جالك أوان ووقفت موقف وجـــود
يا تجود بده يا قلبي يا بده تجــــود
ما حد يقدر يبقي علي كل شـــــــئ
مع إن – عجبي – كل شئ موجود
عجبي



سهير ليالي و ياما لفيت و طفت
و ف ليه راجع في الضلام قمت شفت
الخوف ... كأنه كلب سد الطريق
و كنت عاوز أقتله .. بس خفت
عجبي


أيوب رماه البين بكل العـــــــــلل
سبع سنين مرضان وعنده شلل
الصــــبر طيب .. صبر أيوب شفاه
بس الأكـــــــــاده مات بفعل الملل
عجبي


نسمة ربيع لكن بتكوي الوشـــــــوش
طيور جميلة بس من غير عشـــوش
قلوب بتخفق إنما وحـــــــــــــــــدها
هي الحياه كده .. كلها في الفاشوش
عجبي


عجبتني كلمة من كلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنا كل قلب دخلت فيه اتحرق
عجبي !!!


ليه يا حبيبتى ما بينا دايما سفر
ده البعد ذنب كبير لا يغتفر
ليه يا حبيبتى ما بينا دايما بحور
أعدى بحر ألاقى غيره أتحفر
عجبى


بلياتشو قال إيه بس فايدة فنونــــي ؟
و تلات وقق مساحيق بيلونونـــــــي
و الطبل و المزامير و كتر الجعـــــــير
إذا كان جنون زبوني زاد عن جنوني
عجبي


مرغم عليك يا صبح مغصوب يا ليل
لا دخلتها برجليا ولا كانلى ميل
شيلَنى شيل دخلت فى انا الحياه
و بكرة اخرج منها شيلنى شيل
و عجبى


ضريح رخام فيه السعيد اندفن
و حفرة فيها شريد من غير كفن
مريت عليهم قلت ياللعجب
الاتنين ريحتهم فيها نفس العفن
و عجبى


مـع إن كـل الخلق مـن أصـل طين
وكلهـــم بينزلــوا مغمضــين
بعـد الــدقايق والشــهور والســنين
تــلاقى ناس أشـرار وناس طيــبين
عـجبى


ولدي نصحتك لمَا صوتي اتنبح
متخافش من جني ولا من شبح
و ان هب فيك عفريت قتيل اسأله
مدافعش ليه عن نفسه يوم مندبح
و عجبي


--------------------------------------------------

صلاح جاهين