الموضوع: زيوت السيارات

زيت مصر فينكس من الزيوت اللي مواصفاتها عالية مقارنة بزيوت تانية كتير...

لكن اختيار الزيت بيبقى حسب توصيات الكتالوج.. ولا بمزاجي ولا بمزاجك ولا بمزاج أي حد تاني...


توصيات الزيت من الكتالوج بتاعتك كالتالي:

زيت تخليقي بلزوجة 10W-40 - مطابق لمواصفات API SL و ACEA A3
أو
زيت تخليقي بلزوجة 5W-30 - مطابق لمواصفات API SL و ACEA A1 و ACEA A5 .. ويفضل استخدامها في الجو القارس البرودة (صفر مئوية أو أقل)

لو عايز تتأكد.. تقدر تنزل الكتالوج من هنا..
https://drive.google.com/open?id=0B5...mRLQ2tHZ2oxSmM
توصيات الزيوت في صفحة 285 و 286..

أفضل زيت دايما هو المطابق لـ (أو أحسن من) "كُـل" مواصفات الكتالوج.. مش جزء منها بس...

تعالى نشوف مواصفات زيت فينكس إيه..
اللزوجة: 5W-40

مستوى الأداء: مطابق للمواصفات التالية:
- API SN/CF
- ACEA A3/B3-04
- ACEA A3/B4-04
- Porsche A40
- BMW Long Life 98
- MB 229.1/229.3
- VW 502/505
- OPEL GM–LL–B-025

تقدر تتأكد من مواصفات الزيت من هنا:
http://www.misrpetroleum.com.eg/pdf/products/oils.pdf

الزيت من ناحية مستوى الأداء مطابق لمواصفات كتير.. وينطبق على توصيات الزيت بلزوجة الـ10W-40 المذكورة في الكتالوج.. بس اللزوجة مش هي المطلوبة في الكتالوج!!!


بالنسبة لزيت آيسن التخليقي بالكامل Fully Synthetic...

اللزوجة: 5W-40

مستوى الأداء:
- API SN/CF

http://aisin.ae/upload/lpic/lpic_3.pdf

حسب المواصفات دي.. للأسف زيت آيسن مش هيكون هو الأفضل (باعتبار إنه مطابق لجزء من المواصفات).. ده غير إن اللزوجة مختلفة..
ما أنصحش بيه لعربيتك..

يمكن لو استخدمت لزوجة 5W-30 من زيت آيسن هيكون أفضل شوية... بس برده مش هو الأفضل..


حسب توصيات الكتالوج.. الزيوت الأفضل هي دي:

لو نويت على لزوجة 10W-40 .. فالزيت الوحيد اللي "تخليقي بالكامل" ومطابق لمواصفات الكتالوج هو زيت آمسويل XL

ِAmsoil XL 10W-40 Synthetic Motor Oil

مكن تستخدم كاسترول ماجناتك... بس مطابق بس لمستوى API SN... مفيش أي حاجة تانية..


لو نويت على الزيت 5W-30.. فالأفضل لك هو واحد من دول:

زيت موبل1 x1 (مكتوب عليه مناسب للسيارات اليابانية والكورية)
Mobil 1™ x1 5W-30

زيت بترومين سوبر ستثتك A-1


فيه طبعا زيوت تانية تنفع.. بس سيبلي شوية وقت أدورلك.. وبردو الموضوع راجع لميزانيتك في الأساس...

ونصيحتي.. اشتري الزيت اللي تلاقيه جنبك بسهولة وتضمن وجوده باستمرار...


لو عايز معلومات أكتر عن الزيوت.. أنصحك تدخل هنا:
القواعد الذهبية لاختيار زيت العربية.... موسوعة مبسطة لأساسيات زيوت المحركات


...

المشاركة الأصلية كتبت بواسطة khaled s

صباح الخير استاذي الفاضل في زيت تاني اسمة بيذول وزيت مسيول اللي حضرتك قولتلي علي هما دول اللي مطابقين لكتلوج السيارة ودل مش موجدين غير عند موزعين معينين ومش متوفر في المكان اللي انا فية وممكن ميكونش موجود اصلا في العجمي بلكامل مش عارف اغير اية والله توتال ودة اتاكدة انة مش تخليقي لكن نفس الزوجة المطلوبة وزيت التعاون مطابق في كل شي لان مش نفس اللزوجة اية الحال من وجة نظرك اغير مسيول وانا وحظي بعد كدة ولا اغير توتال او التعاون عشان جمبي وخلاص ولا ابع العربية وربح نفسي ههههههههههه واسف انا تعبتك معايا جدا

مفيش تعب ولا حاجة... المهم المصلحة تقضي..

بالنسبة لزيوت بيزول .. هي زيوت كويسة وعندهم تشكيلة واسعة... وأغلبها زيوت تخليقية..

لو هتشتري منهم هات الزيت الأخضر أو الأصفر بلزوجة 10W-40.. نفس العبوات اللي في الصور دي..



ولو إني متوقع سعرهم يبقى غالي وبردو مش متوفرين بسهولة

أنا بس بحاول أجيبلك "أحسن" زيت لعربيتك حسب الكتالوج...

ولو أحسن زيت ده مش متوفر.. يبقى ممكن نستخدم الزيت اللي أقل منه .. وأمرنا لله.

لو ما لقيتش الزيوت اللي اتكلمنا عليها دي يبقى استخدم زيت مصر فينكس 5W-40 أو التعاون 1 بنفس اللزوجة.


...