السلام عليكم ..
أنا عضو جديد .. بصراحه دايما بستخدم نايل موتورز كمرجع فيما يخص أى عربيه و دا اللى شجعنى اعمل عضويه عشان استفيد من خبرات الاعضاء المحترمين .

بس قبل ما استأذنكم فى بعض الاسئله .. عايز اوضح انى دى اول عربيه هشتريها ف حياتى .. خبرتى ف العربيات عموما زى خبرتى ف اللغه الصينيه كده بالظبط
و عايز اكمان اوضح انى فعلا دورت ع النت و هنا ع الموقع كتير يعنى مش بسأل أسئلتى دى كسل انى ادور .. لا .. دورت و اما ملقتش اجابه و اما الاجابه لم تشف غليلى .
ملحوظه أخيره .. أنا اقدر ادفع كاش حوالى 110 .. و اقسط مثلا 5 الاف كل شهر بس مش لمده طويله .. و انا ضد القروض البنكيه تماما لعدم اقتناعى انها حلال و اتقاءا للشبهات .. و كذلك الحال مع موضوع المرابحه او التقسيط عن طريق موقع من المواقع اللى ع النت اللى كلكم عارفينها .

و بالتالى وفقا لامكانياتى استقرا بيا الرأى على الأسترا 2009 ..
1- لأنها أوبل أولا و أخيرا .. ماركه عريقه و ليها سمعتها و ف رينج سعر اقدر عليه .
2- قطع غيارها مقارنة بباقى الأوروبى مش فظيعه .
3- لاقيت فيها معظم الامكانيات اللى انا عايزها و على رأسها الثبات لأن شغلى كله سفر ، و استهلاك معقول للبنزين ، و سرعه قصوى كويسه ، و شكل خارجى معقول جدا (يا جماعه لو انا غلطان ف حاجه صححولى بقولكم العربيات بالنسبالى زى الصينى يعنى تشانج يونج مينج سونج خالص ) .


بعد ما استقريت بصوره شبه نهائيه على الأخت الفاضله ربة الصون و العفاف أسترا 2009 ، في كام حاجه قالقنى و عايز استفيد من خبراتكم فيها :

أولا : الفتيس فى ناس بتكتب انه ستيبترونيك و فى ناس بتكتب انه إيزى ترونيك .. أدخل على صور العربيه ع النت احسه إيزى ترونيك .. فهل ممكن حد يرد رد واضح يقطعلى الشورت ف البسين ؟

ثانيا : لو الفتيس فيه مشكله زى ما لاحظت من شكاوى البعض هنا .. أقصى مشكله فيه تتصلح ف حدود كام ؟ بمعنى اخر يعنى يعور جامد فاتجنب العربيه كلها عشان خاطر فتيسها ؟

ثالثا : أنا راجل لسه مبتدئ عادة اكتر طريق هستخدمه هو طريق سريع بتاع السخنه .. عمرى ما هزود عن 120 ك/س .. و فى مرات قليله هضطر ادخل بيها السايت و دا طبيعته جبليه بس معقول يعنى .. فهل العربيه دى مناسبه ليا ؟

رابعا : هل تقترحوا عليا أى بدايل غير الأسترا دى ؟

خامسا : لو معروض عليا عربيه رخيصه و عايزه شورت بلوك .. اجيبها و اسقطلها شورت جديد و لا ابعد عنها من أساسه و اريح دماغى ؟؟

سادسا : جزاكم الله خيرا مقدما و بالله عليكم يا رجاله انا على أدى فلو كنت سألت سؤال غبى او مش منطقى اعتبرونى اخوكم الصغير و متنمرونيش و النبى .



و فى النهايه : يارب كل اللى يدخل الموضوع و يرد عليا و يساعدنى يروح يحج بحق الأيام الحلوه دى .