مشكلة في فتيس لانسر بومه 2008 ال cvt

السلام عليكم جميعا .. تحياتي لكل الساده الاعضاء والزوار والقراء الكرام.. اشتريت عربية لانسر بومة ٢٠٠٨ أتوماتيك ١٦٠٠ سي سي وماشية ١٤٠ الف كيلو .. عملت كل الصيانات العادية والمتعارف عليها وبدلت السيور لكن ظهرت مشكلة بسيطة لكنها اخدت مجهود ومبالغ كتير علي الفاضي لان الافتاءات كانت كتير ولاني معنديش خبرة نهائي وبصدق اللي بيتقالي من اول مرة .. المشكلة كانت في تسخين العربية لمده لا تقل عن ١٥ دقيقه الصبح عشان العربية تسخن وتشد حيلها وبعد لف ودوران وتغيير قطع كتير ومصنعيات طلع في الاخر انها مشكلة في حساس الايدل وغيرته ومشي الحال .. لكن العيب اللي في العربية دلوقتي اني بحس بالعربية عند سرعة ال ٦٠ كيلو بأن العربية واخده غيار اعلي من سرعتها كانك مثلا كنت علي الغيار التالت وقمت عاطيها الغيار الخامس بتحس بالبلدي كده كأن العربية بتهر منك علي ما توصل سرعتها ل ٩٠ عشان يبقي الغيار مناسب ليها .. مع العلم انها اتوماتيك و الفتيس cvt .. ملحوظة العربية متشال منها علبة البيئة وانا شاريها كده .. برجاء لو حد من مالكي اللانسر الكرام تعرض لنفس المشكلة او عنده الخبرة الكافية للمشكلة دي يفيدني بدل ما اسلم نفسي للافتاءات والتكهنات وضياع الوقت والفلوس علي الفاضي .. وشكرا مقدما علي وقتكم وسعة صدوركم.