الموضوع: مشكلة في تكييف نيسان n17

السلام عليكم ورحمة الله وبركاته
عندي مشكلة في تكييف العربية صني n17 موديل 2013 المشكلة انه فجأة مش بيبرد كويس زي الأول والكمبيريسور بيفصل بسرعة ، المشكلة دي ظهرت فجأة فعلا ، الخميس الماضي رحت اعمل صيانة 125000 وتم تغيير الزيت والكشف على السؤائل وتربيط العفشة وقالولي كله تمام وكان المكيف زي الفل وانا رايح ، خلصت الصيانة استلمت العربية وانا ماشي حسيت ان الهوا اللي خارج من المكيف مش بارد زي العادة بصيت لقيت مفتاح السخن والبارد متحرك شوية ناحية السخن حاولت ارجعه على البارد بيرجع تاني مكانه ، لفيت ورجعت لمركز الصيانة تاني وقلتلهم على المشكلة ، مهندس المركز طلب من احد العمال انه يشوفه ركب العربية ثواني ورجع قالي المكيف تمام وما فيهوش حاجة ، رجعت اشوفه لقيت المفتاح رجع عادي على البارد بس برضه التكييف من بارد زي ما كان الصبح ، قلت للمهندس قالي دي مجموعة مفاتيح التكييف محتاجة تصليح والتصليح ده يتكلف 2000 جنيه ، انا استغربت جدااااا من السعر خاصة لما قالي ان المجموعة كاملة جديدة سعرها 9000 جنيه وشغلها تصليح او تغيير ياخد يومين ، انا قلت اجرب اليومين دول التكييف الأول ، لكن فعلا بعد التجربة التكييف مش مظبوط ابدا والهوا مش بارد زي الأول والكمبريسور بيشتغل وبيفصل بسرعة جدا ، مش عارف فيه ايه ... ممكن من فضلكم لو حد مر بالمشكلة دي يقولي ايه الحل الصح وياريت لو سمحتم لو فيه فيديو لطريقة فك لوحة مفاتيح التكييف عشان حاسس ان المشكلة في المفاتيح لانها ما كنتش بتتحرك وخاصة مفتاح السخن والبارد
آسف على الإطالة وأتمنى المشكلة تتحل وتكون بسيطة بإذن الله
محمد

السلام عليكم ورحمة الله وبركاته
شكرا جزيلا على اهتمامك وردك ، فعلا انا عملت معاهم مشكلة في التوكيل واتصلوا بي وطلبوا اني اوديلهم العربية عشان يكشفوا عليها ويصلحوا التكييف - على حد كلامهم ان ممكن يكون حاجة بسيطة ، انا بصراحة اليومين اللي فاتوا كنت بغير راديو العربية وفكيت التابلوه وبصيت على وحدة تحكم التكييف طلع ان كابل السخن والبارد تقيل جداااا ... اكتفيت باني قفلت بوابة الهوا مؤقتا لغاية ما اعرف الكابل ده بيتباع ولا لأ والحمد لله التكييف رجع زي الاول
شكرا جزيلا مرة تانية
محمد