شباب المنتدى المتميز نايل موتورز السلام عليم
بداية حابب اطلب من كل من يملك هذه السيارة يكتب تجربته معاها لان واضح حتى الان ان فيه اختلاف كبير فى الاراء على العربية دى مع كل المبيعات والانتشار اللى حققتة فى الثلاث سنوات الماضية
نبدا التجربة على بركة الله
كنت عملت موضوع من سنة تقريبا عن https://www.nilemotors.net/Nile/501766-2016.html (حكايتى مع النسيان صنى فيس ليفت 2016 بعد سنتين استخدام) حكايتى مع النسيان صنى فيس ليفت 2016 بعد سنتين استخدام

وقلت فيه تجربتى الكاملة مع السيارة من وقت الشراء والصيانة والعيوب وتحويلها للعمل بالغاز الطبيعى وفيه كمان موضوع عن غيار زيت الفتيس بتاعها فى قسم الزيوت
النهاردة حابب اضيف شوية حجات حصلت فى خلال السنة اللى فاتت
بعد الموضوع اللى فات كان وقت تغيير زيت الفتيس قرب وكنت مقرر انى اعمل صيانة كاملة للفتيس (فك وتنظيف الكرتيرة والفلتر بالكامل)
https://www.nilemotors.net/Nile/502847-n17.html (تغيير زيت فتيس نيسان صنى n17 اوتوماتك خارج التوكيل) تغيير زيت فتيس نيسان صنى خارج التوكيل

المهم عدت صيانة الفتيس وكانت العربية عاملة (73,000)الف كيلو متر منهم حوالى (30,000) الف كيلو متر تعمل بالغاز الطبيعى
كنت لسة مغيرتش سير المجموعة الاصلى غيرتة والعربية عاملة (85,000) الف كيلومتر وكنت ماشى طول الفترة دى معايا سير احتياطى
كنت بشتكى من صوت خشانة او زنة معدنية والعربية دايرة على السلانسيه والتوكيل فشل فى حلها وعرفت بعد كده انها بلية الشداد واستعديت لتغيرها ولكن كانت المفاجئة وقت تغيير السير ان سبب الصوت المزعج ده كان بسبب عدم احكام ربط صامولة بلية الشداد (راحت التوكيل 3 مرات والصوت كان واضح فيها والتوكيل قال مفيهاش حاجة)
الزميل المحترم المهندس مصطفى حسن كان عمل فيديو مميز لتجربة منتج بيساعد على زيادة تزييت المحرك باسم تجربة فياجرا السيارات
عقدت العزم انى هجرب مع اول غيار زيت والنتيجة كانت مميزة جدا
صوت الماتور بقى هادى عن الاول السحب والتسارع اتحسن بشكل ملحوظ وكمان معدل استهلاك الغاز نزل بمقدار بسيط بس محسوس
انا ماشى بالعربية حتى الان فى حدود مائة الف كيلومتر
الراى الشخصى بدون انحياز
من حيث المحرك
1- تصميمه غريب شوية خصوصا بالمانفول المقلوب
2- حوض المحرك ضيق جدا الشغل فيه مقرف حبتين خصوصا مكان سير المجموعة
3- فى المجمل اداءة كويس مش رياضى مش هيرضى مهوسى السرعة والغرز
4- صياناته قليلة الكاتينة جنزير مش محتاجة تتغير غير لما صوتها يعلى وده مش هيكون على المدى القريب يعنى ممكن تمشى 300,000 الف كيلومتر على ماتفكر تغيرة
5- البوجيهات اللى نازلة فى العربية اريديوم بتتغير كل (100,000) كيلومتر وده كويس لان علشان توصل للبوجيهات لازم تفك المانفول
6- كنت قبل تحويل الغاز وبعد التحويل كمان بستخدم زيت وولف وكان صوت الماتور حلو وكنت مقتنع بيه جدا بس كنت متضايق انى كل غيار زيت الاقى فيه شوائب كتيرة فى فلتر الزيت
7- بسبب شوائب الفلتر قررت انى اغير لزيت فيسكو (لما وولف رفعت الاسعار بطريقة غير مبررة ولما خدمة العملاء كلمتنى قالوا هنعملك خصم 10% علشان انت عميل قديم وانا تعاملى معاهم معداش سنة)
المهم غيرت لفيسكو وحطيت معاه الفياجرا الاخضر علشان المحرك يعمل بالغاز والنتيجة ان اول غيار للزيت لقيت الفلتر نازل لاول مرة (حتى ايام ماكانت العربية بنزين بس) نازل من غير شوائب كتيرة زى بقية الزيوت
من حيث الفتيس
1- فتيس اربع نقلات عملى جدا وناعم وبيساهم فى تقليل استهلاك الوقود لانه بينقل بدرى لو رجلك خفيفة على الدواسة
2- لم يظهر منه مشاكل كثيرة زى فتايس DSG بتاعت فولكس والـ CVT بتاعت نيسان ورينو
3- دايما نيسان بتصمم انك تستخدم السوائل الاصلية بتاعتها (اللى ثمنها مبالغ فيه جدا) وبالنسبة لزيت الفتيس توصى باستخدام زيت Matic S
4- انا غيرت زيت فتيس مرتين وفى المرتين استخدمت زيت Wolf ATF Diii والحمد لله مفيش اى مشاكل فى الفتيس
5- غيار زيت الفتيس اللى جاى (خلاص قرب) ناوى اغير واستخدم زيت AMSOIL ATF MV علشان اجرب لان ده تقريبا الزيت الوحيد اللى فى السوق اللى بيشمل مواصفات زيت Matic S
6- للاسف لما فكيت الكرتيرة وحبيت اغير فلتر الفتيس لم اجد منه جديد علشان كدة نظفته وركبتة تانى (الفلتر عبارة عن مصفاه سلك)
7- والعربية باردة دايما بيبقى فيه نتشة بين الغيار الاول والثانى وبمجرد ماتسخن النتشة دى بتروح
من حيث العفشة والثبات
1- العفشة ناشفة شوية بالذات مع اى نقرة لكن معقولة مع المطبات العادية
2- ارتفاع العربية عن الارض مع مقاس الكاوتش الاصلى كان مسبب عدم ثبات مع السرعة بعد الـ 140 كيلومتر فى الساعة بالذات لوكان فيه تيار هواء جانبى وانا بس اللى سايق
3- مع تركيب الغاز زاد وزن العربية حوالى 80 كجم (وزن اسطوانة الغاز) وانخفضت من الخلف بمقدار 2 سم تقريبا وده زود الثبات بشكل ملحوظ وممكن تمشى على 140 كيلومتر بدون مشاكل فى الثبات حتى مع تيارات الهواء
4- لم اقم بتغيير اى جزء فى عفشة السيارة باستثناء بلى العجلة الخلفية (مرة فى التوكيل ومرة غيرتها انا)
5- بربط العفشة كل (25,000) الف كيلومتر تقريبا مع بعض التشحيم
6- مفيش مشاكل مع الكبالن نهائى (حتى الان على الاقل)
من حيث الفرش الداخلى والصالون والشنطة
1- الفرش (المقاعد والكنبة) الفوم بتاعهم كثافته عالية شوية علشان كده الكرسى ناشف فى القعدة (مش زى الشيرى والاسبرانزا التيجو كراسيها حجر) بس ده بيديهم عمر طويل نسبيا
2- الفيبر الداخلى خامتة مش محترمة جدا لكن عملية يعنى الشمس والحرارة مش ماثرة فيهم حتى الان تنظيفهم صعب لكن بيتنظفوا
3- الصالون واسع وده اكثر مايميز هذه السيارة يعيبها انها كنزة من الاجناب (يعنى الكنبة اللى ورا تاخد 3 بس اى كان حجمهم)
4- عزل الصوت إلى حد كبير مرضى بالنسبة لفئة السيارة وممكن لو حابب بتزود العزل على مزاجك
5- وضعية القيادة عالية وكاشفة ومش نايمة زى الالنترا او السيراتو
6- العدادات فى الفئة الثانية فقيرة شكلا ومضمونا بس فى السوبر صالون محترمة جدا
7- يعيب الكاسيت الاصلى عدم وجود USB لكن ممكن تجيب فلاشة بلوتوث تتوصل على الـ AUX

فى النهاية حابب انى مكونش نسيت حاجة ولو نسيت فكرونى
ولو عندكم اسئلة اكيد مرحب بها
سلام مؤقت