الموضوع: اسفسار بخصوص زيت فيرنا

اللي يقولنا كويس ولا لأ هو كتالوج عربيتك.. مش احنا

الفيرنا نزل منها موديلات كتير (من 2002 لحد دلوقتي).. وتوصيات كتالوج العربية اتغيرت خلال المدة الطويلة دي..

والأفضل دايما هو إننا نمشي مع التوصيات الأحدث...

لو عايز كتالوج الفيرنا .. تقدر تنزله من هنا...ده النسخة الهندي اللي بتتجمع في مصر..
Hyundai Accent.Verna 2009 - India.pdf
(خد بالك: الكتالوج ده مفيهوش سيرة عن الأوتوماتيك لإن العربية بتنزل مانيوال بس في الهند.. بس لو عايز تفاصيل أكتر عن الأوتوماتيك في الفيرنا قوللي وأنا أجيبلك كتالوج تاني ليها).


ودي صورة توصيات الزيت في الكتالوج في صفحة 131..



مواصفات الزيت المطلوب حسب الكتالوج كالتالي:

مستوى الجودة:
مطابق لمستوى API SL على الأقل و ILSAC GF-3 على الأقل

اللزوجة:
والمفضل هو اللزوجات الخفيفة :5W-20 أو 5W-30 .. بشرط تكون مطابقة لمواصفة ILSAC GF-3 أو أعلى... وده لتوفير استهلاك البنزين.

الكتالوج مدينا كمان بعض الحلول لو ما لقيناش اللزوجة المفضلة (5W-20 أو 5W-30) أو ما لقيناش مستوى الجودة المطلوب (ILSAC GF-3)، وقال إنه ممكن نستخدم اللزوجات دي:

20W-50 أو 15W-40 أو 10W-30 أو 5W-30 أو 5W-20


من التوصيات دي نعرف إن الزيوت اللي حضرتك عايز تحطها مش هي الأحسن لموتور عربيتك.. لسببين:

1- اللزوجة دي (15W-50) مش مذكورة في الكتالوج..
2- جودة الزيت مش مطابقة لطلبات الكتالوج .. خصوصا في حتة مواصفة ILSAC



علشان أقدر أقوللك إيه أفضل زيت يناسبك .. لازم كمان أعرف شوية معلومات تانية...

إيه أسلوب أستخدامك للعربية؟؟ يعني بتسوقها فين وإمتى ..
طريقة سواقتك.. بتسوق بالهداوة ولا بتحب تقرص عالموتور؟؟ (القرص عالموتور معناه زيادة الـRPM عن 4500)
أسلوب تحميل العربية .. يعني كام واحد بيركب فيها .. وبتشيل إيه في شنطة العربية؟؟؟
ميزانيتك.. مستعد تدفع لحد كام في غيار الزيت في السنة؟؟


حاجة تانية كمان....

فعليا.. مفيش زيت بيتغير على 3000... ده كلام فارغ وأساطير الناس واخداها من أيام ما كان الزيت مالوش معيار ولا كان متطور زي دلوقتي... يعني كلام قديم قوي من 50 سنة..

تغيير الزيت بيبقى أساسا حسب كتالوج عربيتك...

وكتالوج الفيرنا بيقوللك غير الزيت كل 10 آلاف كيلومتر (لو بتسوق العربية بطريقة مثالية بالنسبة للزيت).. أو كل 5000 كيلومتر أو 6 شهور (لو بتسوق بطريقة شاقة على الزيت)


عايز تعرف أكتر عن الموضوع ده.. أنصحك تدخل هنا:

إمتى تغير زيت الموتور؟؟؟

وكمان أنصحك تدخل هنا لو عايز تعرف أكتر عن زيوت الموتور..
القواعد الذهبية لاختيار زيت العربية.... موسوعة مبسطة لأساسيات زيوت المحركات

في انتظار ردك لاختيار الزيت المناسب..


...

المشاركة الأصلية كتبت بواسطة rotanamasoud

ينفع انا ارد على حضرتك معايا فيرنا واستخدامى نصه طرق سريعه ونصه داخل المدينه تقريبا وطريقه سواقتى هاديه اخرى 120 كسرعه وتسارع متوسط مبقرصش والتحميل على العربيه حسب الظروف بس حنفرض التحميل الاعلى 4 افراد ومكيف شغال ايه الزيت الموصى به فى حالتى

استخدم أي زيت واخد تصنيف ILSAC وبلزوجة 5W-30

عندك زيوت كتير واخدة التصنيف...

بس أسهل واحد تلاقيه بسهولة هو موبل1 x1 بلزوجة 5W-30


وفيه حاجات تانية كتير غيره.

والموضوع يعتمد كمان على ميزانيتك.. بس غالبا مش حتاخد أفضل حاجة لعربيتك ولاستخدامك.


...

المشاركة الأصلية كتبت بواسطة rotanamasoud

حاله المحرك متوسطه قطع 106 الف كيلو كنت بفكر فى زيت التعاون التخليقى 5-40 بس خايف من البخر او التعاون الاصفر xpl-smوالموتور تم عمل شنبر له عند 104 الف كيلو هل ينفع اختار نوع من الاتنين مش فاهم نقطه ilsac وكنت بفكر اضيف مع اللى حختاره ايزى اكسترا بور لوب الازرق ممكن اعرف ايه الصح من التعاون او الصح تحديدا لو ماركه اخرى والصح فى اضافه الايزى

على أي أساس حضرتك حكمت إن الموتور حالته متوسطة؟؟ هل عملت اختبار كبس؟؟؟ هل الزيت بينقص؟؟

مسافة الـ106 ألف كيلو ما تعتبرش كتير على فكرة .. بس غريبة إن الموتور يعمل شنبر بدري كده!! هل كان ليها سبب معين؟؟

الحالة دي تخليني أسأل عن طريقة سواقتك أكتر..

هل بتنقل الغيارات قبل 2000 RPM؟؟؟؟ حضرتك ساكن في مكان فيه طرق طالعة أو نازلة؟؟؟ بتعمل إيه لما تكون عايز تعدي من عربية قدامك؟؟؟
أخبار ثرموستات الكوعة إيه؟؟؟ وإيه نوع الزيت اللي كنت بتستخدمه (بالاسم التجاري لو تقدر)؟؟؟


بالنسبة لنوع الزيت...

مواصفة ILSAC مواصفة مشابهة لمواصفات API .. بس بتتميز عنها إن لزوجاتها خفيفة (أتقل لزوجة هي 10W-30)... بس في نفس الوقت بتدي حماية عالية للموتور وكمان ثبات عالي ..
ونادر لما الزيت اللي واخد مواصفة ILSAC ينقص...


بالنسبة للزوجة الزيت...
واضح إنك قلقان من اللزوجة الخفيفة... لكن خد بالك إن زيادة اللزوجة زي ما ليها مميزات زي ما ليها عيوب...

مميزات اللزوجة العالية هي ضمان وجود طبقة زيت تحمي الموتور أثناء التشغيل .. خصوصاً في التحميل الشديد عليه...

يعني إيه تحميل شديد؟؟؟

يعني أي حالة من دول تتكرر معاك كتير (أكتر من 50% من وقت السواقة):

1- تحميل أوزان عالية في العربية يزيد عن 250 كجم (بالنسبة لأغلب العربيات الملاكي).. سواء ركاب أو شنط أو خلافه.
2- القيادة الرياضية.. يعني اللي فيها قرص على الموتور مع الضغط الشديد على دواسة البنزين لحد ما عداد الـRPM يوصل لما قبل الخط الأحمر.
3- القيادة على الطرقات الجبلية.. سواء طالع أو نازل (زي طرق جنوب سيناء مثلا)
4- سحب أو قطر سيارات أو مقطورات
5- تشغيل السيارة كسيارة أجرة أو دورية شرطة أو سيارة تجارية.. لإنها معرضة لأي موقف من الأربعة دول في أي وقت.

لو ما كنتش بتعيش أي حالة من دول فمفيش داعي أصلا لزيادة اللزوجة.. والكلام ده ساري على العربية وهي جديدة أو قديمة.


الميزة التانية للزوجة العالية هي انخفاض معدل نقص الزيت بشكل عام... لكن اللي بيفرق أكتر هو خامة الزيت ومواصفته...
وده مش معناه إن الموتور لو حالته سيئة مش حياكل زيت.


عيوب زيادة اللزوجة...

1- المقاومة العالية اللي بتعملها جوه الموتور.. يعني الموتور نفسه مش عارف يتحرك براحته بسبب الزيت... وده بيستهلك طاقة من الموتور ويقلل استجابته
2- ضعف الوصول للأماكن الضيقة خاصة في المواتير الحديثة..
3- بطء التزييت نسبياً في بداية تشغيل الموتور .. خصوصا في الجو المتجمد..


بالنسبة للإضافات.... فملخص كلامي فيها جملة واحدة... اوعى تحط إضافات

التفاصيل في الموضوع ده: إضافات الزيوت... إيه الحكاية؟ (إضافات الزيوت... إيه الحكاية؟)


بالنسبة لاختيار واحد من زيتين التعاون COOP1 5W-40 أو XPL-SM 20W-50

اللي بدور عليه أول حاجة هو هل مواصفة الكتالوج الزيت موفرها ولا لأ

الفيرنا ليها كتالوجين.. واحد كان نازل زمان من بداية العربية خالص.. وتوصيات الزيت هناك كانت متواضعة .. وكمان كان موسع الاختيارات بالنسبة للزوجة..

الكتالوج الجديد (نزل في الهند لكن ما نزلش مصر للأسف) خلى توصيات الزيت زي بقية عربيات هيونداي بعد 2005.. وهنا مستوى الزيت المطلوب بقى أعلى وكمان مواصفة ILSAC بقت مطلوبة... وكمان اختيارات اللزوجة قلت.

أنا شخصيا أفضل تمشي مع الكتالوج الجديد.. أنا حاطط اللينك بتاعه في الرد الأولاني بتاعي هنا..

لو مشيت على الكتالوج الجديد.. يبقى لزوجة 5W-40 دي المفروض ما تستخدمهاش.. إنما ممكن تستخدم لزوجة 20W-50
حبيت تمشي بالقديم.. تقدر تستخدم التعاون 5W-40 أو 20W-50... من ناحية المواصفات قريبين جدا من بعض..


أنا شخصيا ما زلت أرشح لك زيت بلزوجة 5W-30 ويكون حاصل على مواصفة ILSAC.. حيغنيك عن وجع الدماغ ده كله.. وفيه أنواع أسعارها كويسة..

اسأل على واحد من دول:

زيت AISIN بلزوجة 5W-30


زيت KIXX بلزوجة 5W-30


وبردو فيه زيوت تانية كتير.. بس أتوقع تكون أغلى..

لو حابب ممكن أحطلك بقية الزيوت وانت تختار اللي يناسبك منهم.

ممكن تتابعني هنا https://boriobishi.blogspot.com/


...

المشاركة الأصلية كتبت بواسطة rotanamasoud

الردود داخل الاقتباس

ليا تعليقات على كل إجابة حضرتك جاوبت بيها.. وغالبا كده عندك مشاكل تانية حقوللك عليها في التعليقات..

الزيت بينقص خاصه مع زياده السرعه يعنى اسافر القاهره بسرعه 120 ينقص لتر لو سافرت بسرعه 90 مينقصش ومعرفتش الاقى تفسير علمى (اخر فكره كنت بشك ان لو البلوف بتتكتك ممكن تؤدى الى نقص الزيت بس محتاج حد دارس ياكد الفكره دى)

تكتكة البلوف ما تأثرش في نقص الزيت... والحاجة المتعلقة بالبلوف وممكن تنقص الزيت هي أويلسيلات الصبابات.. غالبا مشققة ومحتاجة تغيير.. ده لو ما كنتش مغيرها وانت بتعمل الشنابر.

ثرموستات الكوعه كنت مركبه (صاحب العربيه كان لغيه)لاكن العربيه سخنت مع دخول الصيف وشيلته وحركبه تانى مع الشتاء والعربيه تستخدم ماء ملون من الزيرو ومكمل بنفس النظام

إذا كنت بتعتبر إن العداد لو وصل للنص يبقى كده العربية سخنة.. يبقى مفيش مشكلة أصلا لإن هو ده الصح..
هو السخونية دي كانت بتوصل فين في العداد؟؟؟

واضح كده إن الموتور فيه مشكلة أكبر من مجرد شنبر...
سخونية العربية في الصيف معناها مشكلة في التبريد.. ممكن من الطلمبة.. بالذات لو بتستخدم مياه الحنفية من زمان.. حتلاقيها اتاكلت ومش بتقلب المية كويس..
وممكن ببساطة الرادياتير محتاج تنظيف.. من بره ومن جوه...
ولو كان كله سليم ونظيف ... يبقى عندك مشكلة في جوان وش السلندر ...

سبب الاضافه ان البلوف بتتكتك والتكتكه دى بتدايقنى وتم عمل فلاش للزيت ونضفت كل البلوف فى الشنبر بنفسى

تكتكة البلوف مش مشكلة... الصوت أصلا مش معيار لجودة الزيت ولا سلامة الموتور.
بالعكس... إنت لو استخدمت زيت تخليقي خفيف.. الصوت حيزيد...

وشيء طبيعي إنك تسمع تكتكة.. انت تعرف كام قطعة في الموتور بتتحرك في الثانية الواحدة؟؟؟
وكمان حضرتك شايل الثرموستات.. يعني الموتور مش بيسخن بسرعة... والموتور البارد مقاساته مش مضبوطة.. يعني طبيعي تسمع تكتكة أعلى من الطبيعي بتاع الموتور..

لو ركبت ثرموستات الكوعة.. الصوت ده حتسمعه لمدة ما تزيدش عن 5 دقايق.. وبعد كده حيختفي لإن كل مقاسات الموتور اتظبطت... لإنه وصل لدرجة حرارة التشغيل اللي أجزاء الموتور متصممة عليها.

شغل العربية زي ما الكتاب بيقول.. حتستريح... ما ينفعش تجبرها على حاجة غلط وترجع تشتكي.. هي مش مصممة لكده.

سبب الخوف من اللزوجه المنخفضه ان بعد الشنبر ما ذال هناك نقص فى الزيت وتم عمل كل حاجه من احكام لجميع الاماكن اللى ممكن يحصل منها تسريب(يعنى الزيت بينقص فى 2000 كيلو نصف العلامه من المين الى الهاى)

المشكلة مش من الشنبر.. عندك مصدر تاني لتهريب الزيت...

احتمال يكون عندك تسريب مش واخد بالك منه...
واحتمال كمان يكون بلف النفس (PCV) بايظ وبيسرب رذاذ الزيت أكتر من الطبيعي...

راجع البوابة بتاعت الثروتل.. لو مليانة زيت يبقى المشكلة من البلف..
لو ناشفة.. راجع التسريب من جوانات وأويلسيلات الموتور..


وادخل هنا علشان عرف أكتر عن أسباب نقص الزيت في الموتور..

- مستوى الزيت في المحرك .. إيه أسباب نقص الزيت؟؟؟ (مستوى الزيت في المحرك .. إيه أسباب نقص الزيت؟؟؟)
- تبخر الزيت... هل هو حقيقة أم خرافة؟؟


...