الموضوع: ما الذي يحدث للسيارة عند ( غلق الدريكسيون ) .. و ما هو الضرر الذي حدث في هذه الحالة ؟

أنا كان عندي سؤال و أستفسار من حضراتكم .. و في موضوع متعلق بنظام التوجيه للسيارة .. أنا نزلت من بيتي لقيت فيه ناس أصحاب محلات تحت البيت و كانت جايلهم عربية بضاعة و كانوعايزين يفرغوها في المحل بتاعهم .. و للأسف أني كنت راكن قدام المحل بتاعهم و قافل على جزء من الباب الصاج ( مش كل الباب ) .. فما كان منهم ألا أنهم راحو شايلين العربية من الخلف و رافعينها من عالأرض و دايرين و لافيييين بيها حوالين محور العجل الأمامي و هي معشقة على ال p .. أنا نزلت من البيت لقيت العجل لافف مع أتجاه العربية .. مع أني كنت لما ركنت سايبه في العدل على نفس حذا أستقامة السيارة .. المهم أني لقيت العجل لافف ووآخد زاوية مع أتجاه السيارة .. و لما فتحت العربية من جوه .. لقيت الدركسيون هو كمان لافف ووآخد زاوية .. مع أني ساعة لما ركنت كان الدركسيون على عدلته و كان الدركسيون ساعتها ( مسوجر ) .. يعني تقدرو تقولو حضراتكم أن الموضوع المرادي تم بطريقة عكسية تماما .. بدل مالدركسيون هو اللي بيلف العجل .. العجل المرادي هو اللي لف الدركسيون بالراجع و بطريقة عكسية تماما .. و مع العلم أن العربية كانت معشقة على ال P لأنها فول أتوماتيك و كمان الدركسيون كان مسوجر .. السؤال اللي أنا حابب أسأله لحضراتكم .. هو أزاي العربية لفت معاهم أصلا حوالين محور العجل الأمامي برغم أنها كانت معشقة على ال P مش مفروض أن غيار ال p ده بيمنع أي حركة في العربية و هي واقفة سواءا كانت حركة للأمام أو للخلف أو دوران حوالين محورها الأمامي .. أو أي حركة من أي نوع .. مش عارف أزاي هي لفت معاهم و هي معشقة على ال P بصراحة .. و هل ممكن يكون حدث تلف للجير بوكس بسبب هذه الحركة العشوائية المفاجئة .. و السؤال الثاني .. هو أزاي طارة الدركسيون لفت معاهم أصلا نتيجة شيلهم للعربية و دورانهم بيها حوالين محور العجل الأمامي .. برغم أن الدركسيون كان مسوجر ساعتها .. مش المفروض أن غلق الدريكسيون بيمنع حركته تماما تحت أي ظرف من الظروف طالما العربية واقفة في مكانها .. و هل ممكن يكون دورانها ده مؤشر لتلف شيء في السيارة أو في مجموعة التوجيه .. و السؤال الثالث اللي حابب أسأله لحضراتكم هو .. هل أستخدامهم للعنف في شيل السيارة و تلفافهم و دورانهم بيها حوالين محور العجل الأمامي .. هل الموضوع ده يكون أتلف أو بوظ حاجة في مجموعة التوجيه أو في الجير بوكس .. أو يكون بوظ حاجة في الدركسيون أو المسوجر بتاعه .. هل ممكن تكون فيه حاجة أتكسرت أو أتقطمت جوه العربية بسبب الحركة الغير مدروسة أو الغير تصميمية اللي حصلت مع العربية و أنا مش وآخد بالي منها .. و مع العلم أن السيارة اللي بأكلم حضرتك عليها هي فول أتوماتيك موديل 2011 رجاء التكرم بالأحاطة .. و حابب أستفيد من خبراتكم في كل ما يتعلق بموضوع ( غلق الدركسيون ) و أنعكاساته على السيارة في الأحوال العادية و في حالة حدوث حركة عشوائية مفاجئة زي اللي وضحتها لحضراتكم .. و ياا ريت حضراتكم ماا تبخلوووش علينا بالرد زي ما عودتونا دايما .. و لكم مناا جزيل الشكر و كل الحب و التقدير و الأحترام .. ألف شكر .. ألف شكر