الاخوة الافاضل .. برجاء الافادة العاجلة علشان دايخ بقالي ١٥ يوم ..

انا اشتريت عربية بعقد مسجل و غيرت الموتور و قولت هثبته بالمرة مع ميعاد تجديد الرخصة والفحص ونقل الملكية ، كله مع بعضه يعني علشان تبقى علقة واحدة، على اثر مشادة بيني وبين ظابط مرور تم سحب الرخصة ووقفت على اثبات الموتور (لسة مسحوبة لغاية دلوقتي) .. وقبل ما صلاحية الرخصة تنتهي رحت المرور القديم و اشتريت نموذج الفحص و اتاخد عليه بصمة الشاسيه والموتور (الجديد) وكان اليوم خلص .. بس ولا فحصت فني ولا نقلت ملكية بسبب ظرف اسري (حالة وفاة).. يشاء القدر اني اعمل حادثة بالعربية من ٢٠ يوم ويتحفظ عليها ف قسم النزهة... مشااااوير كتير ودوخة طويلة حصل فيها التالي :

١. تم عمل محضر تصالح يوم الحادثة مع المتصادمين الاخرين.. و قعدت فترة نقاهة من اثر الحادث خمسة ايام.
٢. رحت القسم علشان افرج عن العربية قالولي هات شهادة بيانات علشان مفيش رخصة تسيير و هتدفع غرامة ١٠٠٠ جنيه ف نيابة مرور النزهة .. روحت دفعت الغرامة و روحت المرور اطلع شهادة بيانات.. وقولت لامين الشرطة ان الموتور متغير قالي هات معاك فاتورة الموتور والافراج الجمركي.
٣. رجعت القسم بشهادة البيانات، قالولي اروح مرور النزهة ينتدب مهندس فحص يروح معايا لمكان التحفظ على العربية ويعمل فحص فني للتاكد من سلامة اجهزة الكبح والتنبيه والتوجيه (ده اللي مكتوب ف قرار النيابة) . المهندس جه معايا وكان شخص غتيت.. عايز يركب عربية مكيفة اوبر و بيبسي واكراميات وحاجة منتهى القرف.. خد بصمة الموتور (الجديد) والشاسيه وكتب فحص فني عن الحادثة والتلفيات..
٤. رحت قسم النزهة فرحان اني اخيرا هطلع العربية، قالولي ارجع تاني لنيابة النزهة علشان قرار النيابة مكتوب فيه يستمر التحفظ على السيارة لحين عرض شهادة مخالفات علينا (غلطتي اني من تعبي من المشاوير مقرتش قرار النيابة بتمعن).
٥. رجعت تاني المرور اجيب شهادة مخالفات و رحت نيابة النزهة و اتشال قرار التحفظ على السيارة و خدت قرار بتسلم السيارة.
٦. رايح على قسم النزهة جري وكان اللي بيخلصلي القصة دي امين شرطة روتيني لابعد حد .. قالي روح صور فاتورة الموتور والافراج الجمركي ... روحت صورتهم وبعد ما رجعت قالي لاء انا مش هكتبلك جواب بتسلم العربية لان الفحص الفني مكتوب فيه موتور مستبدل و رقم الموتور ع البصمة مش مطابق لشهادة البيانات (غير كلامه) .... وريته اصل فاتورة شراء الموتور وصورة الافراج الجمركي و نموذج الفحص واني كنت ماشي ف اجراءات اثباته بس حصل قدر ربنا .. سال ظابط نقيب (شكله هو اللي خلاه يغير كلامه) .. وقالي اهو، دي الاجراءات والقوانين و الافشخانات ف دولة المهلبية العظمى.. اثبت الموتور وهاتلي شهادة بيانات فيها رقم الموتور ...

ياعم سلموني العربية وهصلحها واكيد هثبت الموتور علشان اجدد الرخصة ... ميمنوووع.

ياعم طب ازاي هثبت موتور على عربية عاملة حادثة .. تاخد معاك مهندس فحص من جديد يرفع بصمة و تروح المرور اللي فيه اصل افراج موتورك الجمركي وتثبته وتجيبلي شهادة بيانات جديدة !!! يعني فيها وقت على ما ده يحصل و هسيب العربية طول الفترة دي تخرب اكتر ماهي خربانة او يتقلب منها حاجة ..

سؤالي.. هل فعلا ينفع اثبت موتور جديد راكب على عربية عاملة حادثة ودي الاجراءات فعلا ولا انا بواجه ناس معقدين الدنيا ع الفاضي والمفروض استلم العربية ؟

طب لو هثبت الموتور اعمل ايه ؟

معلش طولت عليكوا بس اخوكوا واقع ف ورطة ومشاوير وحرقة دم لمدة ١٥ يوم والعربية بتتهان ف القسم وياعالم ايه اتقلب منها ..