نصر
برجاء التوضيح بدون متوهونى انا تايهه خلقه ربنا
والف شكر مقدماا
ريهام ..

سهله
هتروحي مرور مدينه نصر الاول بالوصل هتدخلى مكتب التراخيص وهيبعتوكي تدفعي الغرامه فى الخزنه وبعدين هتطلبى شهاده مخالفات الاول وتدفعي كل المخالفات اللى على العربيه وبعدين تطلعي على شباك التراخيص وتعملى 2 شهاده بيانات واحده موجهه للشهر العقارى وواحده موجهه للمرور الجديد اللى هتنقلي ليه الملكيه وبعدين تعملى استعلام امني

خدي معاكى بقى من كل توكيل قد 10 صور كده والبطاقه قد 10 صور برده والوصل يجي 10 صور يعني تشكيله كده عشان متدوخيش ويبعتوكي رايحه جايه تصوير

وبعدين تاخدي شهاده البيانات الموجهه للشهر العقارى وتشترى نموذج عقد بيع وتدفعي ضريبه نقل الملكيه وتاخدي العقل المسجل تصوريه قد 10 نسخ برده واحتفظي بكل الورق ده

كده انتهت المشكله
هتروحي بقى للمرور الجديد اللى هتنقلى فيه ومن البدايه كده هتقومي جايبه ملف تامين من الاكشاك اللى برا وتطلعي بيهم لقسم التراخيص
الموظف هياخد منك الملف واصل التوكيلات وشهاده البيانات واصل العقد المسجل وهيملى البيانات وبعدين هيبعتك الخزنه تشترى ملف فحص وترخيص بتاع 4 ورقات كده جوه ملف وترجعي لموظف التراخيص تانى
هياخدهم منك يملى فيهم شويه بيانات ويختم وبعدين يديكى الملف تنزلى تفحصى والمهندس هيملى بقيت البيانات ويرفع البصمه بتاعت الشاسيه والماتور ويتاكد من العادم والشاسيه ميكونش فيه لحامات والكلام ده ويخليكي تشترى طفايه وبعدين يختملك الورق ويديهولك
وبعدين تطلعي لموظف التراخيص تانى هيعملك بيان نقل ملكيه وبيان تجديد وهيديكي نسختين من الورق تروحي بيهم الخزنه تدفعي الضريبه وتختمي وترجعيلو تانى هياخد منك الملف كله ويمضيكي على اقرارات وشويه ورق ملوش لزمه كده وهيتاكد من ان الملف مش ناقصو اى حاجه وبعدين هيقولك روحي فكي النمر وهاتيها

هتنزلى تخلى اى حد يفكلك النمر وتطلعي بيهم لموظف التراخيص تانى هيديكي وصل بالنمر الجديده ووصل تانى تسليم القديم هتروحي شباك اللوحات تسلمي القديم وتاخدي نمر جديده ويديكي وصل تسلميه لموظف التراخيص تانى هتطلعي تديلو الوصل هيديكي الرخصه الجديده

( ملحوظه )
الموضوع ده يخلص فى يومين بالظبط يوم فى المرور القديم ويوم فى المرور الجديد
وعشان متعطليش نفسك لازم تتاكدي انك خدتي كل حاجه معاكى وكل الاوراق اللى تخص العربيه وتكونى مرتبه الملف كويس عشان تنجزي وقتك الموظف ميوقفكيش ساعتين على الشباك

تحياتى