عايز رأيكم بما إنها أول عربية هجيبها
كيفكم يا أهل المنتدى
بفكر أجيب أول عربية ليا و كنت محتاج رأيكم علشان لسه متسوح و مش عارف أختار صح من نواحى كتير ، زى الصيانة و العيوب و الكلام ده ، كنت بفكر فى الاول فى النيفا بس لما تابعت مواضيعها لقيت عيوبها كتير ، أينعم انا جنب حمدى على طول بس ده برضو ميمنعش ان معنديش وقت ان كل خمس دقايق اروح اعملها صيانة ، ده غير ان حوار التكييف بتاعها ده بالنسبه ليا مهم شوية لانى ناوى احتفظ بالعربية مش عايز كل شوية ابيع ، و بعد كده لقيت ان الشاريد و الفيستا مش متوفرين كتير و بالتالى اللى معاه نسخه منهم اوتوماتيك و تكييف هتبقى معجزة انى الاقيها بالمبلغ اللى محدده ، فياريت لو تفيدونى بأرائكم فى موديلات العربية اللى ممكن تبقى مناسبة على حسب بيانات الاستمارة.
المبلغ المتاح / ما بين 25 و 40
نوع العربية / مستعمل
خبرتك فى السواقة وسكك الصيانة / جديد
شكل العربية / مش فارقه
الموديل / مش فارقة المهم متكونش تمانينات
إستخدام السيارة فى الاغلب / داخل و خارج القاهرة
انتقالاتك بالعربية / دايما معايا ناس
الكماليات المرجوة / المهم التكييف و الباور
إستهلاك البنزين / يفضل لو استهلاك متوسط
قطع الغيار / فى المعقول و تعيش
اماكن الصيانة / مش هتفرق كتير بس الأفضل الميكانيكية
التفرغ لأعمال الصيانة / يا ريت لو حاجة مش محتاجة صيانة على طول
الاستمرار بالعربية لفترة / ناوى احتفظ بيها
سعر إعادة البيع / خسارة معقولة (و لو انى زى ما قلت هحتفظ بيها بس كله فى علم ربنا)
اهم حاجات بتدور فيها على العربية / قله اعطال و شكل حلو
ملاحظات اخرى / هو انا طبعا علشان مبتدئ و لسه دى اول عربية ليا فيعتبر معنديش ملاحظات معينة
مستنى رأيكم يا أهل الخير و الخبرة