الموضوع: استفسار بخصوص أنسب زيت لسياره هيونداى اكسيل 97 1500

أهلا وسهلا بحضرتك...

كنت حابب أوضح لحضرتك بعض الأشياء اللي هتفيدك لما تختار الزيت المناسب لعربيتك إن شاء الله... وبعدين نشوف إذا كان اختيار حضرتك مناسب ولا لأ..

أولاً.. اختيار الزيت دايما بيبقى بناء على توصيات كتالوج عربيتك..

ولا بالآراء.. ولا بالتجارب.. ولا بالسمع من ناس تانية.. ولا بأي حاجة تانية نهائي..

ثانيا.. أهم حاجة في اختيار الزيت هي مستوى الأداء بتاعه... اللي بنعرفها من بعض الأكواد اللي بتحدد مستوى الأداء ده.. وهي فعليا اللي بتفرق في أداء الزيت وبتدي أفضلية لزيت على التاني..

وهي دي اللي عاملة لخبطة لناس كتير لإنهم ما يعرفوش عنها حاجة فالاختيار بيبقى عشوائي طبعا وانت وحظك... إلا لو كان عندك الحد الأدنى من المعلومات وبالتالي ساعتها هتختار صح..


ثالثا.. مسألة معدني ولا تخليقي مش بتفرق كتير لو اخترنا الزيت صح حسب مستوى الأداء اللي اتكلمنا عليه من شوية..

بناء على الكلام ده.. لازم نشوف كتالوج عربيتك طالب إيه الأول ...

تقدر تنزل الكتالوج من هنا:
Hyundai Excel 1992 - Owners Manual

الكتالوج مكتوب عليه 1992 بس هو نفسه بتاع الـ97.. ما تقلقش..

دي صفحة توصيات الزيت في الكتالوج..


من الصورة نقدر نعرف إن الزيت المطلوب مستوى أداؤه API SG.. وده مستوى قديم ومنخفض من الأداء.. وزيوت كتير في السوق دلوقتي أحسن منه في مستوى الأداء..

باختصار تقدر تحط أي زيت مستواه SH أو SJ أو SL أو SM أو SN.. بالترتيب من أسوأ مستوى (SH) إلى أحسن مستوى (SN)...

نيجي للزوجة...

تقدر تحط زيت بأحد اللزوجات التالية (مع مراعاة درجة حرارة الاستخدام):

20W-50 أو 20W-40 أو 20W-20
10W-50 أو 10W-40 أو 10W-30
5W-40 أو 5W-30 أو 5W-20 ( → مجموعة اللزوجات دي تستخدمها لو كان الزيت تخليقي بس)


تعالى نشوف الزيت اللي حضرتك بتقول عليه...

تقدر تشوف الداتاشيت بتاعت الزيت من هنا.. COOP XPL-SM Datasheet

زيت التعاون XPL-SM مواصفاته كالتالي:

مستوى الأداء:

مطابق للمواصفات التالية:
تصنيف API: مستوى SM
تصنيف ACEA مستوى A3/B4 حسب مواصفة 2008
مواصفة مرسيدس MB 229.1
مواصفة فولزفاجن: VW 501 و VW 505

اللزوجة : 20W-50

من الكلام اللي فوق ده نعرف إن الزيت مطابق من ناحية اللزوجة .. وأعلى بكتير من طلبات الكتالوج...

طبعا كده يبقى الزيت ممتاز لموتور عربيتك

آه.. من ناحية كونه معدني ولا تخليقي... الزيت معدني.. بس زي ما قلت لحضرتك.. الموضوع ده ما يفرقش كتير.. خصوصا لما تعرف إن فيه بعض الزيوت التخليقية (الرخيصة) في السوق مستوى آداءها أقل من الزيت ده.


لو عايز تعرف معلومات وتفاصيل أكتر عن زيوت السيارات.. أنصحك تدخل على الموضوع ده:
القواعد الذهبية لاختيار زيت العربية.... موسوعة مبسطة لأساسيات زيوت المحركات

وتحت أمرك في أس سؤال تاني..


...