الموضوع: تغيير مقاس كوتش

طبعا فيه مشاكل ضخمة...

مقاس الكاوتش له ارتباط مباشر بسرعة العربية وقوة الموتور واستهلاك البنزين...

فماينفعش تغير المقاس بمزاجك... خصوصا إنك ما غيرتش الموتور بموتور مختلف.. ولا غيرت الفتيس بواحد مختلف...

أهم حاجة لازم تحافظ عليها هي ارتفاع الفردة... لإنها محسوبة بناء على عدد دوران الموتور والفتيس... وبالتلي بتاخد أداء محدد من العربية.. وعداد السرعة في التابلوه بيقرا بناء على المقاس ده...

لو كنت بتغير المقاس علشان توطي العربية فالحل مش في تغيير المقاس إطلاقا...

أصلا أصلا... المقاس اللي كان راكب مش بتاعها أساسا...

المقاس الأصلي للنيفا بيبقى 175/80r16


المقاس اللي حضرتك كنت مركبه (225/70r16) كان أعلى من المفروض بـ1.75 سم.. وكان مزود سرعتك الحقيقية حوالي 5 كيلومتر عن سرعة العداد على سرعة 100 كم/س

المقاس بقى اللي حضرتك ركبته (195/60r15) ارتفاعه أقل بكتير من المقاس الصح بتاع... ونزلهالك 3.6 سم عن الطبيعي بتاعها...

وده معناه إن سرعتك الحقيقية حتبقى أقل من سرعة العداد بحوالي 16 كيلومتر على سرعة 100.. يعني حتبقى فعليا ماشي على 84 وانت شايف العداد بيقوللك 100... ده غير استهلاك البنزين الزيادة قوي... والموضوع مش ناقص...

عايز تركب المقاس الصح؟؟؟

هات جنط 16 بعرض 6 بوصة... وركب المقاس ده.. 195/70r16

أو 205/70r16... أو 205/65r16

ولو مصر على الجنط الـ15... فأنسب حاجة بالنسبالك هو 215/70r15


ده كده هيرجعك لأصل العربية... ولو عايز توطيها يبقى الشغل مش في الكاوتش خالص.. إلا بعد تغيير الموتور والفتيس.


...